រថយន្តពន្លត់អគ្គីភ័យ៤០គ្រឿង ត្រៀមសម្រាប់ថ្ងៃបុណ្យចូលឆ្នាំប្រពៃណីចិន-វៀតណាម
នាយរងការិយាល័យពន្លត់អគ្គីភ័យរាជធានីភ្នំពេញ បានឲ្យវិទ្យុបារាំងដឹងថា ទូទាំងរាជធានីមានរថយន្តប្រមាណ៤០គ្រឿង ត្រៀមសម្រាប់បង្ការ និងពន្លត់អគ្គីភ័យក្នុងឳកាសបុណ្យចូលឆ្នាំប្រពៃណីចិន-វៀតណាមដែលចាប់ផ្តើមក្នុងសប្តាហ៍ក្រោយ។ ចំណែកនាយករដ្ឋមន្ត្រីកម្ពុជានៅព្រឹកនេះ ក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នទាំងអគ្គីភ័យ និងគ្រោះថ្នាក់ចរាចរណ៍ផងដែរ។
ចុះផ្សាយនៅថ្ងៃ៖
ស្តាប់ - ០២:០៧
លោក អ៊ុំ ចាន់រដ្ឋា នាយរងការិយាល័យបង្ការ និងពន្លត់អគ្គីភ័យរាជធានីភ្នំពេញបានប្រាប់វិទ្យុបារាំងអន្តរជាតិថានៅក្នុងឳកាសបុណ្យចូលឆ្នាំប្រពៃណីជនជាតិចិន-វៀតណាម ដែលឈានមកដល់ចាប់ពីថ្ងៃទី០៧ ខែកុម្ភៈ រហូតដល់ថ្ងៃទី១០ ខែកុម្ភៈ ការិយាល័យបង្ការ និងពន្លត់អគ្គីភ័យរាជធានីភ្នំពេញ បានត្រៀមកម្លាំង១០០ភាគរយ ដើម្បីពន្លត់អគ្គីភ័យក្នុងរាជធានីភ្នំពេញ។
លោកបានបន្ថែមថា នៅក្នុងថ្ងៃធម្មតាគឺមានកម្លាំងពន្លត់អគ្គីភ័យក្នុងមួយរថយន្តមានតែ៦នាក់ តែក្នុងថ្ងៃបុណ្យចូលឆ្នាំប្រពៃណីជនជាតិចិន-វៀតណាមពេលនេះ គឺមានកម្លាំងពន្លត់អគ្គីភ័យ១២នាក់ក្នុងមួយរថយន្ត និងមានរថយន្តប្រមាណ៤០គ្រឿងសម្រាប់ត្រៀម។
សាលារាជធានីភ្នំពេញកាលពីថ្ងៃទី ០៤ខែកុម្ភៈ ក៏បានចេញសេចក្តីជូនដំណឹង ថាគ្រប់ទីកន្លែងកម្សាន្តទាំងអស់ មន្ទីរ អង្គភាព រោងចក្រ សហគ្រាស គេហដ្ឋាន ត្រូវរក្សាសន្តិសុខ សុវត្ថិភាព សណ្តាប់ធ្នាប់សាធារណៈ សេចក្តីថ្លៃថ្នូរ និងត្រូវប្រុងប្រយ័ត្នក្នុងការអុជទៀនធូប ក្រដាសសែន ភ្លេងចង្រ្កាន ចរន្តអគ្គីសនី ដែលអាចបង្កឲ្យមានគ្រោះអគ្គីភ័យកើតឡើងជាយថាហេតុ។ តាមសេចក្តីជូនដំណឹងនោះ ការដុតក្រដាសសែន ត្រូវប្រើធុងដែក ឬឆ្នាំងដីដើម្បីដុត ហើយហាមដាច់ខាតការដុតលើចិញ្ចើមផ្លូវ ឬទ្រូងផ្លូវសាធារណៈ។ ដូចគ្នានេះដែរ ក្រសួងអប់រំ នៅថ្ងៃទី០៤ ខែកុម្ភៈក៏បានចេញសេចក្តីណែនាំស្តីពីវិធានការទប់ស្កាត់ការដុតផាវ កាំជ្រួច និងគ្រឿងឆេះនៅតាម គ្រឹះស្ថានសិក្សាសាធារណៈ និងឯកជនផងដែរ។
លោកនាយករដ្ឋមន្ត្រីហ៊ុន សែន នៅព្រឹកនេះ ក៏បានអំពាវនាវឲ្យប្រជាពលរដ្ឋមានការប្រុងប្រយ័ត្នខ្ពស់ លើករណីអគ្គីភ័យ និងគ្រោះថ្នាក់ចរាចរណ៍ ដែលតែងតែកើតឡើងច្រើនក្នុងឳកាសបុណ្យទាំងនេះ។ កន្លងមកក្នុងរាជធានីភ្នំពេញនាឳកាសបុណ្យធំៗ តែងតែមានករណីអគ្គីភ័យកើតឡើង ដែលបានបណ្តាលឲ្យទ្រព្យសម្បត្តិសាធារណៈ និងឯកជនខាតបង់ ហើយករណីអគ្គីភ័យមួយចំនួនក្នុងឳកាសបុណ្យចូលឆ្នាំចិន គឺកើតឡើងដោយសារដុតទៀន ធូប។
បើតាមលោកឡុង ឌីម៉ង់ អ្នកនាំពាក្យសាលារាជធានីភ្នំពេញ ការហាមមិនឲ្យមានការដុតផាវ គឺប៉ះពាល់ដល់សន្តិសុខសង្គម ដូច្នេះសាលាក្រុងមិនអនុញ្ញាតិឲ្យមានទេ ហើយការហែក្បួនសាសនាផ្សេងៗក៏មិនអាចធ្វើឡើងផងដែរ បើគ្មានការអនុញ្ញាតិពីសាលាក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ