គណបក្សសង្គ្រោះជាតិ ប្រារព្ធសន្និបាតក្រុមប្រឹក្សាជាតិលើកទី២ ទោះបីមានការរ៉ៅឆានពីក្រុមនិស្សិត
នៅព្រឹកថ្ងៃសៅរ៍នេះ គណបក្សសង្គ្រោះជាតិបានរៀបចំសន្និបាតក្រុមប្រឹក្សាជាតិលើកទី២របស់ខ្លួន នៅសង្កាត់ព្រែកលាប ខណ្ឌជ្រោយចង្វារ ជាយក្រុងភ្នំពេញ ដោយមានការចូលរួមពីថ្នាក់ដឹកនាំនិងសមាជិកគណបក្សមកពីទូទាំងប្រទេស សរុបប្រមាណ១ពាន់៥រយនាក់។ នៅក្បែរកន្លែងប្រារព្ធពិធីនោះ គេកត់សម្គាល់ឃើញក្រុមយុវជនជាង១០នាក់ ដឹកនាំដោយលោក ស្រី ចំរើន ប្រើឧគ្ឃោសនសព្ទស្រែកទាមទារឲ្យលោក កឹម សុខា បកស្រាយរឿងខ្សែអាត់សំឡេង។ ប៉ុន្តែនៅទីបំផុត ក្រុមនិស្សិតត្រូវបានកម្លាំងសមត្ថកិច្ចស្នើឲ្យចាកចេញពីទីនោះ ដើម្បីបញ្ចៀសអំពើហិង្សាជាយថាហេតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
គ្មានអ្វីរារាំងសន្និបាតក្រុមប្រឹក្សាជាតិលើកទី២របស់គណបក្សសង្គ្រោះជាតិ នៅព្រឹកថ្ងៃសៅរ៍នេះបានទេ។ ក្រុមនិស្សិតដឹកនាំដោយលោក ស្រី ចំរើន ដែលតាមទៅរ៉ៅឆានវេទិកាគណបក្សសង្គ្រោះជាតិលើកនេះ បានត្រឹមតែឈរស្រែកដាក់ឧគ្ឃោសនសព្ទនៅខាងក្រៅវេទិកា ទាមទារឲ្យលោក កឹម សុខា ចេញមកបកស្រាយរឿងខ្សែអាត់សំឡេងតែប៉ុណ្ណោះ។
ក្រុមនិស្សិត ត្រូវបានរុំព័ទ្ធនិងរុញច្រានដោយក្រុមសន្តិសុខនិងអ្នកគាំទ្រនៃគណបក្សសង្គ្រោះជាតិដែលមិនសូវសប្បាយចិត្ត និងចង់ឲ្យក្រុមនិស្សិតចាកចេញពីទីនោះ។ នៅទីបំផុត ក្រុមនិស្សិតត្រូវបានកម្លាំងសមត្ថកិច្ចខណ្ឌជ្រោយចង្វារស្នើឲ្យចាកចេញ ដើម្បីបញ្ចៀសអំពើហិង្សាជាយថាហេតុ បើទោះបីជាលោក ស្រី ចំរើន ដែលជាអ្នកដឹកនាំក្រុមនិស្សិត បញ្ជាក់អំពីការតវ៉ាដោយសន្តិវិធីក៏ដោយ។
នៅក្នុងសន្និបាតក្រុមប្រឹក្សាជាតិលើកទី២របស់គណបក្សសង្គ្រោះជាតិ ពេញមួយព្រឹកថ្ងៃសៅរ៍នេះ សមាជិកនិងថ្នាក់ដឹកនាំគណបក្សបានមកជួបជុំគ្នា ស្ដាប់សារស្វាគមន៍របស់លោក កឹម សុខា ដែលចូលរួមសន្និបាតដោយផ្ទាល់ និងលោក សម រង្ស៊ី ដែលចូលរួមតាមវីដេអូខនហ្វឺរេន។ ក្រៅពីនោះ ប្រធានគណៈកម្មការចំនួន៣នៃគណបក្សសង្គ្រោះជាតិ គឺប្រធានគណៈកម្មការនាយក លោក ប៉ុល ហំម ប្រធានគណៈកម្មការប្រតិបត្តិ លោក យឹម សុវណ្ណ និងប្រធានគណៈកម្មការវិន័យ លោក អ៊ូ ច័ន្ទឫទ្ធិ បានធ្វើសេចក្ដីរាយការណ៍ពីសកម្មភាពរយៈពេលពីរឆ្នាំកន្លងមករបស់ខ្លួនជាបន្តបន្ទាប់។
រយៈពេលពីរឆ្នាំកន្លងទៅនេះ សមទ្ធិផលដែលគណៈកម្មការទាំងបីសម្រេចបាន គឺការបង្កើតគណៈកម្មការជំនាញចំនួន១០ ស្របតាមចំនួនគណៈកម្មការជំនាញនៅរដ្ឋសភា។ គណៈកម្មការជំនាញទាំង១០នេះ មានភារកិច្ចស្រាវជ្រាវ ប្រមូលឯកសារ និងរៀបចំគោលនយោបាយ ដាក់ជូនថ្នាក់ដឹកនាំគណបក្ស និងសមាជិកសភានៃគណបក្សសង្គ្រោះជាតិ។ ការងារទូទៅដំណើរការល្អ ប៉ុន្តែលោក ប៉ុល ហំម ប្រធានគណៈកម្មការនាយក ថា សមាជិករបស់ខ្លួនច្រើនតែខកខានមិនបានចូលរួមប្រជុំឲ្យបានទៀងទាត់ រៀងរាល់៣ខែម្ដង។
សមិទ្ធិផលសំខាន់មួយចំនួនទៀតរបស់គណបក្សសង្គ្រោះជាតិ នាពេលពីរឆ្នាំកន្លងមកដែរ គឺការធ្វើបាតុកម្មអហិង្សា រហូតទាល់តែមានការរុះរើគណៈកម្មាធិការជាតិរៀបចំការបោះឆ្នោត ការទទួលបានភ្លើងខៀវឲ្យបង្កើតទូរទស្សន៍ព្រះអាទិត្យនៅឆ្នាំ២០១៤ និងក្រោយមកទិញដីសម្រាប់ស្ថានីយទូរទស្សន៍នៅចុងឆ្នាំ២០១៥។
បន្ទាប់ពីនេះ គឺនៅពេលរសៀល សន្និបាតត្រូវពិភាក្សាកំណត់ទិសដៅ និងគោលនយោបាយរបស់គណបក្សសម្រាប់ពេលពីរឆ្នាំខាងមុខ ក៏ដូចជាពិភាក្សានិងអនុម័តលើសំណើរបស់សន្និបាតក្រុមប្រឹក្សាជាតិ ដូចមានចែងនៅក្នុងរបៀបវារៈកម្មវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ