តំណាងរាស្ត្របក្សប្រឆាំងទៅមើលព្រំដែនខេត្តស្វាយរៀង ក្រោមការសម្របសម្រួលពីអាជ្ញាធរ
ដូចការគ្រោងទុក នៅថ្ងៃអាទិត្យទី១៩កក្កដានេះ ក្រុមតំណាងរាស្ត្រគណបក្សសង្គ្រោះជាតិ បានដឹកនាំប្រជាពលរដ្ឋ យុវជន និងព្រះសង្ឃ សរុបទាំងអស់ប្រមាណ២ពាន់នាក់ ដើម្បីទៅពិនិត្យបង្គោលព្រំដែនលេខ២០២ និង២០៣។ បង្គោលព្រំដែន លេខ២០២ និង២០៣ ដែលស្ថិតនៅស្រុកកំពង់រោទិ៍ខេត្តស្វាយរៀង។ គួរកត់សម្គាល់ថា ដំណើរចុះទៅពិនិត្យព្រំដែនរបស់តំណាងរាស្ត្របក្សប្រឆាំងលើកនេះ គ្មានការប៉ះទង្គិចហិង្សាណាមួយកើតឡើងទេ ព្រោះមានការសម្របសម្រួល និងការការពារសន្តិសុខ ពីសំណាក់អាជ្ញាធរខេត្តស្វាយរៀង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ថ្វីត្បិតតែបានទៅដល់តំបន់ព្រំដែនកម្ពុជាវៀតណាម នៅស្រុកកំពង់រោទិ៍ ខេត្តស្វាយរៀងហើយក្ដី ក៏នៅក្នុងចំណោមអ្នកចូលរួមជាង២ពាន់នាក់នោះ មានប្រជាពលរដ្ឋតែ១០០នាក់ប៉ុណ្ណោះ ដែលត្រូវបានអនុញ្ញាតឲ្យចូលទៅពិនិត្យមើលបង្គោលព្រំដែនលេខ២០២ និង២០៣។
គួររំលឹកថា ការចុះពិនិត្យមើលបង្គោលព្រំដែននេះ ធ្វើឡើងបន្ទាប់ពីវៀតណាមបានរំលោភចូលដែនអធិបតេយ្យកម្ពុជា ដោយសាងសង់ផ្លូវនៅចន្លោះបង្គោលព្រំដែនលេខ២០២ និង២០៣។ លោក រៀល ខេមរិន្ទ្រ តំណាងរាស្ត្រគណបក្សសង្គ្រោះជាតិ និងជាអ្នកដឹកនាំការចុះពិនិត្យព្រំដែនលើកនេះ បានអះអាងប្រាប់វិទ្យុបារាំងថា សកម្មភាពឈូសឆាយផ្លូវរបស់វៀតណាម នៅក្បែរបង្គោលព្រំដែន គឺមិនទាន់បញ្ចប់នៅឡើយទេ។ គ្រឿងចក្រដែលប្រើសម្រាប់ការឈូសឆាយផ្លូវនោះទៀតសោត ក៏នៅតែមានវត្តមានត្រង់កន្លែងសាងសង់ផ្លូវផងដែរ។
លទ្ធផលនៃការចុះត្រួតពិនិត្យបង្គោលព្រំដែនលេខ២០២ និង២០៣ របស់តំណាងរាស្ត្របក្សប្រឆាំង និងប្រជាពលរដ្ឋជាង២ពាន់នាក់នៅថ្ងៃអាទិត្យ គឺផ្ទុយស្រឡះទៅនឹងអ្វីដែលអនុរដ្ឋមន្ដ្រីការបរទេសវៀតណាម អះអាងប្រាប់រដ្ឋាភិបាលកម្ពុជា។ អនុរដ្ឋមន្ដ្រីការបរទេសវៀតណាម ដែលបានប្រាប់រដ្ឋាភិបាលកម្ពុជាថា បានបញ្ជាឲ្យផ្អាកការសាងសង់ផ្លូវនោះហើយ។
លោក ជាម ចន្នី តំណាងរាស្ត្រគណបក្សសង្គ្រោះជាតិមណ្ឌលខេត្តកំពង់ធំ បញ្ជាក់ប្រាប់វិទ្យុបារាំងអន្ដរជាតិ នៅក្នុងដំណើរត្រឡប់មកពីស្រុកកំពង់រោទិ៍ ខេត្តស្វាយរៀងវិញថា គណបក្សសង្គ្រោះជាតិនឹងបន្តការចរចាជាមួយគណបក្សប្រជាជនកម្ពុជាតទៅទៀត ដើម្បីដោះស្រាយបញ្ហាព្រំដែនដែលនៅសេសសល់ ជាពិសេសបញ្ហាព្រំដែនជាមួយប្រទេសវៀតណាម។
ជាការកត់សម្គាល់ ដំណើរចុះទៅពិនិត្យព្រំដែនរបស់តំណាងរាស្ត្របក្សប្រឆាំងលើកនេះ គ្មានការប៉ះទង្គិចហិង្សាណាមួយកើតឡើងទេ។ គ្មានអំពើហិង្សា ព្រោះមានការសម្របសម្រួល និងការការពារសន្តិសុខយ៉ាងយកចិត្តទុកដាក់ ពីសំណាក់អាជ្ញាធរខេត្តស្វាយរៀង។
ការចុះទៅពិនិត្យព្រំដែនរបស់តំណាងរាស្ត្របក្សប្រឆាំងនិងប្រជាពលរដ្ឋខ្មែរនាពេលនេះ ធ្វើឡើងតែ៣ថ្ងៃប៉ុណ្ណោះ ក្រោយការចុះស៊ើបអង្កេតរបស់ក្រុមការងារពិសេសកម្ពុជា វៀតណាម លើបញ្ហាអំពើហិង្សារវាងពលរដ្ឋនៃប្រទេសទាំងពីរកាលពីចុងខែមិថុនាកន្លងទៅ។ ក្រុមការងារពិសេសបានឯកភាពគ្នាលើបញ្ហាមួយចំនួន ជាអាថិ៍ ប្តេជ្ញាមិនឲ្យមានការប៉ះទង្គិចគ្នា ដូចកាលចុងខែមិថុនាកន្លងទៅ។ និងឯកភាពគោរពរួមគ្នានូវរាល់សន្ធិសញ្ញាកិច្ចព្រមព្រៀង ដែលបានចុះហត្ថលេខាហើយ ព្រមទាំងសេចក្តីប្រកាសព័ត៌មានរួមកម្ពុជា-វៀតណាម ថ្ងៃទី ១៧មករា ឆ្នាំ១៩៩៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ