"កោះពេជ្រ" របស់ ជូ ដាវី រះលើមហោស្រពកាន
“កោះពេជ្រ” ភាពយន្តខ្មែរជាស្នាដៃរបស់យុវសមិទ្ធិករវ័យ៣៣ឆ្នាំ ដាវី ជូ ត្រូវចាក់បញ្ចាំងនៅថ្ងៃសុក្រ សៅរ៍ ទី ២៣ និង១៤ឧសភា នេះដើម្បីប្រកួតប្រជែងយកពានរង្វាន់ ឡាសឺម៉ែន ដឺឡាគ្រីទីក La Semaine de la Critique លើកទី ៥០ ដែលជាការប្រកួតប្រជែងអមមហោស្រពកាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
សម្រាប់សមិទ្ធិករ ដាវី ជូ ដែលចាប់ចិត្តចង់ផលិតភាពយន្តពីយុវវ័យនិងសង្គមខ្មែរសម័យ បច្ចុប្បន្ន កោះពេជ្រ គឺជានិមិត្តរូបនៃកម្ពុជានាសម័យថ្មី និងអនាគត ជាឋានសួគ៌ាលោកី ជាតំណាងនៃភាពស៊ីវីល័យ ទំនើបអស្ចារ្យ និងភាពមានបាន ... ដែលយុវវ័យគ្រប់ស្រទាប់ចូលចិត្តទៅកំសាន្ត។
កោះពេជ្រ ជាភាពយន្ត ដែលនិយាយអំពី ជីវិតយុវវ័យស្រុកស្រែ ចាកចេញពីស្រុកកំណើត មកធ្វើជាកម្មករសំណង់នៅទីក្រុង នៅកោះពេជ្រ។
បូរ៉ា អាយុ ១៨ឆ្នាំ បានមកធ្វើជាកម្មករសំណង់នៅកោះពេជ្រ បានសាងមិត្តភាពជាមួយកម្មករសំណង់ស្របាលគ្នា និងបានជំពាក់ចិត្តលើរូបនាង អាសា អ្នកធ្វើការលើកោះពេជ្រដូចគ្នា ... រហូតដល់ថ្ងៃមួយ បូរ៉ាបានជួបបងប្រុសបង្កើត ឈ្មោះ សូឡី ដែលចាកចេញពីស្រុកកំណើត និងបាត់ដំណឹង តាំងពីជាង៥ឆ្នាំ។ សូឡី បាននាំបូរ៉ា ឱ្យស្គាល់ពិភពអ្នកក្រុង ហ៊ឺហា ក្នុងភ្លើងពណ៌ ក្នុងពេលរាត្រី ក្នុងក្លឹប ...
ភាពយន្តនេះ បានទទួលការស្វាគមន៍និងអបអរយ៉ាងខ្លាំង នៅក្នុងពេលចាក់បញ្ចាំងប្រកួតប្រជែង។ សាប៊ុន តូួបូរ៉ា និងអាសា ដែលគ្មានបទពិសោធន៍ក្នុងវិស័យសិល្បៈទី៧ទាល់សោះ បានបោះជំហានឆ្ងាយ មិនត្រឹមតែបានស្គាល់ កោះពេជ្រ ដ៏ទំនើបទេ តែបានមកដល់និងបានឃើញផ្ទាល់ ពិភពភាពយន្តខ្នាតអន្តរជាតិ នៅទីក្រុងកាន ស្តាប់ស្នូរទះដៃលើកសរសើរការសម្តែង ឥតដាច់រយៈពេលជាងពីរនាទី ដោយផ្ទាល់នឹងត្រចៀក ក្នុងទឹកចិត្តរំភើប និងរំជួលរកអ្វីថ្លែងមិនបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ