កម្លាំងប៉េអឹម៦១២នាក់ ចូលរួមក្នុងប្រតិបត្តិការលុបបំបាត់អាជីវកម្មរ៉ែខុសច្បាប់ទូទាំងប្រទេស
ក្រសួងរ៉ែ និងថាមពល បានចាប់ផ្តើមបើកប្រតិបត្តិការលុបបំបាត់អាជីវកម្មរ៉ែខុសច្បាប់នៅក្នុងក្របខណ្ឌទូទាំងប្រទេស។ ប្រតិបត្តិការនេះ នឹងប្រើកម្លាំងកងរាជអាវុធហត្ថលើផ្ទៃប្រទេស (PM) ៦១២នាក់ ដោយចាប់ដៃជាមួយកម្លាំង ប៉ូលីស ទាហាន និងស្ថាប័នតុលាការជាច្រើនទៀត។ ប្រតិបត្តិការនេះ នឹងបញ្ចប់នៅត្រឹមដំណាច់ត្រីមាសទី១នៃឆ្នាំ២០១៥។
ចុះផ្សាយនៅថ្ងៃ៖
ស្តាប់ - ០២:២៨
អ្នកនាំពាក្យកងរាជអាវុធហត្ថលើផ្ទៃប្រទេស លោកខេង ទីតូ បានប្រកាសថា ចាប់ពីថ្ងៃទី៥មីនាឆ្នាំ២០១៥នេះ កងរាជអាវុធហត្ថលើផ្ទៃប្រទេស (PM)នឹងបញ្ជូនកងកម្លាំងរបស់ខ្លួនប្រដាប់ដោយអាវុធគ្រប់ដៃចំនួន៦១២នាក់ ដើម្បីពង្រឹងការអនុវត្តច្បាប់លុបបំបាត់ការជីករ៉ែ អនាធិបតេយ្យ គ្រប់ប្រភេទនៅទូទាំងប្រទេស។ នៅក្នុងប្រតិបត្តិការនេះ កម្លាំងប៉េអ៊ឹម (PM) ទាំង៦១២នាក់ នឹងចាប់ដៃសហការជាមួយកម្លាំងប៉ូលីស ទាហាន ក្រសួងរ៉ែនិងថាមពល និងស្ថាប័នតុលាការផងដែរ ដោយធ្វើការចុះទៅត្រួតពិនិត្យដោយផ្ទាល់នៅគ្រប់ខេត្តក្រុងទាំងអស់ ពីសកម្មភាពនៃការជីក និងធ្វើអាជីវកម្មរ៉ែនៅក្នុងក្របខណ្ឌទូទាំងប្រទេស។
យោងតាមសេចក្តីសម្រេចមួយ កាលពីថ្ងៃទី៨ ខែមករា ឆ្នាំ២០១៥ លោកស៊ុយ សែម រដ្ឋមន្ត្រីក្រសួងរ៉ែ និងថាមពល បានសម្រេចបង្កើតក្រុមការងារចំនួនបី ដើម្បីចុះត្រួតពិនិត្យ និងធ្វើអធិការកិច្ច លើសកម្មភាពសិក្សាស្រាវជ្រាវ និងធ្វើអាជីវកម្មរ៉ែ និងរ៉ែសំណង់គ្រប់ប្រភេទ ក្នុងនោះ ក្រុមទី១ ដឹកនាំដោយលោក ម៉េង សក្តិធារ៉ា រដ្ឋលេខាធិការក្រសួងរ៉ែនិងថាមពល ដែលចុះទៅកាន់ខេត្តកំពង់ចាម ខេត្តត្បូងឃ្មុំ មណ្ឌលគីរី រតនគីរី ក្រចេះ និងខេត្តស្ទឹងត្រែង។ ក្រុមទី២ ដឹកនាំដោយលោក ហូ វិចិត្រ ចុះទៅកាន់ខេត្តកំពង់ធំ ព្រះវិហារ សៀមរាប ឧត្តរមានជ័យ បន្ទាយមានជ័យ ប៉ៃលិន បាត់ដំបង ពោធិ៍សាត់ និងខេត្តកំពង់ឆ្នាំង ហើយក្រុមទី៣ ដឹកនាំដោយលោក ឌិត ទីណា ចុះទៅកាន់ខេត្តកំពង់ស្ពឺ កំពត កែប កោះកុង តាកែវ ស្វាយរៀង ព្រៃវែង ខេត្តកណ្តាល និងរាជធានីភ្នំពេញ។ ក្រុមការងារទាំងបី ត្រូវបញ្ចប់ការងាររបស់ខ្លួន អោយបានមុនដំណាច់ត្រីមាសទី១នៃឆ្នាំ២០១៥ ដោយធ្វើរបាយការណ៍សរុបជូនក្រសួងពិនិត្យ និងវាយតម្លៃការងារបច្ចេកទេស ការការពារបរិស្ថាន និងភាពអនុលោមទាំងឡាយផ្សេងទៀត ដើម្បីសម្រេចចាត់វិធានការបន្ត។
ក្រសួងរ៉ែនិងថាមពលបានចាត់ទុកថា ប្រតិបត្តិការនេះ គឺយោងទៅតាមភាពចាំបាច់របស់ក្រសួងហើយថា ការអភិវឌ្ឍន៍ធនធានរ៉ែប្រកបដោយចេរភាព ជាកក្តាដ៏ចាំបាច់ដើម្បីចៀសវាងការខាតបង់ដល់ផលប្រយោជន៍ជាតិ និងប្រជាពលរដ្ឋ។
គួរជំរាបជូនថា មុនពេលមានប្រតិបត្តិការនេះ ប្រមាណជាពីរបីខែមុន រូបភាពជាច្រើនសន្លឹកស្តីពីការធ្វើអាជីវកម្មរ៉ែយ៉ាងអនាធិបតេយ្យបានកើតឡើងនៅក្នុងព្រៃចំការកៅស៊ូ ខេត្តរតនគីរី ដែលបង្ករឡើងដោយជនជាតិវៀតណាម ត្រូវបានគេបង្ហោះនៅលើទំព័រFacebook ដែលនាំអោយមានការរិះគន់យ៉ាងខ្លាំង។ ចំណាត់ការបឋមក៍ត្រូវបានធ្វើឡើងផងដែរ ប៉ុន្តែប្រតិបត្តិការជាទ្រង់ទ្រាយធំបែបនេះ ទើបតែធ្វើឡើងជាលើកទី១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ