សមត្ថកិច្ចស្រុកកោះធំ រារាំងមិនឲ្យក្រុមតំណាងរាស្ត្របក្សប្រឆាំង ចុះទៅពិនិត្យព្រំដែននៅច្រកព្រែកស្បូវ
សមត្ថកិច្ចនៅស្រុកកោះធំ ខេត្តកណ្ដាល បានរារាំងមិនឲ្យក្រុមតំណាងរាស្ត្រគណបក្សប្រឆាំង ដឹកនាំក្រុមការងារចុះទៅសិក្សា និងពិនិត្យមើលព្រំដែនកម្ពុជាវៀតណាម ត្រង់ចំណុចច្រកព្រែកស្បូវ ឃុំសំពៅពូន ស្រុកកោះធំ ខេត្តកណ្ដាលនោះទេ។ ជាចំណុចដែលមិនទាន់ឯកភាពគ្នារវាងកម្ពុជានិងវៀតណាម ប៉ុន្តែវៀតណាមបែរជាគគ្លើនសាងសង់ប៉ុស្តិ៍យោធាទ្រង់ទ្រាយធំនៅទីនោះទៅវិញ។ ដំណើរចុះទៅកាន់ព្រំដែនរបស់តំណាងរាស្ត្របក្សប្រឆាំង នៅថ្ងៃសៅរ៍នេះ ក៏មានការចូលរួមពីសំណាក់ព្រះសង្ឃ ប្រជាពលរដ្ឋ និងយុវជន ជាច្រើននាក់ផងដែរ។
ចុះផ្សាយនៅថ្ងៃ៖
ស្តាប់ - ០២:១៣
ក្បួនរថយន្តក្រុមអ្នកតំណាងរាស្ត្រគណបក្សសង្គ្រោះជាតិ ព្រះសង្ឃ យុវជន និងប្រជាពលរដ្ឋ ត្រូវបានក្រុមសមត្ថកិច្ចចម្រុះនៅស្រុកកោះធំ ខេត្តកណ្ដាល រារាំង មិនឲ្យចូលទៅកាន់ចំណុចច្រកព្រែកស្បូវ ដែលវៀតណាមកំពុងតែសាងសង់ប៉ុស្តិ៍យោធា នោះទេ។ ការរារាំងហាមឃាត់នេះ ធ្វើឡើងជាច្រើនកន្លែង និងច្រើនដំណាក់កាល ដោយក្រុមសមត្ថកិច្ចចម្រុះ ដែលមានប្រដាប់ដោយខែលនិងដំបងផង។
បើទោះជាមានការរារាំងក៏ដោយ ក៏តំណាងរាស្ត្របក្សប្រឆាំង លោក រៀល ខេមរិន្ទ្រ ដែលបានដឹកនាំដំណើរនេះ សម្រេចធ្វើដំណើរថ្មើរជើង ទៅកាន់ចំណុចគោលដៅ។ លោក រៀល ខេមរិន្ទ្រ បានគូសបញ្ជាក់ថា ការហាមឃាត់ និងទំនាស់ពាក្យសម្ដីបានកើតឡើងក៏ពិតមែន ក៏ប៉ុន្តែមិនបានបង្កឲ្យមានអំពើហិង្សាឬរបួសស្នាមដល់ក្រុមការងារ និងប្រជាពលរដ្ឋដែលរួមដំណើរឡើយ។
គួរជម្រាបជូនថា ដំណើរចុះទៅពិនិត្យមើលព្រំដែនកម្ពុជាវៀតណាមនៅត្រង់ចំណុចច្រកព្រែកស្បូវ ស្រុកកោះធំ ខេត្តកណ្ដាល របស់ក្រុមអ្នកតំណាងរាស្ត្របក្សប្រឆាំងនាពេលនេះ ធ្វើឡើងបន្ទាប់ពីក្រសួងការបរទេសកម្ពុជា ទើបតែបានផ្ញើកំណត់ទូតតវ៉ាទៅកាន់វៀតណាម។ ជាកំណត់ទូតតវ៉ា ដើម្បីឲ្យវៀតណាមបញ្ឈប់ការសាងសង់ប៉ុស្តិ៍យោធានៅជាប់ភូមិព្រែកស្បូវ។ ជាទីតាំង ដែលមិនទាន់ឯកភាពគ្នារវាងប្រទេសជិតខាងទាំងពីរ។ ប៉ុន្តែបើទោះបីជាមានការស្នើសុំពីកម្ពុជាជាច្រើនលើកច្រើនសាហើយក៏ដោយ ក៏រដ្ឋាភិបាលកុម្មុយនិស្តក្រុងហាណូយមិនបានខ្វាយខ្វល់ពីសំណើរបស់កម្ពុជានោះទេ។ វៀតណាមថែមទាំងបានកសាងប៉ុស្តិ៍យោធានោះធំជាងមុនថែមទៀតផង។
នៅចំពោះមុខចំណាត់ការការទូតរបស់រដ្ឋាភិបាលយ៉ាងដូច្នេះ តំណាងរាស្ត្រគណបក្សសង្គ្រោះជាតិ លោក រៀល ខេមរិន្ទ្រ បានសម្ដែងការសាទរ និងគាំទ្រ។ ប៉ុន្តែបើតាមតំណាងរាស្ត្ររូបនេះ រដ្ឋាភិបាលកម្ពុជា គួរតែចាត់វិធានការម៉ឺងម៉ាត់ជាងនេះ ចំពោះបញ្ហាព្រំដែនជាមួយប្រទេសវៀតណាម។ លោកបានផ្ដល់ជាអនុសាសន៍ ឲ្យរដ្ឋាភិបាលកម្ពុជា នាំយកបញ្ហានេះ ប្ដឹងទៅតុលាការយុត្តិធម៌អន្ដរជាតិ។
យ៉ាងណាក៏ដោយ រដ្ឋាភិបាលក្រុងភ្នំពេញបានបញ្ជាក់ថា កម្ពុជានៅតែប្រកាន់ភាពទន់ភ្លន់ស្របច្បាប់ជាមួយប្រទេសវៀតណាមជាបន្តទៀត។ ប៉ុន្តែបើដោះស្រាយមិនចេញ ទើបកម្ពុជាយកករណីព្រំដែននេះ ទៅប្ដឹងដល់តុលាការយុត្តិធម៌អន្ដរជាតិសាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ