រដ្ឋាភិបាល៖បើដោះស្រាយព្រំដែនជាមួយវៀតណាមមិនបានគឺនឹងឡើងទៅតុលាការអន្តរជាតិ
រដ្ឋាភិបាលកម្ពុជានៅចុងក្រោយនេះ បានផ្ញើកំណត់ទូតទៅកាន់ប្រទេសវៀតណាមសារជាថ្មីម្តងទៀត ក្នុងរឿងព្រំដែននៅក្នុងស្រុកកោះធំ ខេត្តកណ្តាល។ រឿងព្រំដែនបានធ្លាយឆ្លងតាំងពីខេត្តត្បូងឃ្មុំ ខេត្តរតនៈគីរី ឥឡូវបន្តរហូតដល់ខេត្តកណ្តាលជាបន្តទៀត។ ទន្ទឹមនឹងនេះ រដ្ឋាភិបាលបានបញ្ជាក់ថា កម្ពុជានៅតែប្រកាន់ភាពទន់ភ្លន់ស្របច្បាប់ជាមួយវៀតណាមជាបន្តទៀត ប៉ុន្តែបើដោះស្រាយមិនចេញ កម្ពុជានឹងយកករណីព្រំដែននេះទៅប្តឹងដល់តុលាការយុត្តិធម៌អន្តរជាតិសារជាថ្មី។
ចុះផ្សាយនៅថ្ងៃ៖
ស្តាប់ - ០២:១៤
យន្តការតុលាការយុត្តិធម៌អន្តរជាតិរវាងកម្ពុជា និងវៀតណាម គឺជាជម្រើសចុងក្រោយរបស់រដ្ឋាភិបាលក្រុងភ្នំពេញក្នុងការដោះស្រាយបញ្ហាព្រំដែន។ នេះជាការបញ្ជាក់ពីលោកផៃ ស៊ីផាន។ អ្នកនាំពាក្យទីស្តីការគណៈរដ្ឋមន្ត្រីរូបនេះ បានថ្លែងប្រាប់វិទ្យុបារាំងបន្ថែមថាការអនុវត្តតាមតុលាការអន្តរជាតិនេះ គឺជាបន្ទាត់នយោបាយរបស់កម្ពុជាក្នុងការថែរក្សាទំនាក់ទំនងរវាងប្រទេសជិតខាង មិនថាថៃ ឬវៀតណាមនោះទេព្រោះថា បញ្ហាព្រំដែនគឺជាកិច្ចការអន្តរជាតិដែលកើតឡើងពីកិច្ចសហការជាមួយប្រទេសជិតខាង។ ហើយថា រដ្ឋាភិបាលកម្ពុជាគ្មានគោលការណ៍ប្រើហិង្សាចំពោះកិច្ចការព្រំដែននោះដែរ ម្យ៉ាងទៀត កម្ពុជានឹងនៅតែប្រកាន់ឥរិយាបទទន់ភ្លន់ម៉ឺងម៉ាត់ជាបន្តទៀត។
ក្នុងសំណុំរឿងព្រំដែនជាមួយវៀតណាមនេះ កម្ពុជាបានធ្វើកំណត់ទូតជាបន្តបន្ទាប់ទៅកាន់ប្រទេសវៀតណាមតាំងពីការជីករណ្តៅក្នុងខេត្តរតនៈគីរី ហើយកាលពីថ្ងៃទី១៧ មិថុនាម្សិលមិញទៀត បានផ្ញើកំណត់ទូតប្រឆាំងសារជាថ្មីម្តងទៀតក្នុងការសាងសង់ប៉ុស្តិ៍យោធានៅក្នុងស្រុកកោះធំ ខេត្តកណ្តាល។ ទីតាំងនេះគឺជាចំណុចដែលមិនទាន់ឯកភាពគ្នារវាងប្រទេសជិតខាងទាំងពីរ។ ប៉ុន្តែរដ្ឋាភិបាលកុម្មុយនិស្តក្រុងហាណូយមិនព្រមបញ្ឈប់ ប៉ុន្តែបានធ្វើប៉ុស្តិ៍យោធានោះធំជាងមុនថែមទៀតផង។ ក្រសួងការបរទេសកម្ពុជា បានបញ្ជាក់ថាគិតត្រឹមឆ្នាំ២០១៣ រហូតដល់ពេលនេះ កម្ពុជាបានបញ្ជូនកំណត់ទូតតវ៉ាចំនួន៩លើកទៅហើយ។ ប៉ុន្តែប្រទេសវៀតណាមមិនបានឆ្លើយតបយ៉ាងណានោះទេ។
អ្នកនាំពាក្យគណបក្សសង្គ្រោះជាតិ លោកយ៉ែម ប៉ុញ្ញឫទ្ធិ បានហៅទង្វើរបស់រដ្ឋាភិបាល វៀតណាមថា ជាទង្វើយ៉ាងគឃ្លើន និងបានរំលោភសន្ធិសញ្ញាដែលបានចុះកន្លងមក។ លោកបានស្នើឱ្យសភាជាតិបង្កើតក្រុមការងារចំពោះកិច្ចមួយដើម្បីសើរើកិច្ចការព្រំដែនជាមួយវៀតណាមឡើងវិញ។ អ្នកនាំពាក្យដដែលបានបញ្ជាក់ថា កម្ពុជាគួរស្នើទៅដល់សហប្រធានសន្ធិសញ្ញាក្រុងប៉ារីសឆ្នាំ១៩៩១ដើម្បីពិនិត្យឡើងវិញផងដែរ។ ហើយថាកម្ពុជាគួរធ្វើកិច្ចការងារយ៉ាងដូចនេះតាំងពី៣០ឆ្នាំកន្លងមកហើយ។
យ៉ាងណាក៏ដោយលោកផៃ ស៊ីផាន អ្នកនាំពាក្យគណៈរដ្ឋមន្ត្រីបានបញ្ជាក់ថាកំណត់ទូតប្រឆាំងតវ៉ាប្រទេសវៀតណាមជាបន្តបន្ទាប់នេះ គឺជាសារបញ្ជាក់យ៉ាងច្បាស់ថា កម្ពុជាបានបង្ហាញពីឯករាជ្យភាពរបស់ខ្លួន។ សូមបញ្ជាក់ថាកម្ពុជាធ្លាប់បានប្តឹងប្រទេសថៃម្តងរួចមកហើយក្នុងសំណុំរឿងព្រំដែនតំបន់ប្រសាទព្រះវិហារ។ ហើយបើដល់ចំណុចចុងក្រោយជាមួយវៀតណាមនេះទៀត គឺជាលើកទី២ដែលកម្ពុជានឹងអាចប្រើយន្តការស្របច្បាប់ដើម្បីការពារទឹកដីរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ