កញ្ញាសាសាបដិសេធសំណើសុំសម្រុះសម្រួលរបស់ឧកញ៉ាសុខប៊ុន ខណៈមន្ត្រីជាន់ខ្ពស់រដ្ឋាភិបាលបញ្ជាឲ្យចាប់ជនដៃដល់
លោក សុខ ប៊ុន ដែលបានប្រើអំពើហឹង្សាលើកញ្ញា សាសា គ្មានពន្លឺថានឹងអាចរួចផុតពីសំណាញ់ច្បាប់នោះទេ។ បើទោះបីជាលោកបានសុំទោសជាសាធារណៈ និងសូមផ្តល់វិភាគទានក៏ដោយ ក៏ កញ្ញា សាសា ជាជនរងគ្រោះ បានបដិសេធហើយបញ្ជាក់ថា ដាច់ខាតកញ្ញារក្សាជំហរប្តឹងជនដៃដល់ ។ ចំនែកលោក ស ខេង រដ្ឋមន្ត្រីក្រសួងមហាផ្ទៃបានបញ្ជាអោយអគ្គស្នងការនគរបាលចាត់ការសំណុំរឿងនេះអោយបានម៉ឺងម៉ាត់ ដើម្បីកុំអោយបញ្ហាបែបនេះជះឥទ្ធិពលអាក្រក់មកលើសង្គមខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
លោក សុខ ប៊ុន ដែលបានប្រើអំពើហិង្សាលើកញ្ញាសាសានោះ នៅថ្ងៃទី អង្គារទី១៤ កក្កដានេះ បានសុំទោសកញ្ញាសាសា ជាសាធារណៈចំពោះទង្វើខុសឆ្គងរបស់លោក និងសន្យាមិនអោយមានរឿងបែបនេះកើតឡើងទៀតឡើយ។ ក្រៅពីនេះបើតាមសេចក្តីបំភ្លឺរបស់លោក ដើម្បីលុបលាងកំហុស លោកបានលាឈប់ពីងារជាឧកញ៉ា លាឈប់ពីតំណែងប្រធានក្រុមហ៊ុន និងប្រធានសមាគមន សូមការយោគយល់ពីតុលាការ ដោយសារលោកត្រូវព្យាបាលជំងឺស្រេ្តសធ្ងន់ធ្ងររបស់លោក និង សូមផ្តល់វិភាគទានចំនួន ១០ម៉ឺនដុល្លាដល់កញ្ញាសាសាដើម្បីព្យាបាលរបួស។
យ៉ាងណាក៏ដោយ កញ្ញា សាសា បានបញ្ជាក់ប្រាប់វិទ្យុបារាំងអន្តរជាតិនៅរសៀលថ្ងៃទី ១៤ ខែកក្កដាថា កញ្ញាបដិសេធចំពោះវិភាគទាន និងការសុំទោសរបស់របស់លោក សុខ ប៊ុន ហើយនឹងមិនដកពាក្យបណ្តឹង ដែលកញ្ញាបានដាក់ប្តឹងលោក សុខប៊ុន កាលពីថ្ងៃទី២ ខែកក្កដាឡើយ។
ប្រសិនបើកញ្ញា ប្រែចិត្តដកពាក្យបណ្តឹងក៏ដោយ ក៏ លោក សុខប៊ុន នៅតែជាប់បណ្តឹងអាជ្ញា។
ចំនែកមន្ត្រីជាន់ខ្ពស់នៃរដ្ឋាភិបាលកម្ពុជា លោក ស ខេង រដ្ឋមន្ត្រីក្រសួងមហាផ្ទៃ នៅក្នុងឱកាសនៃកិច្ចប្រជុំផ្សព្វផ្សាយអំពីបច្ចុប្បន្នភាពការងារកំណត់ព្រំដែនជាមួយប្រទេសវៀតណាម បានថ្លែងថា ការលះបង់របស់លោកសុខប៊ុន មិនគ្រប់គ្រាន់ទេ វាត្រូវតែដោះស្រាយតាមច្បាប់ ពុំនោះទេវានឹងជះឥទ្ធិពលអាក្រក់មកលើសង្គមខ្មែរ និងកុំអោយមានការរិះគន់មកលើការអនុវត្តច្បាប់នៅកម្ពុជាក៏ដូចជាមន្ត្រីបក្សកាន់អំណាចរបស់លោក ។ លោក បញ្ជាអោយអគ្គស្នងការត្រូវតែតាមចាប់ជនដៃដល់អោយបាន ទោះបីជាត្រូវតាមដល់ទីណាក៏ដោយ។ លោក រដ្ឋមន្ត្រីក្រសួងមហាផ្ទៃ ក៏បានព្រមានមន្ត្រីរដ្ឋាភិបាល មិនអោយមានការឃុំឃិតការពារជនដៃដល់ឡើយ។
លោកស្រី រស់ សុភាព នាយិកាអង្គការយេនឌ័រ និងអភិវឌ្ឍន៍កម្ពុជា បានគាំទ្រចំពោះសាររបស់លោក ស ខេង និងថា ការផ្តល់ថ្លៃព្យាបាលជំងឺនេះគឺជារឿងត្រឹមត្រូវ ប៉ុន្តែវាមិនអាច ដោះដូរជាមួយនឹងការមិនទទួលទោសតាមផ្លូវច្បាប់នោះទេ។ លើសពីនេះ លោកស្រីក៏បានទាញការចាប់អារម្មណ៍ថា ក្រៅពីលោក សុខប៊ុន អង្គរក្សដែលជាអ្នកចូលរួមនៅក្នុងហេតុការណ៍ហិង្សានោះក៏ត្រូវតែ យកមកទទួលទោសចំពោះមុខច្បាប់ផងដែរ។
សូមបញ្ជាក់ថា រូបភាពវីដេអូ នៃការប្រើអំពើហិង្សាពីសំណាក់លោក ឧកញ៉ា មកលើកញ្ញាសាសា បានផ្សព្វផ្សាយពេញបណ្តាញសង្គម និងនាំអោយមានការចាប់អារម្មណ៍ពីសាធារណៈជនជាច្រើន។ លោក មេធាវី ហែម សុជាតិ បានពន្យល់ថាចំពោះករណីហិង្សាជាសមូហភាពបែបនេះ ជនល្មើសត្រូវផ្តន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី ៤លាន រៀល ទៅ១០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ