អន្តរាគមន៍ដោយរថយន្តពន្លត់អគ្គីភ័យ នៅតែទាមទារការចូលរួមរបស់ប្រជាពលរដ្ឋ
ចុះផ្សាយនៅថ្ងៃ៖
ស្តាប់ - ០៥:០២
ដោយមើលឃើញពីកំណើនអគ្គីភ័យចេះតែកើនឡើងពីមួយថ្ងៃទៅមួយថ្ងៃ ហើយលទ្ធភាពសង្គ្រោះតាមរយៈរថយន្តពន្លត់អគ្គីភ័យនៅមានការខ្វះខាត ថ្មីៗនេះរដ្ឋាភិបាលបានទិញរថយន្តពន្លត់ អគ្គីភ័យជាច្រើនគ្រឿងពីប្រទេសចិន ដើម្បីបង្កើនកិច្ចអន្តរាគមន៍ពន្លត់ភ្លើង ដែលមានវិសាលភាពកាន់តែច្រើនទៅៗនៅទូទាំងប្រទេស។ ក៏ប៉ុន្តែជាការកត់សម្គាល់ ការចូលរួមពីប្រជាពលរដ្ឋ ការកែលម្អហេដ្ឋារចនាសម្ព័ន្ធ និងការប្រុងប្រយ័ត្នជាមុន ជាប្រសិទ្ធភាពបឋម មុននឹងជំនួយអន្តរាគមន៍ពីរថយន្តអគ្គីភ័យ។
ការមកដល់នៃរថយន្តពន្លត់អគ្គីភ័យដ៏ច្រើនមិនធ្លាប់មានកាលពីដើមសប្តាហ៍នេះ ជាសញ្ញាមួយបង្ហាញថាអគ្គីភ័យនៅក្នុងប្រទេសកម្ពុជាកំពុងតែស្ថិតនៅជាបញ្ហាប្រឈមកាន់តែខ្លាំងទៅៗ ពីមួយថ្ងៃទៅមួយថ្ងៃ។ គេអាចនិយាយបានថាបញ្ហានេះធ្ងន់ធ្ងរ ដោយសារតែគ្រោះភ្លើងឆេះនេះ បានកើតមានមិនសូវលោះថ្ងៃ ពិសេសចាប់តាំងពីមានអាកាសធាតុក្តៅខ្លាំងនៃចុងរដូវប្រាំង និងដើមរដូវវស្សានេះ។
វត្តមាននៃរថយន្តពន្លត់អគ្គីភ័យ ដែលមានព័ណ៌ក្រហមច្រាលផលិតនៅប្រទេសចិនដូចនេះ ក៏បង្ហាញពីអត្ថន័យមួយទៀតដែរថា ជាការយកចិត្តទុកដាក់របស់រដ្ឋដល់បញ្ហាសុវត្ថិភាពរបស់ប្រជាពលរដ្ឋ ដែលកំពុងប្រឈមនឹងគ្រោះអគ្គីភ័យដ៏វិនាសហិនហោចនេះ។ កាលពីថ្ងៃទី១៧ឧសភាថ្មីៗនេះ រដ្ឋាភិបាលបានចំណាយថវិកាប្រមាណជា១០លានដុល្លារ ដើម្បីនាំយករថយន្តពន្លត់អគ្គីភ័យម៉ាក ISUZU ផលិតនៅប្រទេសចិនចំនួន១១៣គ្រឿង មកប្រើប្រាស់ដើម្បីឆ្លើយតបទៅនឹងតម្រូវការចាំបាច់ ដោយមានការបែងចែកទៅតាមតំបន់មួយចំនួនទាំង២៥ខេត្ត-រាជធានី។
បរិមាណឡានទឹកដែលទិញពីប្រទេសចិនដ៏ច្រើនសន្ធឹកនៅពេលនេះ បានធ្វើឲ្យកំណើនរថយន្តពន្លត់អគ្គីភ័យនៅក្នុងប្រទេសមួយ ដែលមានប្រជាពលរដ្ឋប្រមាណជា១៥លាននាក់ កើនដល់ជាង២៤០គ្រឿង នៅទូទាំងប្រទេស។ នៅក្នុងនោះក៏មានរថយន្តមួយចំនួនដែលចាស់ៗ ខូចប្រើលែងកើត។
ទោះយ៉ាងនេះក្តី បរិមាណរថយន្តពន្លត់អគ្គីភ័យប៉ុណ្ណេះ នៅតិចតួចនៅឡើយ បើធៀបទៅនឹងស្ថានភាពប្រជាសាស្ត្រ និងស្ថានភាពភូមិសាស្ត្រប្រទេសកម្ពុជា ដែលមានផ្ទៃដី១៨១ ០៣៥គីឡូម៉ែត្រក្រឡា។
ជាការពិតមានរថយន្តពន្លត់អគ្គីភ័យ គឺជារឿងល្អមួយ ដែលបង្ហាញពីវិសាលភាពធំធេងនៃការយកចិត្តទុកដាក់លើកង្វល់របស់ប្រជាពលរដ្ឋ ដែលស្ថានភាពរស់នៅសព្វថ្ងៃរបស់គាត់ប្រឈមនឹងបញ្ហាភ្លើងផ្សែងនេះដែរ។ ក៏ប៉ុន្តែវាមិនគ្រប់គ្រាន់ទេការ ដែលមានរថយន្តអគ្គីភ័យច្រើន។ ការចូលរួមពីប្រជាពលរដ្ឋ និងការកែលម្អស្ថានភាពរស់នៅរបស់ពួកគាត់ គឺជាកត្តាចាំបាច់មួយផងដែរ។ ចាំបាច់ដោយសារ អគ្គីភ័យមួយចំនួន បង្កឡើងដោយការធ្វេសប្រហែស និងមិនយកចិត្តទុកដាក់ចំពោះបញ្ហាមហន្តរាយដ៏ខ្ទេចខ្ទាំមួយនេះ។
ជាក់ស្តែងការបង្ការទុកជាមុនរបស់ប្រជាជន តាមផ្ទះនីមួយៗមានតិចតួចជាពិសេសការប្រើប្រាស់បំពង់ពន្លត់អគ្គីភ័យ ដែលអាចជួយពន្លត់ភ្លើងបឋមមុននឹងរថយន្តពន្លត់អគ្គីភ័យទៅដល់។ ការប្រើប្រាស់ភ្លើងចង្ក្រាន ភ្លើងទៀន ធូប និងប្រព័ន្ធភ្លើងអគ្គិសនី មិនមានការប្រុងប្រយ័ត្ន។ ប្រព័ន្ធភ្លើងអគ្គិសនីចាស់ៗ និងមិនមានលក្ខណៈបច្ចេកទេសត្រឹមត្រូវជាមូលហេតុបង្កឲ្យមានការឆ្លងចរន្ត ដែលចំណុចនេះជាទូទៅបានបង្ហាញពីតួលេខខ្ពស់នៅក្នុងរបាយការណ៍របស់ប៉ូលិស។
មួយវិញទៀត ស្ថានភាពនគររូបនីយកម្មនិងសំណង់បច្ចុប្បន្ន មានសភាពស្មុគ្រស្មាញ។ ស្មុគ្រស្មាញដោយសារកន្លងមក អាជ្ញាធរបានបណ្តោយឲ្យមានការសាងសង់ ស្រេចតែចិត្ត ដោយមិនយល់ និងមិនគោរពតាមប្លង់ស្ថាបត្យកម្មអ្វីទាំងអស់។ ស្ថានភាពផ្លូវលំនីមួយៗ មានសភាពតូចចង្អៀត មិនអំណោយផលដល់រថយន្តពន្លត់អគ្គីភ័យចូលទៅបាញ់ពន្លត់ភ្លើងបានដោយស្រួលនៅពេលមានអគ្គីភ័យកើតឡើងម្តងៗ។
ទាំងនេះសុទ្ធសឹងជាបញ្ហា ដែលចាំបាច់ត្រូវមានការដោះស្រាយ និងកែលម្អឡើងវិញ ជាពិសេសនៅរាជធានីភ្នំពេញ ដែលជាបេះដូងសេដ្ឋកិច្ច នយោបាយ និងវប្បធម៌របស់ប្រទេស។ បើពុំនោះទេទាំងពេលនេះ និងទៅអនាគត គេនឹងឮតែសម្លេងស៊េរ៉ែនឡានទឹក ភ្លើងផ្សែង និងសោកនាដកម្ម ដែលបណ្តាលមកពីអគ្គីភ័យ ហើយរថយន្តពន្លត់អគ្គីភ័យមិនមានលទ្ធភាពអាចជួយសង្គ្រោះបានទាន់ពេលវេលាគ្រប់តែករណីនោះទេ។
មួយវិញទៀត នៅតាមបណ្តាខេត្ត ក៏មានបញ្ហាដោយឡែកៗតាមតំបន់ដែរ ដោយសារថវិកាមានកំណត់ ចំនួនរថយន្តពន្លត់អគ្គីភ័យ ដែលបានបែងចែកទៅតាមខេត្តនីមួយៗបានតិចតួច ពិតជាមិនអាចឆ្លើយតបនឹងការជួយសង្គ្រោះដល់អគ្គីភ័យនៅតាមតំបន់ដាច់ស្រយាលបានទេ។ ហេតុដូច្នេះ មានតែការចូលរួមប្រុងប្រយ័ត្ន និងបង្ការជាមុនពីសំណាក់ប្រជាពលរដ្ឋទេ ដែលអាចជួយទប់ស្កាត់ការបាត់បង់បណ្តាលមកពីភ្លើងផ្សែងនេះបាន។
ដោយឡែករថយន្តពន្លត់អគ្គីភ័យ គ្រាន់តែដើរតួនាទីត្រឹមតែអន្តរាគមន៍ទៅតាមលទ្ធភាព ប៉ុណ្ណោះ ឬក៏ជួយមិនឲ្យភ្លើងឆេះរាលដាលពីផ្ទះមួយទៅផ្ទះមួយ ពោលគឺមិនអាចទប់ស្កាត់ទាំងស្រុងមិនឲ្យភ្លើងឆេះបានទេ ដោយសារតែពេលខ្លះទំរាំរថយន្តអគ្គីភ័យទៅដល់ភ្លើងឆេះពេញទំហឹង ឬក៏ផ្ទះខ្លះជាផ្ទះឈើ ត្រូវភ្លើងឆេះរាបដល់ដីក៏មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ