សហជីពកម្មករម្នាក់ បែកក្បាលហូរឈាមក្នុងថ្ងៃអនុម័តច្បាប់សហជីព
សេចក្តីព្រាងច្បាប់ស្តីពីសហជីព ត្រូវបានរដ្ឋសភាជាតិប្រកាសអនុម័តជាផ្លូវការហើយ នៅល្ងាចថ្ងៃចន្ទនេះ ដោយសំឡេង៦៧លើ៩៨ បន្ទាប់ប្រជុំពិភាក្សាស្ទើរពេញមួយថ្ងៃ។ សេចក្តីព្រាងច្បាប់ដ៏ចម្រួងចម្រាសនេះ ត្រូវបានអនុម័ត ក្នុងពេលដែលសហជីពកម្មករត្រូវបានក្រុមសន្តិសុខ សាលាខណ្ឌដូនពេញវាយឲ្យបែកក្បាលហូរឈាម នៅក្នុងអំឡុងពេលធ្វើការតវ៉ានៅខាងក្រៅរដ្ឋសភា។ វណ្ណ សុគន្ធា ជូនព័ត៌មាន៖
ចុះផ្សាយនៅថ្ងៃ៖
ស្តាប់ - ០១:៤៦
យ៉ាងហោចណាស់ សហជីពកម្មករម្នាក់បានរងរបូសបែកក្បាលហូរឈាម នៅពេលដែលសហជីពរូបនេះ រួមនឹងសហជីពផ្សេងទៀត បាននាំគ្នាតវ៉ាប្រឆាំងនឹងសេចក្តីព្រាងច្បាប់ស្តីពីសហជីពនៅខាងក្រៅរដ្ឋសភា។ សហជីពម្នាក់នេះ គាត់គឺជាសមាជិករបស់សម្ព័ន្ធសហជីពចលនាកម្មករ ដែលដឹកនាំដោយលោកប៉ាវ ស៊ីណា។ គាត់ត្រូវបានកម្លាំងសន្តិសុខសាលាខណ្ឌដូនពេញជាច្រើននាក់ បានចាប់ និងវាយតែម្តង បើទោះបីក្រុមសហជីពដទៃទៀតព្យាយាមជួយឃាត់យ៉ាងណាក៏ដោយ។ ទិដ្ឋភាពហិង្សាពីសំណាក់ក្រុមសន្តិសុខទាំងនេះ បានកើតឡើងចំពេលរដ្ឋសភាជាតិកំពុងតែប្រជុំពិភាក្សា និងអនុម័តសេចក្តីច្បាប់ស្តីពី សហជីពនៅខាងក្នុងរដ្ឋសភា។ ក្រោយពីប៉ះទង្គិចគ្នាមួយប្រ៉ាវ ដែលខាងសហជីពត្រូវចូលពេទ្យនោះ ក្រុមសហជីពកម្មករបានសម្រេចចិត្តបានរំសាយការជួបជុំភ្លាមៗតាមការគម្រាមរបស់ក្រុមសន្តិសុខ ដើម្បីជៀសវាងការកើតមានអំពើហិង្សាជាថ្មីម្តងទៀត។
ក្រុមសហជីពទាំងនេះ មានគ្នាប្រមាណជាង១០០ នាក់ដែលដឹកនាំដោយមេសហជីពកម្មករធំៗនៅកម្ពុជា រួមទាំងមានការចូលរួមពីក្រុមសង្គមស៊ីវិលពាក់ព័ន្ធមួយចំនួនទៀត។ ពួកគេមកតវ៉ានៅមុខរដ្ឋសភា គឺដើម្បីសុំឲ្យរដ្ឋសភាដកសេចក្តីព្រាងច្បាប់ស្តីពី សហជីពនេះ ចេញពីរបៀបវារៈប្រជុំរបស់រដ្ឋសភា។ ទោះបីជាយ៉ាងណាក៏ដោយ ការតវ៉ារបស់ពួកគេនេះ មិនរំខានសូម្បីតែបន្តិចទៅដល់កិច្ចប្រជុំរបស់រដ្ឋសភាឡើយ។ រដ្ឋសភានៅតែអនុម័តសេចក្តីព្រាងច្បាប់ដ៏ចម្រូងចម្រាសនេះបានដោយជោគជ័យក្នុងសំឡេង ៦៧លើ៩៨សំឡេង។
ច្បាប់សហជីព មាន១៧ ជំពូក និង១០០មាត្រា។ ច្បាប់នេះ ទាំងក្រុមថៅកែរោងចក្រ និងសហជីពកម្មករសុទ្ធតែមិនពេញចិត្ត ដោយសារតែពួកគេអះអាងថា មាត្រាមួយចំនួនធ្វើឲ្យរឹតត្បិតសិទ្ធិសេរីភាពរបស់ពួកគេក្នុងការបញ្ចេញសកម្មភាពផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ