Money Monster ភាពយន្តដែលអង្រួញមហោស្រពកាន
Money Monster ភាពយន្តអាមេរិក ដ៏ទាក់ទាញបំផុតមួយ ក្នុងមហោស្រពកានឆ្នាំនេះ ត្រូវចាក់បញ្ចាំងនៅថ្ងៃព្រហស្បតិ៍នេះ ក្រៅក្របខ័ណ្ឌនៃការប្រកួតប្រជែង។ ដឹកនាំថត ដោយ ហ្សូឌី ហ្វូស្ទ័រ Jodie Foster និងសម្តែងដោយ ចច ក្លូនណេ George Clooney និង ជូលីយ៉ា រ៉ូបឺត Julia Robert។ រឿងMoney Monster បាននាំតារាដ៏ល្បីទាំងបីនេះ ជាពិសេសនាង ជូលីយ៉ា រ៉ូបឺតឱ្យមកបង្ហាញខ្លួន ឡើងជណ្តើរព្រំនៃសាលមហោស្រពកាន ជាលើកទីមួយ។
ចុះផ្សាយនៅថ្ងៃ៖
Money Monsterជាភាពយន្តដ៏គួរឱ្យចាប់ និងឆក់អារម្មណ៍បំផុតមួយ នៃមហោស្រពកានឆ្នាំនេះ។ ចច ក្លូនណេ តួឯកប្រុស ដើរតួជាពិធីករទូរទស្សន៍ក្នុងកម្មវិធីល្បែងភាគហ៊ុន Money Monster ត្រូវបានចាប់ជាចំណាប់ថ្នូរ ក្នុងពេលកំពុងផ្សាយផ្ទាល់ ដោយបុរសវ័យក្មេងគៀលី (Jack O’Connell) ហិនហោចព្រោះលង់ខ្លួនចាញ់ល្បែងភាគហ៊ុនតាមទូរទស្សន៍។ ខ្មាញ់កាំភ្លើង យល់ថាកម្មវិធីហិរញ្ញវត្ថុរបស់ ចច ក្លូនណេ បោកប្រាស់និងភូតកុហក ពន្យុះទស្សនិកជន ឱ្យទិញភាគហ៊ុនមួយដែលត្រូវចំណេញច្រើន តែក្នុងមួយប៉ប្រិចភ្នែក ភាគហ៊ុននោះស្រាប់ដាំក្បាលខាតអស់៨រយលានទៅវិញ ...
ចចក្លូនណេ និងជូលីយ៉ា រ៉ូបឺត តួឯកស្រី ដែលដើរតួជាសមិទ្ធិករគ្រប់គ្រងកម្មវិធីហិរញ្ញវត្ថុរបស់ទូរទស្សន៍ បានសាកល្បងដោះស្រាយស្ថានការណ៍ និងបានឈានទៅវែកមុខរកឃើញមានការលួចបន្លំពីសំណាក់ម្ចាស់ភាគហ៊ុនមែន ក៏ទ្រាំធ្វើចំណាប់ខ្មាំងជួយគៀលី ដើម្បីស្វែងរកការពិត។
ផលិតករ ហ្សូឌី ហ្វូស្ទ័រ ជ្រើសរើសឈុតឆាកប្រកបដោយបច្ចេកទេសនិងបទពិសោធន៍ហើយ តែភាពយន្ត បែបចង តានតឹង តែកំប្លែងសើចបាន ដោយសារមានសេណារីយោល្អ។ ភាពយន្តនេះបាននាំ តារាហូលីវ៉ូត ដ៏ល្បីល្បាញ ចច ក្លូនណេ និងជូលីយ៉ា រ៉ូបឺត ឱ្យមកបង្ហាញខ្លួននៅកាន ជាលើកទីមួយ និងបាននាំរូបផលិតករហ្សូឌី ហ្វូស្ទ័រ ឱ្យមកឡើងជណ្តើរកម្រាលព្រំកាន ជាថ្មី បន្ទាប់ពីអវត្តមានអស់៤០ឆ្នាំ។ ផលិតករហ្សូឌី ហ្វូស្ទ័រ បានទទួលស្គាល់ថា កាន បានប្តូរខ្សែជីវិតលោកស្រី។ កាលពីអាយុ១៣ឆ្នាំ ហ្សូឌី ហ្វូស្ទ័រ បានមកកាន ទទួលបាល់ប័ត្រមាស ក្នុងនាមជាតួសម្តែងរឿង តាក់ស៊ីដ្រាយវ័រ។
វត្តមាន Money Monster និងតារាទាំងបី នៅកាន បានធ្វើឱ្យមហោស្រពលើកទី៦៩ កាន់តែកាន់តែពុះកញ្ជ្រោលដោយក្តីរីករាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ