លោកហ៊ុន សែន ស្នើឲ្យគ្រូពេទ្យខ្លះកែឥរិយាបថអាក្រក់ដើម្បីបម្រើពលរដ្ឋ
ជាថ្មីម្តងទៀត លោកនាយករដ្ឋមន្ត្រីហ៊ុន សែន បានអំពាវនាវឲ្យគ្រូពេទ្យដែលធ្លាប់មានឥរិយាបថឆ្គាំឆ្គង ប្រើសម្តីមិនសមរម្យ គិតប្រាក់ជាធំ ត្រូវតែឆាប់កែប្រែឥរិយាបថទាំងនេះជាបន្ទាន់ ដើម្បីបម្រើដល់ប្រជាពលរដ្ឋទូទាំង មិនរើសអើង មិនថាអ្នកមាន ឬអ្នកក្រ នោះឡើយ។ ជាមួយគ្នានេះ លោកហ៊ុន សែន ក៏បានប្រកាសបញ្ជូលជាស្វ័យប្រវត្តិគ្រូពេទ្យឯកទេស ទៅក្នុងក្របខណ្ឌមន្ត្រីរាជការ ដើម្បីកាត់បន្ថយការបញ្ជូនពលរដ្ឋខ្មែរ ទៅព្យាបាលនៅក្រៅប្រទេស។ ហើយគ្រូពេទ្យឯកទេសទាំងនោះ នឹងទទួលបានប្រាក់បៀរវត្ស ចាប់ពីខែមេសា ខាងមុខនេះតទៅ។ ការអំពាវនាវ និងការប្រកាសនេះ បានធ្វើឡើង ពេលលោក ហ៊ុន សែន ចូលរួមបិទសន្និបាតបូកសរុបការងាររបស់ក្រសួងសុខាភិបាល នៅសណ្ឋាគារសូហ្វីតែល រាជធានីភ្នំពេញ នាព្រឹកថ្ងៃទី ១០មីនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
ជាថ្មីម្តងទៀត លោកនាយករដ្ឋមន្ត្រីហ៊ុន សែន បានអំពាវនាវឲ្យគ្រូពេទ្យដែលធ្លាប់មានឥរិយាបថឆ្គាំឆ្គង ប្រើសម្តីមិនសមរម្យ គិតប្រាក់ជាធំ ត្រូវតែឆាប់កែប្រែឥរិយាបថទាំងនេះជាបន្ទាន់ ដើម្បីបម្រើដល់ប្រជាពលរដ្ឋទូទាំង មិនរើសអើង មិនថាអ្នកមាន ឬអ្នកក្រ នោះឡើយ។កាលពីចុងខែកុម្ភៈ ប្រមុខរដ្ឋាភិបាល ក៏ធ្លាប់បានដាស់តឿនក្រុមគ្រូពេទ្យខ្មែរ កុំឲ្យគិតលុយជាធំ ពេលដែលលោកចូលរួមពិធីសម្ពោធអាគារមន្ទីរពេទ្យ នៅខេត្តព្រះសីហនុផងដែរ។ យ៉ាងណាមិញ លោកនាយករដ្ឋមន្ត្រី មិនទទួលស្គាល់ទេថា កម្ពុជា មានគ្រូពេទ្យអសីលធម៌ច្រើន ដូចការលើកឡើងមួយចំនួន។ លោកថា ប្រសិនបើមានគ្រូពេទ្យខូច ៩០ភាគរយ មានន័យថាស្រុកខ្មែររលាយបាត់ហើយ។
ក្រៅពីការចាក់ចង្កេះសីលធម៌គ្រូពេទ្យខ្មែរ ប្រមុខរដ្ឋាភិបាល ក៏បានបញ្ជាឲ្យក្រសួងសុខាភិបាល និងក្រសួងមុខងារសាធារណៈ រៀបចំបញ្ជូលគ្រូពេទ្យឯកទេសទាំងអស់ ទៅក្នុងក្របខណ្ឌមន្ត្រីរាជការ។ គ្រូពេទ្យឯកទេស ដែលលោកនាយករដ្ឋមន្ត្រី យល់ថា មានសារៈសំខាន់ ក្នុងការទប់ស្កាត់កុំឲ្យចេះតែបញ្ជូនពលរដ្ឋខ្មែរ ចេញទៅព្យាបាលជំងឺ នៅក្រៅប្រទេស។ តាមលោកហ៊ុន សែន ការចេញទៅព្យាបាលក្រៅប្រទេសរបស់ពលរដ្ឋខ្មែរភាគច្រើន គឺដោយសារមន្ទីរពេទ្យនៅកម្ពុជា ខ្វះគ្រូពេទ្យឯកទេសជំនាញ។ ហើយលោកនាយករដ្ឋមន្ត្រី បានសន្យាឲ្យគ្រូពេទ្យទាំងនោះ ទទួលបានប្រាក់ខែចាប់ពីខែមេសាខាងមុខនេះតទៅ។
គួរជម្រាបជូនថា បើតាមក្រសួងសុខាភិបាល ក្នុងឆ្នាំ ២០១៥កន្លងទៅ នៅទូទាំងប្រទេសកម្ពុជា មានមណ្ឌលសុខភាពសរុបចំនួន ១១៤១ ក្នុងនោះមន្ទីរពេទ្យមាន ១០៨ ដោយបូករួមទាំងមន្ទីរពេទ្យជាតិចំនួន ៩ផង។ ចរន្តថវិកាជាតិក្នុងវិស័យសុខាភិបាល បានកើនឡើងជាង ១០០ពាន់លានរៀលពីឆ្នាំ ២០១៤ ដល់ឆ្នាំ ២០១៥។ ហើយនៅខែមេសា ឆ្នាំ២០១៦ខាងមុខនេះ ក្រសួងសុខាភិបាល បានសន្យាដំឡើងប្រាក់បៀរវត្សដល់គ្រូពេទ្យឲ្យបានដល់ ៨០ម៉ឺនរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ