តំណាងរាស្ត្របក្សប្រឆាំងស្នើក្រសួងការបរទេសជួយពលករខ្មែរនៅថៃឲ្យបានចូលរួមបោះឆ្នោត
តំណាងរាស្ត្រគណបក្សសង្គ្រោះជាតិ ស្នើឲ្យក្រសួងការបរទេសកម្ពុជា អន្តរាគមន៍ដល់ពលករខ្មែរដែលកំពុងបម្រើការងារនៅប្រទេសថៃ ឲ្យបានចូលរួមបោះឆ្នោតក្រុមប្រឹក្សាឃុំសង្កាត់ នាថ្ងៃទី៤មិថុនាខាងមុខ។ នេះបើតាមលិខិតរបស់ក្រុមអ្នកតំណាងរាស្ត្រ ដែលត្រូវប្រធានរដ្ឋសភា លោក ហេង សំរិន បញ្ជូនទៅកាន់រដ្ឋមន្ដ្រីក្រសួងការបរទេស កាលពីថ្ងៃទី៨ឧសភា។
ចុះផ្សាយនៅថ្ងៃ៖
ស្តាប់ - ០២:២២
លិខិតរបស់ក្រុមអ្នកតំណាងរាស្ត្រគណបក្សសង្គ្រោះជាតិ បានស្រង់សេចក្ដីរាយការណ៍ពីពលករខ្មែរចំណាកស្រុកទៅធ្វើការនៅប្រទេសថៃថា ពួកគាត់កំពុងតែជួបប្រទះបញ្ហាមួយចំនួន ដែលរារាំងមិនឲ្យចូលរួមការបោះឆ្នោតក្រុមប្រឹក្សាឃុំសង្កាត់នាដើមខែក្រោយបាន។ បញ្ហាទាំងនោះរួមមាន៖ ទី១ ការលំបាកក្នុងការសុំច្បាប់ពីថៅកែថៃនៅថ្ងៃបោះឆ្នោត។ ទី២៖ ការបង្កការលំបាកពីសំណាក់អាជ្ញាធរនៅតាមច្រកព្រំដែន។ ទី៣៖ តម្លៃដ៏ថ្លៃនៃទិដ្ឋាការការងារសម្រាប់ពលករ។ និងទី៤៖ គឺបណ្ណការងារពណ៌ស៊ីជម្ពូ ដែលមិនផ្ដល់សិទ្ធិឲ្យពលករចាកចេញពីខេត្តដែលខ្លួនធ្វើការ ដើម្បីត្រឡប់មកចូលរួមការបោះឆ្នោត។
បើតាមក្រុមអ្នកតំណាងរាស្ត្រគណបក្សប្រឆាំង ប្រសិនបើបញ្ហាទាំងអម្បាលម៉ានមិនត្រូវបានដោះស្រាយឲ្យទាន់ពេលវេលាទេ នោះពលករខ្មែរដែលកំពុងតែធ្វើការនៅប្រទេសថៃនឹងត្រូវបាត់បង់សិទ្ធិចូលរួមបោះឆ្នោតក្រុមប្រឹក្សាឃុំសង្កាត់ជាក់ជាពុំខាន។ ជាការបោះឆ្នោតដែលអ្នកតំណាងរាស្ត្រចាត់ទុកថា មានសារៈសំខាន់ណាស់សម្រាប់ប្រជាពលរដ្ឋគ្រប់រូប ដើម្បីកែលម្អប្រទេសជាតិឲ្យកាន់តែល្អប្រសើរ។
ក្នុងន័យនេះ ក្រុមអ្នកតំណាងរាស្ត្របក្សប្រឆាំងចំនួន៤រូប គឺលោកស្រី មួរ សុខហួរ លោក ជីវ កត្តា លោក ឡុង ប៊ុន្នី និងលោក ដាង ចំរើន បានស្នើឲ្យរដ្ឋមន្ដ្រីក្រសួងការបរទេសកម្ពុជា ពិភាក្សាជាមួយសមភាគីថៃ ដើម្បីសំណូមពរទៅកាន់ថៅកែថៃ ឲ្យអនុញ្ញាតច្បាប់ដល់ពលករខ្មែរចំនួន៣ថ្ងៃសម្រាប់ការបោះឆ្នោត។ លើសពីនេះ ក្រុមអ្នកតំណាងរាស្ត្រចង់ឲ្យក្រសួងការបរទេស ណែនាំដល់មន្ដ្រីច្រកព្រំដែន ឲ្យជួយសម្រួលការចូលមកបោះឆ្នោតរបស់ពលករខ្មែរឲ្យបានងាយស្រួលនិងឆាប់រហ័ស។
សូមជម្រាបជូនថា កន្លងមក ក្រុមអ្នកតំណាងរាស្ត្រគណបក្សប្រឆាំង បានបង្ហាញការយកចិត្តទុកដាក់ណាស់ចំពោះសិទ្ធិបោះឆ្នោតរបស់ពលករចំណាកស្រុកនៅក្រៅប្រទេស ជាពិសេសនៅប្រទេសថៃ។ កាលពីឆ្នាំមុន លោកស្រី មួរ សុខហួរ តំណាងរាស្ត្រមណ្ឌលខេត្តបាត់ដំបងកូតាគណបក្សសង្គ្រោះជាតិ ធ្លាប់បានចុះធ្វើយុទ្ធនាការជំរុញដោយផ្ទាល់នៅប្រទេសថៃ ដើម្បីឲ្យពលករខ្មែរត្រឡប់មកចុះឈ្មោះបោះឆ្នោតនៅស្រុកកំណើត។
តួលេខចុងក្រោយរបស់ក្រសួងការងារកម្ពុជាបង្ហាញថា មានពលករខ្មែរយ៉ាងហោចណាស់១លាន៦ម៉ឺននាក់ ដែលកំពុងតែធ្វើការងារនៅប្រទេសថៃ។ ក្នុងនោះជាង៣០ម៉ឺននាក់ ជាពលករស្របច្បាប់ ៤៣ម៉ឺននាក់ជាពលករស្របច្បាប់បណ្ដោះអាសន្ន និងជាង៣០ម៉ឺននាក់ទៀត ជាពលករដែលគ្មានឯកសារការងារស្របច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ