ស្ពាន ត្សឹបាសា សម្ពោធដាក់អោយប្រើប្រាស់ជាផ្លូវការនៅថ្ងៃទី០៦មេសានេះ
ស្ពានអ្នកលឿង ដែលមានឈ្មោះថា ត្សឹបាសា មានប្រវែងជាង២គីឡូម៉ែត វែងជាងគេនៅប្រទេសកម្ពុជា ត្រូវបានសម្ពោធដាក់អោយប្រើប្រាស់ជាផ្លូវការហើយ នាព្រឹកថ្ងៃទី ០៦ ខែ មេសា ឆ្នាំ ២០១៥ នេះ ដោយមានការចូលរួមពី លោកនាយករដ្ឋមន្ត្រីហ៊ុនសែន និង អនុរដ្ឋមន្ត្រីក្រសួងដែនដីជប៉ុន។
ចុះផ្សាយនៅថ្ងៃ៖
ស្តាប់ - ០១:៣០
ពាក្យថា ត្សឹបាសា ភាសាជប៉ុននេះ មាននយ័ជាភាសាខ្មែរថា ស្លាប។ ស្ពានអ្នកលឿង គឺជាប្រភេទស្ពានខ្សែកាបយោងទី១ធំជាងគេនៅកម្ពុជា ដែលបានចំណាយទឹកប្រាក់សាងសង់ ប្រមាណ ១២៧លានដុល្លារ ដែលជាថវិការជំនួយឥតសំណងរបស់រដ្ឋាភិបាលជប៉ុន និងថវិកា ជាង ១៩លានដុល្លា របស់រដ្ឋាភិបាលកម្ពុជា។
នៅក្នុងឱកាសសម្ពោធដាក់អោយប្រើប្រាស់ស្ពានត្សឹបាសាជាផ្លូវការនេះ ក្រៅពីថ្លែងអំណរគុណជប៉ុន និងកម្ពុជា លោក នាយករដ្ឋមន្ត្រីហ៊ុនសែនក៏បានបញ្ជាក់ថាស្ពានមួយនេះមានសារៈប្រយោជន៍ធំធេងណាស់។ វាមិនត្រឹម បម្រើតែប្រយោជន៍ប្រជាជនកម្ពុជានោះទេ វាក៏ជាផ្លូវHighway តភ្ជាប់អាស៊ានដែរ។ ហើយថាចាប់ពីថ្ងៃនេះតទៅ ប្រជាជនកម្ពុជានឹងមិនជួបប្រទះបញ្ហាកកស្ទះចរាចរណ៍ ឬក៏ ផលវិបាកដោយសារការរង់ចាំសាឡាងអ្នកលឿងនោះទេ។
កន្លងមកមានពាក្យចចាមអារ៉ាមថា ស្ពានមួយនេះមិនអនុញ្ញាតិអោយឡានក្រុង និងឡានកុងតឺនឺឆ្លងនោះទេ ឡានទាំងនេះត្រូវឆ្លងតាមសាឡាងអ្នកលឿង។ ការលេចលឺនេះត្រូវបាន លោក ផែង សុវិជ្ជានោ អ្នកនាំពាក្យក្រសួងសាធារណការនិងដឹកជញ្ជូន បដិសេធ។ លោកបានបញ្ជាក់ប្រាប់វិទ្យុបារាំងអន្តរជាតិថា ស្ពាននេះ អនុញ្ញាតិអោយគ្រប់យានជំនិះធ្វើដំណើរឆ្លងកាត់។
សូមបញ្ជាក់ថាការសាងសង់ស្ពានត្សឹបាសាដ៏វែងជាងគេនៅកម្ពុជានេះ បានប្រើប្រាស់រយៈពេល៤ឆ្នាំ ដោយ ត្រូវបានចាប់ផ្តើមសាងសង់កាលពីដើមឆ្នាំ២០១១ និងបញ្ចប់រួចរាល់ នៅថ្ងៃទី ១៥ មីនា ឆ្នាំ ២០១៥។ ស្ពានអ្នកលឿង និងផ្លូវតភ្ជាប់ មានប្រវែងសរុប ៥៤០០ម៉ែត្រ តួស្ពានសុទ្ធសាធមានប្រវែងជាង ២គីឡូម៉ែត្រ និង ទទឹង១៣ម៉ែត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ