ករណីលោក ខឹម វាសនា ត្រូវបានលើកក្នុងអនុសំវច្ចរមហាសន្និបាតមន្ត្រីសង្ឃ
អនុសំវច្ចរមហាសន្និបាតមន្ត្រីសង្ឃទូទាំងប្រទេសលើកទី២៤ បានចាប់ផ្តើមហើយ កាលពីព្រឹកមិញនេះ នៅសាលមហោស្រពចតុមុខ។ ក្នុងចំណោមរបៀបវារៈទាំង៤ របស់មហាសន្និបាតនេះ ករណីលោក ខឹម វាសនា ប្រធានគណបក្ស សម្ព័ន្ធដើម្បីប្រជាធិបតេយ្យ ក៏ត្រូវបានលើកមកពិភាក្សាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១១
លោក សេង សុមុនី អ្នកនាំពាក្យក្រសួងធម្មការនិងសាសនា បានអោយដឹងថា អនុសំវច្ចរ មហាសន្និបាតមន្ត្រីសង្ឃ លើកទី២៤ នេះមានរបៀបវារៈសំខាន់ៗចំនួន៤គឺ៖
1. ការគោរពប្រតិបត្តិធម៌វិន័យរបស់ព្រះសង្ឃនាពេលកន្លងមក
2. ការពង្រឹងផ្នែកអប់រំនៅក្នុងពុទ្ធិកសិក្សា
3. ការអប់រំផ្សព្វផ្សាយ ការបណ្តុះបណ្តាលអ្នកជំនាញព្រះសង្ឃដើម្បីបញ្ជៀសអំពើហិង្សាលើស្ត្រីនិងកុមារ
4. បញ្ហាផ្សេងៗ ដែលរួមមានវិបត្តិក្នុងព្រះពុទ្ធសាសានា ការប្រមាទ ការជេរប្រទេចផ្តាសារ មកលើព្រះពុទ្ធសាសនាជាដើម។
លោក សេង សុមុនី បានអោយដឹងទៀតថា ករណីលោកខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យដែលបាននិយាយឆ្គាំឆ្គង លើព្រះពុទ្ធសាសនា ក៏ត្រូវបានដាក់បញ្ចូលក្នុងរបៀបវារៈទី៤នេះដែរ។ លោកថា មហាសន្និបាត នឹងធ្វើការពិភាក្សានៅរសៀលថ្ងៃនេះ បន្ទាប់មកនឹងចេញសេចក្តីសម្រេចនៅថ្ងៃស្អែក។
សូមបញ្ជាក់ថា អនុសំវច្ចរមហាសន្និបាត មន្ត្រីសង្ឃទូទាំងប្រទេស លើកទី២៤ ប្រារព្ធឡើងដោយ ក្រសួងធម្មការ និងសាសនា រួមជាមួយគណសង្ឃនាយកទាំងពីរគណៈ និងមានការអញ្ជើញចូលរួមពី សមាជិកសភា ឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី និងមន្ត្រី ព្រមទាំងព្រះសង្ឃដែលនិមន្ត មកពីទូទាំងប្រទេសប្រមាណ ជិត១០០០អង្គ/នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ