ស្តូបរំលឹកវិញ្ញាណក្ខន្ធជនរងគ្រោះក្នុងរបបខ្មែរក្រហម មានលើកដំបូងគេ នៅទឹកដីបរទេស
ចុះផ្សាយនៅថ្ងៃ៖
ស្តាប់ - ០៧:៤៥
ស្តូបរំលឹកវិញ្ញាណក្ខន្ធ ជនរងគ្រោះដោយឧក្រិដ្ឋកម្មប្រឆាំងមនុស្សជាតិ នៅក្នុងរបបខ្មែរក្រហមត្រូវបានដាក់សម្ពោធ ជាផ្លូវការ នៅទីក្រុងប៉ារីស ប្រទេសបារាំង នៅថ្ងៃ ទី ១៧មេសា ២០១៨។ ស្តូបរំលឹកនឹកដល់ជនរងគ្រោះក្នុងរបបខ្មែរក្រហម ត្រូវបើកសម្ពោធ នៅថ្ងៃទី ១៧មេសា ថ្ងៃដែលកាលពី៤៣ឆ្នាំ ពួកខ្មែរក្រហមបានចូលកាន់កាប់ក្រុងភ្នំពេញ និងបើកទំព័រខ្មៅងងឹត នៅប្រទេសកម្ពុជា។
ពិធីបើកសម្ពោធស្តូបរំលឹកវិញ្ញាណក្ខន្ធជនរងគ្រោះ នៅក្នុងសម័យខ្មែរក្រហម បានធ្វើឡើងនៅឧទ្យាន សួនច្បារ Parc de Choisy នៅក្នុងសង្កាត់ទី១៣ ដែលសំបូររស់នៅដោយជនជាតិ ខ្មែរ ឬជនជាតិអាស៊ីជាទូទៅ។ ពិធីបើកសម្ពោធមានការចូលរួមជាអធិបតីរបស់លោកស្រីចៅហ្វាយក្រុងប៉ារីសAnne Hidalgo លោកតាន់ ប៊ុនហុង អ្នកតំណាងរាស្រ្តក្រុងប៉ារីស។ សមាគមតំណាងជនរងគ្រោះ ដូចជា AVCKR សមាគមខេមរា មកពីប្រទេសកណាដា និងជនជាតិខ្មែរច្រើនជាង១០០នាក់បានចូលរួម នៅក្នុងពិធីសម្ពោធស្តូបរំលឹកវិញ្ញាណក្ខន្ធជនរងគ្រោះខ្មែរជាង២លាននាក់ ដែលបានស្លាប់បាត់បង់ជីវិតនៅក្នុងរបបខ្មែរក្រហម។
គម្រោងការដាក់តាំង ស្តូបរំលឹកវិញ្ញាណក្ខន្ធជនរងគ្រោះ ក្នុងរបបខ្មែរក្រហម នៅទីក្រុងប៉ារីសកើតចេញមក ពីគំនិតផ្តួចផ្តើមរបស់សមាគមHaut conseil des asiàtiques de France (HCAF) ដែលមានលោកប៊ុនតាន់ អ្នកតំណាងប៉ារីសធ្លាប់ជាប្រធាន។ លោកប៊ុនតាន់បាននិយាយថា ៖ “ការសម្ពោធស្តូបរំលឹកវិញ្ញាណក្ខន្ធ នៅថ្ងៃនេះ មិនមែនជាការសម្រេចជោគជ័យចុងបញ្ចប់នោះទេ ប៉ុន្តែ គ្រាន់តែជាការចាប់ផ្តើមនៃការគោរពកាន់ទុក្ខរបស់អ្នកដែលមានសមាជិកគ្រួសារស្លាប់នៅក្នុងរបបខ្មែរក្រហម។ គ្រួសាររបស់ជនរងគ្រោះក្នុងជំនាន់ខ្មែរក្រហមជាច្រើនបាននិយាយប្រាប់ខ្ញុំថា មុននឹងអាចផ្លាស់ប្តូរទំព័រចាប់ផ្តើមជីវិតថ្មី ពួកគេត្រូវការ ចាំបាច់ ទីកន្លែង ស្តូបសម្រាប់រំលឹកវិញ្ញាណក្ខន្ធសាច់ញាតិ របស់ពួកគេដែលបានសម្លាប់ក្នុងរបបប្រល័យពូជសាសន៍ខ្មែរក្រហម។ ស្តូបរំលឹកវិញ្ញាណក្ខន្ធនៅថ្ងៃនេះ សំខាន់ផងដែរសម្រាប់យុវជនជំនាន់ក្រោយដែលកើតនៅស្រុកបារាំង។ ពួកគេជាច្រើនមិនបានដឹងពីជីវិតហែលឆ្លងរបស់ឪពុកម្តាយពីមុនមកទេ។ សម្រាប់ពួកយុវជនជំនាន់ក្រោយ វាចាំបាច់ណាស់ដែលពួកគេត្រូវដឹងលឺរឿងរ៉ាវដែលធ្លាប់កើតមាននៅប្រទេសកម្ពុជា។ នៅពេលដែលដឹងរឿងប្រវត្តិសាស្រ្តទាំងនោះ យុវជនក្មេងជំនាន់ក្រោយច្បាស់ជានឹងខំប្រឹងទាញយកប្រយោជន៍ពីជីវិត ព្រោះគេដឹងថា គេមានសំណាងណាស់ដែលបានកើតរស់នៅក្នុងប្រទេសមួយដែលបានផ្តល់សេរីភាពពេញលេញដល់ពួកគេ។”។
តាម HCAF ដោយមានស្តូប នៅឧទ្យានParc de Choisy ក្នុងក្រុងប៉ារីស ប្រទេសបារាំង ប្រទេស លើកដំបូងគេក្នុងពិភពលោក ដែលមានស្តូបរំលឹកដល់វិញ្ញាណក្ខន្ធ ជនរងគ្រោះក្នុងរបបខ្មែរក្រហម ក្នុងទឹកដី បរទេស។ នៅលើស្តូប ដែលធ្វើពីកញ្ចក់ កំពស់ ១ម៉ែត្រ ៧៥សង់ទីម៉ែត្រ គេមានសរសេរអក្សរ នៅពីក្រោមរូបគំនូរដែលស្តែងពីការជម្លៀសប្រជាជនខ្មែរថា ឧទ្ទិសដល់វិញ្ញាណក្ខន្ធជនរងគ្រោះ ទាំងអស់ ដោយឧក្រិដ្ឋកម្មប្រឆាំងមនុស្សជាតិនៅកម្ពុជា ក្នុងរបបខ្មែរក្រហម ១៩៧៥ ១៩៧៩។
សម្រាប់លោកស្រីAnne Hidalgo ចៅហ្វាយក្រុងប៉ារីស ក្រុងប៉ារីស ជាថ្នាំបន្សាបសម្រាប់ប្រយុទ្ធប្រឆាំងនឹងការរំលោភ សិទ្ធិមនុស្ស។ ក្រុងប៉ារីសនៅឈរជាប់ជានិច្ចជាមួយ ក្រុមជនរងគ្រោះ នៃការសម្លាប់ព្រៃផ្សៃ។ “ស្តូបសម្រាប់រំលឹកវិញ្ញាណក្ខន្ធ។ ស្តូបសម្រាប់ជួយឲ្យគេនឹកគិតទៅការសម្លាប់ព្រៃផ្សៃ ប៉ុន្តែ ជាមួយគ្នានោះស្តូបនេះក៏ជាការធានាបញ្ជាក់ពីការបើកទ្វារសម្រាប់ទទួលអនាគត។ ខ្ញុំមិនអាចនិយាយប្រាប់អ្នកអស់ពីមោទនភាពរបស់ខ្ញុំនោះទេ។ ក្នុងនាមជាចៅហ្វាយក្រុងប៉ារីស ខ្ញុំសប្បាយចិត្តណាស់ដែល ស្តូបរំលឹកដល់ជនរងគ្រោះ ត្រូវតំកល់នៅក្រុងប៉ារីស។ ពីពេលនេះតទៅយើងនឹងធ្វើការ គ្រប់បែយ៉ាងសម្រាប់យុវជនជំនាន់ក្រោយ។ យើងនឹងនៅចងចាំ ថែរក្សា ស្តូបរំលឹកវិញ្ញាណក្ខន្ធនេះ ជាប់ជានិច្ច ដើម្បីធ្វើយ៉ាងណាទប់ស្កាត់កុំឲ្យតម្លៃ ជីវិតរបស់មនុស្សត្រូវគេជាន់ឈ្លី សាជាថ្មី។” នេះជាប្រសាសន៍របស់លោកស្រីចៅហ្វាយក្រុងប៉ារីស។
សម្រាប់ប្រជាជនខ្មែរនៅ បរទេស ស្តូបរំលឹកវិញ្ញាណក្ខន្ធសំខាន់ណាស់សម្រាប់ការចងចាំ និងជាពិសេសសម្រាប់ការផ្ទេររឿងរ៉ាវប្រវត្តិសាស្រ្តដល់ក្មេងជំនាន់ក្រោយ ដែលធំដឹងក្តីនៅឆ្ងាយប្រទេសកំណើតរបស់ឪពុកម្តាយ។ ស្តូបរំលឹកវិញ្ញាណក្ខន្ធជនរងគ្រោះ ខ្មែរ អាចកើតមាននៅថ្ងៃនេះ ក៏ដោយសារការតស៊ូ ជំរុញផងដែររបស់សមាគមជនរងគ្រោះក្នុងរបបប្រល័យពូជសាសន៍ខ្មែរក្រហម ក្នុងប្រទេសបារាំង ហៅកាត់ថា AVGKR។
នៅក្នុងពិធីសម្ពោធនៅព្រឹកមិញនេះ ក្រៅតែពីជនជាតិខ្មែរនៅស្រុកបារាំង មានផងដែរ ប្រជាជនខ្មែរមកពីប្រទេសផ្សេងទៀត ដូចជាកាណាដាជាដើម។ សម្រាប់លោកស្រី យីម ណុលស៊ីណា ប្រធានមជ្ឈមណ្ឌលខេមរ៉ា ដែលបានតស៊ូឲ្យមានការទទួលស្គាល់សិទ្ធិជនរងគ្រោះខ្មែរក្រហមក្នុងប្រទេសកាណាដា វាមានសារៈសំខាន់ណាស់ដែល គេត្រូវមានស្តូប រំលឹកវិញ្ញាណក្ខន្ធជនរងគ្រោះក្នុងរបបខ្មែរក្រហម នៅក្នុងទឹកដីបរទេស
នៅក្រោយពិធីសម្ពោធ ស្តូប សន្និសីទជុំវិញប្រធានបទខ្មែរក្រហមត្រូវបានបើកធ្វើ នៅសាលាក្រុងទី១៣ ដែលនៅក្នុងនោះ មានការចូលរួមពីអ្នកនិពន្ធ អ្នកផលិតកុន ខ្មែរ អ្នកច្បាប់ ចៅក្រម មេធាវី បារាំងដែលធ្លាប់បានចូលរួមនៅក្នុងតុលាការកាត់ទោសខ្មែរក្រហម ក្នុងក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ