បក្សប្រជាជនក្រើនរំឭកឲ្យខ្មែរត្រូវដឹងគុណថ្ងៃ៧មករា
ដូចរៀងរាល់ឆ្នាំ នៅថ្ងៃទី៧មករា ឆ្នាំ២០១៥នេះ គណបក្សប្រជាជនកម្ពុជា បានប្រារព្ធមិទ្ទិញដ៏ធំមួយដើម្បីរំឭកខួបទី៣៦ នៃទិវាជ័យជំនះ ៧មករា របស់ខ្លួន។ ព្រឹត្តិការណ៍នេះ បានធ្វើឡើង នៅស្នាក់កណ្តាលគណបក្សប្រជាជនក្នុងទីក្រុងភ្នំពេញ និងនៅស្នាក់ការតាមបណ្តាខេត្តនានា។ គណបក្សកាន់អំណាច បានស្វាគមន៍ ចំពោះសាលក្រមវិនិច្ឆ័យទោសអតីតមេដឹកនាំជាន់ខ្ពស់ខ្មែរក្រហម ដែលបានកាត់ក្តី កាលពីពាក់កណ្តាលឆ្នាំ២០១៤ កន្លងទៅ និងបានក្រើនរំឭកជាថ្មីទៀតឲ្យពលរដ្ឋខ្មែរ ត្រូវតែដឹងគុណជាដាច់ខាត ដល់ថ្ងៃ ៧មករា ឆ្នាំ១៩៧៩។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ទិវាជ័យជំនះ ៧មករា របស់គណបក្សប្រជាជនកម្ពុជា បានចាប់ផ្តើមធ្វើឡើង នៅវេលាម៉ោង ៧ព្រឹកថ្ងៃ ៧មករានេះ ដោយមានការចូលរួមជាអធិបតីពីប្រមុខដឹកនាំគណបក្សកាន់អំណាច គឺលោកហេង សំរិន ប្រធានកិត្តិយសគណបក្សប្រជាជន និងលោកនាយករដ្ឋមន្ត្រីហ៊ុន សែន អនុប្រធានបក្ស ប៉ុន្តែ អវត្តមានលោកជា ស៊ីម ប្រធានបក្ស។ ក្រៅពីប្រមុខដឹកនាំបក្ស ក៏មានផងដែរ សមាជិក និងពលរដ្ឋអ្នកគាំទ្រថ្ងៃ៧មករា ចូលរួមយ៉ាងច្រើនកុះករ។
ថ្លែងសន្ទរកថា នៅក្នុងមិទ្ទិញ នាព្រឹកថ្ងៃទី៧មករានេះ លោកហេង សំរិន ប្រធានកិត្តិយសគណបក្សប្រជាជនកម្ពុជា បានសាទរចំពោះសាលក្រមវិនិច្ឆ័យទោស ចំពោះអតីតមេដឹកនាំជាន់ខ្ពស់នៃរបបខ្មែរក្រហម ២រូប កាលពីខែសីហា ឆ្នាំ២០១៤កន្លងទៅ។ លោកថានេះ គឺជារបត់មួយដើម្បីស្វែងរកយុត្តិធម៌ដល់ប្រជាជនកម្ពុជា។
ជាមួយគ្នានេះផងដែរ លោកហេង សំរិន ក៏បានបញ្ជាក់ជាថ្មីដល់ពលរដ្ឋខ្មែរឲ្យត្រូវតែដឹងគុណថ្ងៃរំដោះ ៧មករា ថាជាថ្ងៃកំណើតទី២ របស់កម្ពុជា។ លើសពីនេះ កម្ពុជា ក៏គួរត្រូវដឹងគុណ ដល់វីរយុទ្ធជននៃកងទ័ពស្ម័គ្រចិត្តវៀតណាម ដែលបានប្រយុទ្ធ និងធ្វើពលិកម្មយ៉ាងអង់អាចក្លាហានបំផុត ដើម្បីរំដោះប្រទេសកម្ពុជា ពីរបបប្រល័យពូជសាសន៍ និងការពារការរស់ឡើងវិញរបស់ប្រជាជន។
ប៉ុន្តែ អត្ថន័យថ្ងៃ៧មករា នៅតែជាប្រធានបទនៃជម្លោះនយោបាយក្តៅគគុកដដែល។ មួយថ្ងៃមុនពេលគណបក្សប្រជាជនកម្ពុជាប្រារព្ធទិវានេះ សមាជិកព្រឹទ្ធសភាគណបក្ស សម រង្ស៊ី លោកគង់ គាំ បានចេញសេចក្តីថ្លែងការណ៍មួយដោយចាត់ទុកថ្ងៃ៧មករាថាជាថ្ងៃដែលកងទ័ពវៀតណាមចូលឈ្លានពានប្រទេសកម្ពុជា។
លោក គង់ គាំ បញ្ជាក់ក្នុងសេចក្តីថ្លែងការណ៍របស់ខ្លួនថា ៧មករាជាទំព័រដ៏ខ្មៅងងឹតជានិច្ចនៃប្រវត្តិសាស្ត្ររបស់កម្ពុជាដោយសារតែកងទ័ពវៀតណាមម្ភៃកងពល ដែលមានពលទាហានប្រមាណ ១២ម៉ឺននាក់បានចូលលុកលុយកម្ពុជា។ ដូច្នេះ សមាជិកព្រឹទ្ធសភាគណបក្សសម រង្ស៊ី អះអាងថា មិនទទួលស្គាល់ថ្ងៃ៧មករា ថាជាថ្ងៃសំខាន់របស់កម្ពុជាឡើយ។ ប៉ុន្តែ សម្រាប់លោកនាយករដ្ឋមន្ត្រី ហ៊ុន សែន វិញ អ្នកប្រឆាំង៧មករា គឺជាសម្ព័ន្ធភាពរបស់ខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ