ធនាគារអភិវឌ្ឍន៍អាស៊ីគាំទ្រតួនាទីយុវជននៅក្នុងមហាអនុតំបន់ទន្លេមេគង្គ
ដំណើរទស្សនកិច្ចសិក្សារយៈពេលមួយសប្តាហ៍របស់យុវជន៣៦នាក់ មកពីបណ្តាប្រទេសជាប់ទន្លេមេគង្គ ក្នុងនោះមានពលរដ្ឋខ្មែរ៦នាក់ផងដែរ ត្រូវបានរៀបចំឡើង ដោយធនាគារអភិវឌ្ឍន៍អាស៊ី។ យុវជនទាំងនេះនឹងបញ្ជូនសាររបស់ខ្លួនទៅកាន់កិច្ចប្រជុំកំពូលលើកទី៥ នៃប្រទេសក្នុងមហាអនុតំបន់ទន្លេមេគង្គ ដែលនឹងធ្វើឯទីក្រុងបាងកក នាសប្ដាហ៍ក្រោយ។ អេឌីប៊ី (ADB) ដែលប្រកាសអំពីរឿងនេះកាលពីម្សិលមិញ អះអាងថា ខ្លួនគាំទ្រគំនិតផ្តួចផ្តើមនានាដើម្បីលើកកម្ពស់តួនាទីយុវជននៅក្នុងតំបន់នេះ។
ចុះផ្សាយនៅថ្ងៃ៖
ស្តាប់ - ០២:១៤
យុវជនខ្មែរ៦នាក់ រួមជាមួយយុវជន៣០នាក់ផ្សេងទៀត ដែលមកពីបណ្តាប្រទេសជាប់ទន្លេមេគង្គ៥ទៀត កំពុងចូលរួមក្នុងដំណើរទស្សនកិច្ចសិក្សាក្នុងមហាអនុតំបន់ទន្លេមេគង្គ នៅសប្តាហ៍នេះ។ ពួកគេត្រូវធ្វើដំណើរពេញមួយសប្តាហ៍ពីក្រុង ជីងហុង (Jinghong) នៃប្រទេសចិន ដោយឆ្លងកាត់ប្រទេសឡាវ ប្រទេសភូមា ប្រទេសវៀតណាម និងប្រទេសកម្ពុជា ឆ្ពោះទៅរាជធានីបាងកករបស់ថៃ។ គឺនៅទីនោះហើយនៅថ្ងៃទី២០ ខែធ្នូ ដែលពួកគេត្រូវផ្តល់សាររបស់ខ្លួន ទៅឱ្យរដ្ឋមន្ត្រីនៃប្រទេសក្នុងមហាអនុតំបន់ទន្លេមេគង្គ ដែលមកប្រជុំកំពូលចាប់ពីថ្ងៃទី១៩ ដល់ថ្ងៃ២០ ខែធ្នូ។
«ដំណើរទស្សនកិច្ចនេះជាវេទិកាមួយសម្រាប់អ្នកចូលរួម ក្នុងការបង្កើតសារដែលពួកគេប៉ងបញ្ជូនទៅកាន់កិច្ចប្រជុំកំពូលនៃមហាអនុតំបន់ទន្លេមេគង្គ»។ នេះបើយោងតាមអ្នកស្រី ឡេនី ថូម៉ាស (Lainie Thomas) អ្នកឯកទេសខាងសង្គមស៊ីវិលធនាគាអភិវឌ្ឍន៍អាស៊ី ដែលបន្តថា៖ «ខ្លឹមសារនៃសារនោះគឺអាស្រ័យលើការយល់ឃើញរបស់ពួកគេផ្ទាល់ ប៉ុន្តែវាទំនងជាគូសបញ្ជាក់អំពីសារសំខាន់នៃការទទួលស្គាល់ការចូលរួមរបស់យុវជន ចំពោះអនាគតនៃមហាអនុតំបន់ទន្លេមេគង្គ ក៏ដូចជាអំពីបញ្ហាលំបាកទាំងឡាយ ដែលពួកគេប្រឈមមុខ ក្នុងការចូលរួមនោះ»។
ដំណើរនេះអនុញ្ញាតឱ្យយុវជនទាំង៣៦នាក់នោះសិក្សាបន្ថែមទៀតអំពីកម្មវិធីសហប្រតិបត្តិការសេដ្ឋកិច្ចក្នុងមហាអនុតំបន់ទន្លេមេគង្គ សមិទ្ធិផលដែលកម្មវិធីនេះបានសម្រេច និងបញ្ហាប្រឈមរបស់វា។ ទស្សនកិច្ចនេះក៏ជួយអ្នកចូលរួមឱ្យយល់អំពីបញ្ហានានាដែលមានឥទ្ធិពលលើយុវជន និងអំពីរបៀបនៃការភ្ជាប់ទំនាក់ទំនងក្នុងតំបន់ដែលអាចលើកស្ទួយការអភិវឌ្ឍន៍។ ដំណើរទស្សនកិច្ចសិក្សារបស់ពួកគេនឹងបញ្ចូលការពិភាក្សាជាមួយអ្នកជំនាញខាងការអភិវឌ្ឍន៍ ឧទ្ទេសបទ និងការសំចតនៅតាមគម្រោងនានាទាក់ទងនឹងថាមពល បរិស្ថាន សុខាភិបាល ការសម្រួលពាណិជ្ជកម្ម ទេសចរណ៍ និងគមនាគមន៍ ដែលអេឌីប៊ី (ADB) ទ្រទ្រង់ផ្នែកហិរញ្ញវត្ថុ។
ធនាគារអភិវឌ្ឍន៍អាស៊ីលើកឡើងថា នេះជា«កិច្ចខិតខំប្រឹងប្រែងដើម្បីរំលេចឱ្យឃើញនូវវិភាគទានរបស់យុវជនចំពោះមហាអនុតំបន់ទន្លេមេគង្គ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ