មន្ត្រីប្រឆាំងអំពើពុករលួយ១០២នាក់រៀនច្បាប់ព្រៃឈើនិងវិធីរឹបអូសវត្ថុតាងបទល្មើសព្រៃឈើ
វគ្គបណ្ដុះបណ្តាលមួយត្រូវបានរៀបចំសម្រាប់មន្ត្រី១០២នាក់របស់អង្គភាពប្រឆាំងអំពើពុករលួយ ដើម្បីឱ្យភ្នាក់ងាររដ្ឋទាំងនេះយល់ដឹងអំពីច្បាប់ស្តីពីព្រៃឈើនិងនីតិវិធីរឹបអូសវត្ថុតាងបទល្មើសព្រៃឈើ។ វគ្គសិក្សាដែលបានចាប់ផ្តើមម្សិលមិញ ត្រូវបញ្ចប់ថ្ងៃនេះ ដោយមានគ្រូឧទ្ទេសមកពីក្រសួងកសិកម្ម រុក្ខាប្រមាញ់និងនេសាទ។ លោកទូច ស៊ុនណារី អគ្គនាយកនៃអគ្គនាយកដ្ឋានរដ្ឋបាលនិងសន្តិសុខនៃអង្គភាពប្រឆាំងអំពើពុករលួយពន្យល់។
ចុះផ្សាយនៅថ្ងៃ៖
ស្តាប់ - ០១:៣០
លោក ទូច ស៊ុនណារី អគ្គនាយកនៃអគ្គនាយកដ្ឋានរដ្ឋបាលនិងសន្តិសុខនៃអង្គភាពប្រឆាំងអំពើពុករលួយ ពន្យល់ដូច្នេះថា៖ «ការបណ្ដុះបណ្តាលនេះគ្រាន់តែជាចំណេះដឹងទេ មិនមែនមានន័យថាមកពិភាក្សាគ្នាដើម្បីជជែកគ្នាអពីអន្តរាគមន៍ទៅវិញទៅមកទេ គឺបណ្ដុះបណ្តាលជាចំណេះដឹងឱ្យយល់អំពីផ្នែកច្បាប់ព្រៃឈើតែប៉ុណ្ណឹងទេ»។
បើតាមអង្គភាពប្រឆាំងអំពើពុករលួយដែលជាអ្នករៀបចំវគ្គបណ្ដុះបណ្តាលរយៈពេល២ថ្ងៃនេះ ការសិក្សាច្បាប់ស្តីពីព្រៃឈើ និងអំពីនីតិវិធីរឹបអូសវត្ថុតាងក្នុងបទល្មើសព្រៃឈើ មានគោលបំណងសំខាន់ពីរដូចខាងក្រោម៖
ទី១គឺបង្ហាញអំពីប្រភេទព្រៃឈើនៅកម្ពុជាដែលមានព្រៃបម្រុកទុកអចិន្ត្រៃយ៍និងព្រៃឯកជន ព្រមទាំងបង្ហាញអំពីការហាមឃាត់ការប្រមូលផល អនុផលព្រៃឈើ ថ្លៃសួយសារ និងបុព្វលាភលើផលនិងអនុផលព្រៃឈើ ក៏ដូចជាវិធានការគ្រប់គ្រងសកម្មភាពព្រៃឈើ រួមទាំងនីតិវិធីដោះស្រាយបទល្មើសព្រៃឈើ និងការអនុវត្តសាលក្រមរបស់តុលាការ។
ទី២គឺបង្ហាញពីការរឹបអូសវត្ថុតាងក្នុងបទល្មើសព្រៃឈើ ដោយអនុលោមតាមច្បាប់ស្តីពីព្រៃឈើ ក្រមនីតិវិធីព្រហ្មទណ្ឌ និងលិខិតបទដ្ឋានគតិយុត្តជាធរមាន។ បើតាមច្បាប់ស្តីពីព្រៃឈើ វត្ថុតាងនៃបទល្មើសព្រៃឈើរួមមានផលអនុផលព្រៃឈើ ផលប្រមាញ់ ដែលជាវត្ថុពិតនៃបទល្មើស សម្ភារៈបរិក្ខារ និងមធ្យោបាយដឹកជញ្ជូនដែលប្រើប្រាស់ក្នុងការប្រព្រឹត្តបទល្មើស។
អង្គភាពប្រឆាំងអំពើពុករលួយបញ្ជាក់ថា ក្នុងខណៈពេលកំពុងដឹកជញ្ជូនផល អនុផលព្រៃឈើល្មើសឬផលប្រមាញ់ល្មើស គេត្រូវចាប់ខ្លួនអ្នកបើកបរមធ្យោបាយដឹកជញ្ជូនដែលគ្មានម្ចាស់នៅជាមួយ ជាបណ្ដោះអាសន្ន ដើម្បីជាប្រយោជន៍ក្នុងការស៊ើបអង្កេតរកជនល្មើសនិងអ្នកសមគំនិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ