អូស្ត្រាលីអនុម័តច្បាប់ ដើម្បី ទប់ស្កាត់ទេសចរណ៍ នៅមណ្ឌលកុមារកំព្រា
អូស្រា្តលីបានចាត់វិធានការ ប្រយុទ្ធប្រឆាំង នឹងការជួញដូរកុមារ នៅតាមមជ្ឈមណ្ឌលកុមារកំព្រា។ នៅថ្ងៃព្រហស្បតិ៍ ម្សិលមិញ ច្បាប់មួយដែលមានឈ្មោះថា ទាសភាពសម័យទំនើប ត្រូវបានសភាអូស្ត្រាលីបោះឆ្នោត អនុម័ត ក្នុងគោលដៅ ទប់ស្កាត់ ការជួញដូរ និងកេងប្រវ័ញ្ចកុមារ នៅមជ្ឈមណ្ឌលកុមារ កំព្រា។ អូស្ត្រាលី ជាប្រទេសទី១ លើលោក ដែល បង្កើតច្បាប់ស្តីពីការជួញដូរកុមារ កំព្រា។
ចុះផ្សាយនៅថ្ងៃ៖
ស្តាប់ - ០២:២៧
ទើបមានជាលើកទី១លើ លោក ច្បាប់ថ្មីរបស់អូស្រា្តលី បានចាត់ទុក ការបន្លំ បញ្ចូលកុមារឲ្យទៅរស់នៅក្នុងមជ្ឈមណ្ឌលកុមារកំព្រា ថា ជាសកម្មភាពឧក្រិដ្ឋ។ ច្បាប់ថ្មីដែលសភាអូស្ត្រាលីបានបោះឆ្នោតអនុម័តនៅថ្ងៃម្សិលមិញ បានសំដៅចាត់ទុកផងដែរ ការជួញដូរកុមារ នៅតាមមណ្ឌលកុមារកំព្រា ជាប្រភេទទាសភាពសម័យទំនើប។
ច្បាប់ថ្មីរបស់អូស្ត្រាលីត្រូវបានបង្កើតឡើង បន្ទាប់ពីការសិក្សាជាច្រើនបានព្រមានពីការកើនឡើង នៃការបន្លំ កេងប្រវ័ញ្ចលើកុមារ នៅក្នុងប្រទេសក្រីក្រ ដោយសារតែទេសចរណ៍ កុមារកំព្រា។ ជារួម ច្បាប់ថ្មីបស់អូស្ត្រាលី មានគោលដៅ ទប់ស្កាត់ ទេសចរណ៍ នៅតាមមជ្ឈមណ្ឌលកុមារកំព្រារនៅបរទេស។
របាយការណ៍របស់ទីភ្នាក់ងារ ដែលមានឈ្មោះថា គិតឡើងវិញ ពីមជ្ឈមណ្ឌលកុមារកំព្រា បានបង្ហាញថា សកលវិទ្យាល័យ អូស្ត្រាលី ប្រមាណ ៥៧ភាគរយ បានផ្សព្វផ្សាយលើកទឹកចិត្តឲ្យគេ ធ្វើយុទ្ធនាការ ស្វែងរកថវិការ ជួយ កុមារកំព្រា ឬទៅធ្វើការស័្មគ្រចិត្ត នៅតាមមណ្ឌលកុមារកំព្រា នៅក្នុងប្រទេសក្រីក្រ។ សមាជិកព្រឹទ្ធសភាអូស្ត្រាលី លោកស្រី Linda Reynolds ធ្លាប់បាននិយាយថា សកម្មភាពបំផុសបំផុលឲ្យមានទេសចរណ៍ នៅតាមមណ្ឌលកុមារកំព្រា នៅបរទេស បានបង្កើត បញ្ហា ច្រើនជាងការជួយ ព្រោះថា ជំនួយរបស់អ្នកស្ម័គ្រចិត្ត មានប្រសិទ្ធិភាពតែមួយភ្លែត ប៉ុន្តែ ផ្ទុយទៅវិញ បានបង្កជាផលវិបាកយូរអង្វែង។
គេបានវាយតម្លៃថា ៨០ភាគរយនៃកុមារកំព្រា ដែលរស់នៅតាមមជ្ឈមណ្ឌលកុមារកំព្រាក្នុងពិភពលោក មានយ៉ាងហោចណាស់ ឪពុក ឬម្តាយ ដែលនៅរស់មានជីវិត។ ប៉ុន្តែ ពួកគេត្រូវបានបញ្ជូនឲ្យទៅរស់នៅតាមមណ្ឌលកុមារកំព្រា ដោយសារគ្រួសារសង្ឃឹមថា ពួកគេនឹងអាចទទួលអាហារគ្រប់គ្រាន់ ការសិក្សាអប់រំដោយមិនគិតថ្លៃ។ ប៉ុន្តែ នៅក្នុងការពិតជាក់ស្តែង កុមារនៅតាមមណ្ឌលកុមារកំព្រា ដូចជានៅតាមប្រទេសនេប៉ាល់ ឬកម្ពុជាជាដើម ត្រូវបានគេប្រើ ដើម្បីជាប្រភពអូសទាញថវិកាជំនួយ ដែលភាគច្រើនធ្លាក់ទៅក្នុងហោប៉ៅរបស់ប្រធានសមាគម ឬមណ្ឌលកុមារកំព្រា។
ថ្មីៗនេះ ក្រសួងការបរទេសអាមេរិក ធ្លាប់បានអះអាងថា កុមារកំព្រាជាច្រើនត្រូវបានគេបង្ខំឲ្យរាំ ច្រើនជាងបានទទួលការសិក្សា ពោលគឺដើម្បីទាក់ទាញម្ចាស់ជំនួយ។ សកម្មជនការពារសិទ្ធិកុមារ សង្ឃឹមថា ជាមួយនឹងច្បាប់ថ្មី នេះ ប្រទេសដទៃទៀត នឹងយកគំរូតាមអូស្ត្រាលី ដើម្បី កាត់បន្ថយ ទេសចរណ៍ នៅតាមមណ្ឌលកុមារកំព្រា ដែលជាប្រភពមួយ នៃការកើនឡើង នៃការជួញដូរកុមារកំព្រា ក្នុងពិភពលោក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ