លោកស្រី មួរ សុខហួរ អំពាវនាវឲ្យបរទេសដាក់ទណ្ឌកម្មលើរដ្ឋាភិបាលកម្ពុជា
តាមរយៈសារព័ត៌មាន Reuters លោកស្រី មួរ សុខហួរ អនុប្រធានគណបក្សសង្គ្រោះជាតិ បានអំពាវនាវឲ្យសហគមន៍អន្ដរជាតិ ដាក់ទណ្ឌកម្មលើរដ្ឋាភិបាលកម្ពុជា។ សូមជម្រាបជូនថា ការអំពាវនាវរបស់លោកស្រី មួរ សុខហួរ ដូច្នេះ ធ្វើឡើងតែ មួយថ្ងៃប៉ុណ្ណោះ បន្ទាប់ពីលោកស្រីចាកចេញពីកម្ពុជា នៅថ្ងៃអង្គារម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ថ្លែងប្រាប់សារព័ត៌មាន Reuters លោកស្រី មួរ សុខហួរ សង្កត់ធ្ងន់ថា វាល្មមដល់ពេលដាក់ទណ្ឌកម្មលើរដ្ឋាភិបាលកម្ពុជាហើយ។ ទណ្ឌកម្មដែលលោកស្រី មួរ សុខហួរ ចង់បាន គឺការផ្អាកផ្ដល់ជំនួយបច្ចេកទេសដល់រដ្ឋាភិបាលខ្មែរ ឬអាចដាក់កំហិតទិដ្ឋាការដល់មន្ដ្រីជាន់ខ្ពស់រដ្ឋាភិបាលជាដើម។ ប៉ុន្តែយ៉ាងណាក៏ដោយ សម្រាប់លោកស្រី មួរ សុខហួរ ការដាក់ទណ្ឌកម្មរបស់អន្ដរជាតិនោះ មិនគួរផ្ដោតទៅលើទីផ្សារសម្លៀកបំពាក់របស់កម្ពុជាឡើយ។ ទីផ្សារសម្លៀកបំពាក់ដែលជាវិស័យដ៏សំខាន់មួយ សម្រាប់ទ្រទ្រង់ជីវភាពកម្មករកម្មការិនីខ្មែរ។
គួរកត់សម្គាល់ថា អនុប្រធានគណបក្សសង្គ្រោះជាតិ លោកស្រី មួរ សុខហួរ បានចាកចេញពីប្រទេសកម្ពុជានៅថ្ងៃអង្គារ ទី០៣ តុលា ដោយសារការភ័យខ្លាចពីការចាប់ខ្លួន ពាក់ព័ន្ធនឹងសំណុំរឿងលោក កឹម សុខា។ មន្ដ្រីជាន់ខ្ពស់បក្សប្រឆាំង លោក ម៉ៅ មុនីវណ្ណ បញ្ជាក់ប្រាប់វិទ្យុបារាំងថា លោកស្រី មួរ សុខហួរ កំពុងមានវត្តមាននៅប្រទេសថៃ ប៉ុន្តែលោកមិនជ្រាបថាតើអនុប្រធានបក្សប្រឆាំងរូបនេះ នឹងបន្តដំណើរទៅកាន់ប្រទេសទី៣ឬយ៉ាងណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ