តើអ្នកធំនៅកម្ពុជាគួរតែធ្វើជាគំរូសម្រាប់ប្រជាពលរដ្ឋរបស់ខ្លួនដោយពិនិត្យព្យាបាលជំងឺនៅក្នុងស្រុកដែរឬទេ?
ចុះផ្សាយនៅថ្ងៃ៖
ស្តាប់ - ០៤:៣៨
អ្នកណាក៏ដឹងដែរថា ក្នុងមួយថ្ងៃៗ មានប្រជាជនកម្ពុជាមិនតិចនោះទេ ដែលធ្វើដំណើរទៅក្រៅប្រទេសដើម្បីពិនិត្យសុខភាព និងព្យាបាលជំងឺរបស់ខ្លួន។ ក្នុងនោះមានដូចជាប្រទេសវៀតណាម ថៃ និងសង្ហបុរីជាដើម។ រីឯការធ្វើដំណើរវិញ ក៏មានទាំងតាមរថយន្តក្រុង និងយន្តហោះផងដែរ។ ទាំងនេះសុទ្ធតែត្រូវចំណាយពេលវេលា និងលុយកាក់យ៉ាងច្រើនសន្ធឹកសន្ទាប់។ តើមូលហេតុអ្វីបានជាប្រជាជនកម្ពុជាមួយចំនួននៅតែបន្តទៅពិនិត្យ និងព្យាបាលជំងឺនៅក្រៅប្រទេស? តើធ្វើដូចម្តេចដើម្បីឲ្យប្រជាជនខ្មែរ ងាកមកទុកចិត្តសេវាសុខាភិបាលនៅក្នុងប្រទេសរបស់ខ្លួនវិញ? តើមន្ត្រីជាន់ខ្ពស់នៅកម្ពុជាគួរតែធ្វើជាគំរូទេ ក្នុងចំណោទបញ្ហានេះ?
យោងតាមការស្រាវជ្រាវរបស់មន្ទីរពេទ្យជប៉ុនមួយ ដែលគ្រោងនឹងបើកដំណើរការនៅក្នុងប្រទេសកម្ពុជានៅខែកក្កដាខាងមុខនេះ បានឲ្យដឹងថា នៅប៉ុន្មានឆ្នាំចុងក្រោយនេះមានប្រជាជនកម្ពុជាប្រមាណជា ២សែន១ម៉ឺននាក់ធ្វើដំណើរទៅពិនិត្យសុខភាព និងព្យាបាលជំងឺនៅក្រៅប្រទេសក្នុងមួយឆ្នាំៗ។ ប្រទេសដែលប្រជាជនខ្មែរមានកម្រិតជីវភាពធូរធា អាចធ្វើដំណើរទៅបាននោះមានប្រទេសវៀតណាមចំនួន ១សែន៦ម៉ឺននាក់ ស្មើនឹង ៧៦% ។ បន្ទាប់មកមានប្រទេសថៃ ៤ម៉ឺននាក់ ស្មើនឹង ១៩% និងប្រទេសសិង្ហបុរី មានចំនួន ៦ពាន់៣រយនាក់ ស្មើនឹង៣%។
ប៉ុន្តែបើតាមលោកម៉ម ប៊ុនហេង រដ្ឋមន្ត្រីក្រសួងសុខាភិបាលវិញ ចំនួនប្រជាជនខ្មែរ ដែលទៅព្យាបាលជំងឺនៅក្រៅប្រទេសគឺមានតែ១% តែប៉ុណ្ណោះនៃចំនួនប្រជាជនកម្ពុជាទាំងអស់។ ហើយលោកបានបន្តថាតួរលេខនេះមិនមែនរដ្ឋាភិបាលកម្ពុជាជា អ្នករកឃើញនោះទេ គឺជាការសិក្សារបស់ធនាគារពិភពលោក World Bank។
បើទោះបីជាតួលេខប្រភពទាំងពីរខុសគ្នាយ៉ាងណាក៏ដោយ ប៉ុន្តែអ្វីដែលគេប្រកែកមិនបាននោះ គឺវត្តមានរបស់ប្រជាពលរដ្ឋខ្មែរធ្វើដំណើរចេញទៅពិនិត្យសុខភាព និងព្យាបាលជំងឺនៅបរទេសមានស្ទើរជារៀងរាល់ថ្ងៃ តាមរយៈជើងហោះហើរ និងរថយន្តក្រុងជាដើម។ ប្រជាជនខ្លះអាចថាទៅពិនិត្យសុខភាពផង និងឆ្លៀតពេលដើរកំសាន្តផងក៏មានដែរ។ ប៉ុន្តែយ៉ាងណាក៏ដោយក៏ប្រជាពលរដ្ឋខ្មែរ នៅតែត្រូវចំណាយលុយមួយផ្នែកសម្រាប់ការពិនិត្យសុខភាព និងព្យាបាលជំងឺ។
ចុះសួរថាហេតុអ្វីបានជាប្រជាជនខ្មែរ ដែលមានធនធានច្រើន និងកម្រិតជីវភាពសមរម្យមិនប្រើប្រាស់សេវាសុខាភិបាល នៅក្នុងប្រទេសរបស់ខ្លួន? ចម្លើយគឺនៅត្រង់ថា គុណភាពសេវាសុខាភិបាលនៅកម្ពុជានៅមានកម្រិត។ នៅមានកម្រិត ដោយសារតែកត្តាជាច្រើន ដែលរាប់បញ្ចូលទាំងកត្តាមនុស្ស សំភារៈបរិក្ខាពេទ្យ និងថ្នាំពេទ្យជាដើម។
កត្តាមនុស្សគឺចង់សំដៅទៅលើសមត្ថភាព ក្រមសីលធម៌ និងគុណធម៌របស់ក្រុមគ្រូពេទ្យកម្ពុជា។ កន្លងមកធ្លាប់មានបញ្ហាជាច្រើនទាក់ទងនឹងក្រមសីលធម៌នេះ ដោយមានគ្រូពេទ្យមួយចំនួននិយាយមិនសមរម្យដាក់អ្នកជំងឺ ហើយរហូតដល់ពេលខ្លះឈានទៅដល់ការភូតភរ ពីលទ្ធផលនៃការពិនិត្យសុខភាពរបស់អ្នកជំងឺទៀតផង។
រីឯកត្តាសំភារៈបរិក្ខា និងឧបករណ៍ប្រើប្រាស់វិញ ក៏នៅមានភាពខ្វះខាតដែរ ព្រោះថាកន្លងមកលោកនាយក រដ្ឋមន្ត្រីហ៊ុន សែនក៏ធ្លាប់បានពន្យល់ប្រាប់ដល់ប្រជាជនកម្ពុជាទាំងអស់ផងដែរថា មូលហេតុដែលលោកទៅពិនិត្យជំងឺ នៅក្នុងប្រទេសសិង្ហបុរី មិនមែនដោយសារលោកមិនទុកចិត្តពីសមត្ថភាពគ្រូពេទ្យនៅកម្ពុជានោះទេ។ ប៉ុន្តែដោយសារតែស្ថានភាពជំងឺរបស់លោក តម្រូវឲ្យមានឧបករណ៍ទំនើបៗ យកមកពិនិត្យនិងព្យាបាលបាន។
បើនិយាយពីឱសថ ឬក៏ថ្នាំពេទ្យវិញក៏ជាបញ្ហាមួយដ៏ធំផងដែរ ពីព្រោះប្រជាជនខ្មែរមួយភាគធំនៅតែយល់ច្រលំថា ឱសថស្ថានគឺជាកន្លែងព្យាបាលជំងឺរបស់ពួកគេ។ ប៉ុន្តែការពិតឱសថស្ថានគឺជាកន្លែងដែលប្រជាជនទៅទិញថ្នាំតាមវេជ្ជបញ្ជារបស់គ្រូពេទ្យតែប៉ុណ្ណោះ។ ប្រជាជនខ្មែរ អាចដើររកទិញថ្នាំ និងផ្សំថ្នាំបានយ៉ាងងាយស្រួលនៅតាមកន្លែងលក់ថ្នាំពេទ្យនានាក្នុងប្រទេសកម្ពុជា ហើយវាស្ទើរក្លាយទៅជាទម្លាប់ទៅហើយ សម្រាប់ប្រជាជនខ្មែរ ដែលដើរទៅទិញថ្នាំ នៅឱសថស្ថាន ដោយមិនចាំបាច់ទទួលការពិនិត្យជំងឺ និងចេញវេជ្ជបញ្ជានោះ។
លោករដ្ឋមន្ត្រីម៉ម ប៊ុនហេង ទទួលស្គាល់ថាប្រព័ន្ធសុខាភិបាលនៅកម្ពុជាបច្ចុប្បន្នពិតជាមានចំណុចខ្វះខាត ប៉ុន្តែទន្ទឹមគ្នានេះដែរ លោកក៏បានបញ្ជាក់ថា ស្ថាប័នរបស់លោកក៏កំពុងតែគិតគូរពីបញ្ហានេះដែរ ដោយខិតខំបណ្តុះបណ្តាល និងបង្កើនជំនាញបន្ថែមដល់ក្រុមគ្រូពេទ្យ និងអ្នកដែលបម្រើការងារនៅក្នុងវិស័យនេះ។ ក្នុងនោះ លោករដ្ឋមន្ត្រីក៏មិនភ្លេចនិយាយពីការបញ្ជ្រាបពីក្រមសីលធម៌វិជ្ជាជីវៈក្រុមគ្រូពេទ្យដែរ។
កម្ពុជាគឺជាប្រទេសមួយដែលបានឆ្លងកាត់សម័យសង្គ្រាមប្រល័យពូជសាសន៍យ៉ាងសាហាវឃោរឃៅកាលពីជាង ៣០ឆ្នាំមុន។ ប៉ុន្តែនៅបច្ចុប្បន្ននេះ កម្ពុជាក៏បានក្លាយជាប្រទេសមួយរីកចម្រើនក្នុងការប្រើប្រាស់ប្រព័ន្ធផ្សព្វផ្សាយ និងប្រព័ន្ធអ៊ីនធឺណិត។ អញ្ចឹងក្រសួងសុខាភិបាលអាចទាញយកអត្ថប្រយោជន៍នេះ ដើម្បីធ្វើការអប់រំបន្ថែមទៀតដល់ប្រជាពលរដ្ឋរបស់ខ្លួន ឲ្យយល់ដឹងកាន់តែច្បាស់ពីការប្រើប្រាស់សេវាសុខាភិបាលនៅកម្ពុជា។ ជាការចាំបាច់ណាស់ ដែលប្រជាជនត្រូវទៅពិនិត្យសុខភាពជាមុនសិន ដើម្បីទទួលបានវេជ្ជបញ្ជា យកទៅទិញថ្នាំនានា នៅតាមឱសថស្ថាន។ មួយវិញទៀតការគ្រប់គ្រងឱសថក្លែងក្លាយក៏ជាការងារមួយដែលក្រសួងសុខាភិបាល និងក្រសួងមហាផ្ទៃត្រូវដោះស្រាយរួមគ្នា ព្រោះថាបច្ចុប្បន្ននេះ មានឱសថក្លែងក្លាយមិនតិចទេ ដែលកំពុងតែដាក់លក់ក្នុងទីផ្សារកម្ពុជា។
ដើម្បីចូលរួមដោះស្រាយបញ្ហាអស់ទាំងនេះ នឹងដើម្បីបង្កើនភាពជឿជាក់ពីការប្រើប្រាស់សេវាសុខាភិបាលនៅក្នុងស្រុក តើមន្ត្រីរដ្ឋាភិបាលជាន់ខ្ពស់កម្ពុជា អាចធ្វើជាគំរូដល់ប្រជាជនរបស់ខ្លួនបានដែរឬទេ? ព្រោះថាប្រជាជនខ្មែរដែលមានជីវភាពក្រីក្រ គ្មានលទ្ធភាពទៅពិនិត្យសុខភាព និងព្យាបាលជំងឺនៅក្រៅប្រទេសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ