សេចក្ដីព្រាងច្បាប់សហជីពដ៏ចម្រូងចម្រាស់ត្រូវបានបញ្ជូនបន្តទៅគណៈកម្មការអចិន្ត្រៃយ៍នៃរដ្ឋសភា
សេចក្ដីព្រាងច្បាប់ស្ដីពីសហជីពដ៏ចម្រូងចម្រាស់ ត្រូវបានគណៈកម្មការជំនាញ សម្រេចបញ្ជូនបន្តទៅកាន់គណៈកម្មការអចិន្ត្រៃយ៍នៃរដ្ឋសភាហើយ ដើម្បីពិនិត្យដាក់បញ្ចូលនៅក្នុងកិច្ចប្រជុំវិសាមញ្ញនៃរដ្ឋសភា នាពេលខាងមុខ។ សេចក្ដីសម្រេចនេះត្រូវបានធ្វើឡើងនៅក្នុងកិច្ចប្រជុំរវាង គណៈកម្មការជំនាញ ជាមួយរដ្ឋមន្ដ្រីក្រសួងការងារកាលពីថ្ងៃព្រហស្បតិ៍។ សហជីពបានសម្ដែងការសោកស្ដាយចំពោះសេចក្ដីសម្រេចនេះ និងថា គណៈកម្មការជំនាញហាក់មិនបានយកចិត្តទុកដាក់ចំពោះសំណើ ក៏ដូចជាកង្វល់របស់ក្រុមសហជីព ចំពោះសេចក្ដីព្រាងច្បាប់នេះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានសម្ដែងការសោកស្ដាយ និងខកចិត្តយ៉ាងខ្លាំង នៅពេលទទួលបានដំណឹងថា សេចក្ដីព្រាងច្បាប់ស្ដីពីសហជីព ត្រូវបានបញ្ជូនបន្តទៅកាន់គណៈកម្មការអចិន្ត្រៃយ៍នៃរដ្ឋសភា ដើម្បីពិនិត្យដាក់បញ្ចូលនៅក្នុងកិច្ចប្រជុំវិសាមញ្ញនៃរដ្ឋសភា នាពេលខាងមុខ។ ការបញ្ជូនសេចក្ដីព្រាងច្បាប់ដ៏ចម្រូងចម្រាស់នេះទៅកាន់គណៈកម្មការអចិន្ត្រៃយ៍នៃរដ្ឋសភា ភ្លាមៗបន្ទាប់ពីរៀបចំសិក្ខាសាលាថ្នាក់ជាតិរួចកាលពីថ្ងៃទី០៩មីនាកន្លងទៅ បានបង្ហាញពីការមើលរំលងរបស់គណៈកម្មការជំនាញរបស់រដ្ឋសភា ចំពោះសំណើ និងកង្វល់របស់សហជីព ដែលតំណាងឲ្យនិយោជិតកម្ពុជានៅទូទាំងប្រទេស។ នេះបើតាមលោក ប៉ាវ ស៊ីណា។
សម្រាប់សហជីព សេចក្ដីព្រាងច្បាប់ស្ដីពីសហជីពដែលបង្ហាញនៅក្នុងសិក្ខាសាលាថ្នាក់ជាតិកាលពីថ្ងៃទី០៩មីនា ត្រូវការឲ្យមានការពិនិត្យបន្ថែម។ សហជីពអះអាងថា សេចក្តីព្រាងច្បាប់ នៅមានលក្ខណៈជ្រៀតជ្រែកក្នុងហិរញ្ញវត្ថុរបស់សហជីព ជ្រៀតជ្រែកក្នុងសិទ្ធិសហជីព ជាពិសេសសិទ្ធិកូដកម្ម ហើយទោសវិន័យមានកម្រិតធ្ងន់ធ្ងរ។ តំណាងសហជីពស្នើឲ្យរដ្ឋសភា ផ្តល់សេចក្តីព្រាងច្បាប់ចុងក្រោយ ដែលល្អបំផុត ហើយក៏សុំពេល ២ឆ្នាំ ដើម្បីពន្យល់ពីច្បាប់នេះ ក្រោយអនុម័តហើយ។
យ៉ាងណាក៏ដោយ ប្រសិនបើសេចក្ដីព្រាងច្បាប់នេះត្រូវបានអនុម័តដោយគ្មានការកែប្រែណាមួយទេនោះ លោក ប៉ាវ ស៊ីណា អះអាងថា សហជីពនឹងធ្វើយុទ្ធនាការតស៊ូមតិជាមួយអង្គការអន្ដរជាតិ និងអ្នកបញ្ជាទិញ ធ្វើយ៉ាងណាដាក់សម្ពាធឲ្យមានការធ្វើវិសោធនកម្មកែប្រែ។
សូមរំលឹកជូនថា សេចក្តីព្រាងច្បាប់ស្តីពីសហជីព មានចំនួន ១៧ជំពូក ចែកជា ១០០មាត្រា។ សេចក្តីព្រាងច្បាប់នេះ ត្រូវបានតាក់តែងតាំងពីខែវិច្ឆិកា ឆ្នាំ២០០៨មកម្ល៉េះ។ កាលពីថ្ងៃទី០៩ ខែមីនាថ្មីៗនេះ រដ្ឋសភាបានរៀបចំសិក្ខាសាលាពិគ្រោះយោបល់ថ្នាក់ជាតិ ស្ដីពីសេចក្ដីព្រាងច្បាប់សហជីពនេះ ដោយមានការចូលរួមយ៉ាងទូលំទូលាយ ពីសំណាក់ស្ថាប័នពាក់ព័ន្ធ ដែលមានជាអាថិ៍តំណាងអង្គការអន្ដរជាតិ សមាគមនិយោជក សហជីព រដ្ឋមន្ដ្រីក្រសួងការងារ និងគណៈកម្មការជំនាញនៃរដ្ឋសភាមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ