ឪពុកម្តាយឧកញ៉ាថោង សារ៉ាត់ ត្រូវបានចាប់បញ្ជូនទៅពន្ធនាគារវិញ
ក្រោយពីបានអនុញ្ញាតឲ្យនៅក្រៅឃុំមួយរយៈមក ឳពុកម្តាយលោកឧកញ៉ា ថោង សារ៉ាត់ គឺលោក ថោង ចំរើន និងអ្នកស្រី កែវ សារី ត្រូវបានតុលាការសាលាដំបូងរាជធានីភ្នំពេញសម្រេចបញ្ជូនទៅឃុំខ្លួននៅពន្ធនាគារព្រៃសវិញហើយនៅថ្ងៃចន្ទទី ១៦ កុម្ភៈនេះ។ អ្នកទាំងពីរត្រូវបានសមត្ថកិច្ចចាប់ខ្លួនខណៈដែលពួកគេកំពុងធ្វើដំណើរទៅកាន់ប្រទេសវៀតណាម។
ចុះផ្សាយនៅថ្ងៃ៖
ស្តាប់ - ០២:០២
ក្រោយពីបានសាកសួរអស់ជាច្រើនម៉ោង ចៅក្រមស៊ើបសួរសាលាដំបូងរាជធានីភ្នំពេញលោក លី សុខលេង បានចេញដីកានៅរសៀលថ្ងៃចន្ទទី ១៦ កុម្ភៈនេះបង្គាប់ឲ្យឃុំខ្លួន លោក ថោង ចំរើន និងលោកស្រី កែវ សារី ដែលត្រូវជាឳពុកម្តាយលោកឧកញ៉ា ថោង សារ៉ាត់ នៅក្នុងពន្ធនាគារព្រៃសវិញហើយ។ ជនជាប់ចោទទាំងពីរត្រូវបានចោទប្រកាន់ពីបទប្រើប្រាស់អាវុធខុសច្បាប់។
លោកថោង ចំរើន និងលោកស្រី កែវ សារី ត្រូវបានសមត្ថកិច្ចចាប់ខ្លួនជាលើកទី២នៅយប់ថ្ងៃទី ១៥ កុម្ភៈខណៈដែលអ្នកទាំងពីរកំពុងធ្វើដំណើរទៅប្រទេសវៀតណាម។ ការចាប់ខ្លួននេះពីព្រោះតែជនជាប់ចោទទាំងពីរបានបំពានបទបញ្ជារបស់តុលាការដែលមិនអនុញ្ញាតឲ្យចាកចេញទៅក្រៅប្រទេសឡើយបន្ទាប់ពីត្រូវបានដោះលែងឲ្យនៅក្រៅឃុំបណ្តោះអាសន្ន។
អ្នកទាំងពីរត្រូវបានចាប់ខ្លួនដំបូងកាលពីដើមខែធ្នូ ឆ្នាំ ២០១៤ បន្ទាប់ពីកូនប្រុសរបស់ខ្លួនគឺលោក ឧកញ៉ា ថោង សារ៉ាត់ ត្រូវបានចោទប្រកាន់ថាជាអ្នកបញ្ជាឲ្យអង្គរក្សរបស់ខ្លួនសម្លាប់ឧកញ៉ា អ៊ឹង ម៉េងជឺ កាលពីថ្ងៃទី ២២ វិច្ឆិកាឆ្នាំ ២០១។ បន្ទាប់ពីឧកញ៉ា ថោង សារ៉ាត់ ម្ចាស់បូរី ៩៩៩ បានរត់គេចខ្លួន ឪពុកម្តាយរបស់ឧកញ៉ារូបនេះត្រូវបានចោទប្រកាន់និងចាប់ខ្លួនដែរបន្ទាប់ពីសមត្ថកិច្ចរកឃើញអាវុធជាច្រើនក្នុងផ្ទះរបស់ខ្លួន។
យ៉ាងណាក៏ដោយ សាលាដំបូងរាជធានីភ្នំពេញកាលពីថ្ងៃទី៧កុម្ភៈបានសម្រេចដោះលែងលោកថោង ចំរើន និងលោកស្រី កែវ សារី ឲ្យនៅក្រៅឃុំជាបណ្តោះអាសន្នដោយសារបញ្ហាសុខភាព។ ប៉ុន្តែ សមត្ថកិច្ចបានចាប់ខ្លួនអ្នកទាំងពីរបញ្ជូនទៅតុលាការវិញដោយសារអ្នកទាំងពីរលួចចេញទៅក្រៅប្រទេសដែលអាចជាការរត់គេចខ្លួន។
សូមបញ្ជាក់ថា រហូតមកដល់ពេលនេះ សំណុំរឿងឃាតកម្មទៅលើឧកញ៉ា អ៊ឹង ម៉េងជឺ នៅមិនទាន់បើកសវនាការនៅឡើយទេ។ គេក៏មិនដឹងថា តើពេលនេះឧកញ៉ា ថោង សារ៉ាត់ កំពុងស្ថិតនៅទីណាដែរ។ ឧកញ៉ារូបនេះធ្លាប់បានបញ្ចេញឃ្លីបវីដេអូដោយបដិសេធថា ខ្លួនមិនបានបញ្ជាឲ្យសម្លាប់ឧកញ៉ា អ៊ឹង ម៉េងជឺទេ។
បើតាមលោក ថោង សារ៉ាត់ លោកនិងកងអង្គរក្សត្រូវបានគេទម្លាក់កំហុសដាក់ ហើយលោកបានសុំអន្តរាគមន៍ពីលោកនាយករដ្ឋមន្ត្រីឲ្យជួយរកយុត្តិធម៌។ គេនៅមិនទាន់ដឹងថា តើសំណុំរឿងនេះនឹងត្រូវគេលើកយកទៅកាត់ក្តីនៅពេលណានៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ