ឆ្នាំ២០១៥ ជាដំណាក់កាលដ៏លំបាកថ្មីសម្រាប់គណបក្សទាំងពីរ!
ចុះផ្សាយនៅថ្ងៃ៖
ស្តាប់ - ០៥:០២
ចាប់តាំងពីចុងឆ្នាំ ២០១៣មក រហូតដល់ដំណាច់ឆ្នាំ ២០១៤ អាចចាត់ទុកថាជាឆ្នាំប្រវត្តិសាស្ត្រមួយសម្រាប់ឆាកនយោបាយកម្ពុជាដែលបានស្គាល់ការវិវឌ្ឍនយោបាយដ៏ជ្រាលជ្រៅមួយ។ គណបក្សប្រឆាំងបានកើនសំឡេងយ៉ាងខ្លាំងដែលធ្វើឲ្យគណបក្សប្រជាជនកម្ពុជាដែលកាន់អំណាចជាង៣០ឆ្នាំបានស្គាល់ការស្រុតចុះប្រជាប្រិយភាពយ៉ាងខ្លាំងដែរ។ វិបត្តិនយោបាយក្រោយការបោះឆ្នោតក៏បានដុតកម្តៅឆាកនយោបាយរយៈពេលពេញមួយឆ្នាំ។ ប៉ុន្តែ ឆ្នាំ ២០១៥ ដែលចូលមកដល់ពេលនេះនឹងក្លាយជាឆ្នាំដ៏លំបាកម្តងទៀតសម្រាប់គណបក្សនយោបាយធំៗទាំងពីរ។
មហាបាតុកម្មដ៏កក្រើកទីក្រុងភ្នំពេញ ការប្រឈមមុខគ្នាយ៉ាងតានតឹងរហូតកើតមានអំពើហិង្សាបង្ហូរឈាម និងសង្គ្រាមពាក្យសម្តីគ្រោតគ្រាតរវាងគណបក្សធំៗទាំងពីរបានកន្លងផុតទៅហើយ។ ចុងឆ្នាំ ២០១៤ និងដើមឆ្នាំ ២០១៥នេះ ស្ថានការណ៍នយោបាយបានស្ងប់ស្ងាត់។ ប៉ុន្តែ វាស្ងប់ស្ងាត់តែខាងក្រៅតែកំពុងពុះកញ្ជ្រោលខ្លាំងនៅផ្នែកខាងក្នុងពោលគឺឆ្នាំ ២០១៥ ដែលចូលមកដល់ពេលនេះគឺជាដំណាក់កាលដ៏ក្តៅគគុកនិងដ៏លំបាកសម្រាប់ផ្ទៃក្នុងគណបក្សនីមួយ។
សម្រាប់គណបក្សសង្គ្រោះជាតិ ឆ្នាំ ២០១៥ ជាឆ្នាំដែលគណបក្សនេះត្រូវឆ្លងកាត់ព្យុះបោកបក់យ៉ាងខ្លាំងបន្ទាប់ពីបានស្គាល់សន្ទុះប្រជាប្រិយភាពគួរឲ្យភ្ញាក់ផ្អើលកាលពីការបោះឆ្នោតខែកក្កដាឆ្នាំ ២០១៣ ។ គណបក្សសង្គ្រោះជាតិត្រូវប្រឈមនឹងបញ្ហាសំខាន់បីនៅចំពោះមុខ៖ ទី១គឺបញ្ហាផ្ទៃក្នុងដែលកំពុងរង្គោះរង្គើ, ទី២គឺការរក្សាវប្បធម៌សន្ទនាជាមួយគណបក្សប្រជាជនកម្ពុជាក្នុងបរិបទដែលបញ្ហាមួយចំនួននៅតែជាចំណុចប្រឈមតានតឹងនៅឡើយ និងទី៣គឺ ការទប់ខ្លួនពីសម្ពាធនៃចលនានយោបាយថ្មីដែលកំពុងតែលេចឡើង។ បញ្ហាទាំងបីដែលកើតឡើងក្នុងពេលតែមួយពិតជាមិនអនុញ្ញាតឲ្យមេដឹកនាំគណបក្សប្រឆាំងទទួលអំណឆ្នាំថ្មីដោយរីករាយបានទេ។
ងាកទៅមើលគណបក្សប្រជាជនកម្ពុជាវិញ ឆ្នាំ ២០១៥ ក៏ជាឆ្នាំសាកល្បងដ៏សំខាន់មួយទៀតដែរសម្រាប់នយោបាយកំណែទម្រង់របស់ខ្លួន។ ដូចដែលគេបានដឹងរួចហើយថា ការបោះឆ្នោតកាលពីខែកក្កដាឆ្នាំ ២០១៣ ប្រៀបបាននឹងរលកយក្សស៊ូណាមិដែលវាយបោកបក់ពេញទំហឹងទៅលើគណបក្សនេះ។ បក្សកាន់អំណាចជាង៣០ឆ្នាំបានស្គាល់ការស្រុតចុះប្រជាប្រិយភាពយ៉ាងគំហុគគួរឲ្យព្រួយបារម្ភ។ ក្នុងទិសដៅស្តាប្រជាប្រិយភាពរបស់ខ្លួន រដ្ឋាភិបាលបក្សកាន់អំណាចបានដាក់ចេញកំណែទម្រង់ស៊ីជម្រៅជាច្រើន។ ប៉ុន្តែ រយៈពេលជាងមួយឆ្នាំកន្លងទៅនេះ នយោបាយកំណែទម្រង់នេះនៅមិនទាន់ទទួលបានលទ្ធផលគួរឲ្យកត់សម្គាល់នៅឡើយទេ។
សេវាកម្មសាធារណៈនៅតែមិនគួរជាទីពេញចិត្តរបស់ពលរដ្ឋ។ ប្រព័ន្ធយុត្តិធម៌នៅតែជាដើមចមនៃការតវ៉ារបស់ជនរងគ្រោះជាច្រើន។ អំពើពុករលួយ បញ្ហាដីធ្លី គម្លាតរវាងអ្នកមាននិងអ្នកក្រ រវាងទីក្រុងនិងជនបទ និងបទល្មើសព្រៃឈើ។ល។ សុទ្ធសឹងជាចំណុចក្តៅដែលបង្កការមិនសប្បាយចិត្តរបស់ពលរដ្ឋម្ចាស់ឆ្នោត។ តាមពិតបញ្ហាទាំងនេះជារឿងដែលបន្សល់ពីឆ្នាំចាស់ជាយូរណាស់មកហើយតែដោះស្រាយមិនទាន់ចេញ។ ប៉ុន្តែ ការបោះឆ្នោតមិនរង់ចាំកំណែទម្រង់ដ៏យឺតយ៉ាវនេះទេ។
ម្យ៉ាងទៀត ស្ថានការណ៍នយោបាយបាយក្នុងឆ្នាំថ្មីនេះខុសពីឆ្នាំចាស់។ ខុសគ្នានៅត្រង់ថា កាលពីមុន គណបក្សកាន់អំណាចអាចរំភើយបានព្រោះសម្អាងថា ខ្លួនមិនងាយមានគូបដិបក្ខណាផ្តួលបានឡើយ។ ប៉ុន្តែ ឆ្នាំថ្មីនេះ ស្ថានការណ៍មិនអនុញ្ញាតឲ្យគណបក្សកាន់អំណាចធ្វើព្រងើយដូចពីមុនបានទៀតឡើយ។ អំណឹះតទៅគឺជាពេលវេលាដ៏មានតម្លៃបំផុតដែលគណបក្សនយោបាយត្រូវបង្ហាញសមត្ថភាពដោះស្រាយបញ្ហា ពីព្រោះនេះជាវិញ្ញាសាស្លាប់រស់ក្នុងការដណ្តើមប្រជាប្រិយភាពសម្រាប់ការបោះឆ្នោតលើកក្រោយ។
ដូច្នេះ គ្មានគណបក្សណាមួយទាំងបក្សកាន់អំណាច ទាំងបក្សប្រឆាំងអសកម្មនៅចំពោះមុខបញ្ហារាប់រយជំពូកដែលខ្លួនកំពុងតែប្រឈមនោះឡើយ។ និយាយតាមបែបផ្សេង ឆ្នាំ ២០១៥ និងឆ្នាំខាងមុខទៀត គឺជាពេលវេលាក្តៅគគុកសម្រាប់ឆាកនយោបាយប្រទេសកម្ពុជា។ ភាពក្តៅគគុកនេះ ប្រសិនបើវាកើតឡើងក្នុងក្របខណ្ឌនៃវប្បធម៌សន្ទនាដូចដែលកំពុងកើតឡើងនៅពេលនេះគឺជាការល្អប្រសើរ។ ប៉ុន្តែ ប្រសិនបើវាបែរជាក្តៅរហូតដល់ដុតរោលវប្បធម៌សន្ទនារវាងគណបក្សធំទាំងពីរឲ្យរលាយទៅវិញនោះ ស្ថានការណ៍នឹងកាន់តែយ៉ាប់យ៉ឺនជាមិនខាន។
សរុបមកវិញ ឆ្នាំ ២០១៥ នេះមិនគ្រាន់តែជាពេលវេលាដែលគណបក្សទាំងពីរត្រូវដោះស្រាយបញ្ហាប្រឈមរៀងៗខ្លួនប៉ុណ្ណោះទេ តែក៏ត្រូវខំថែរក្សាកិច្ចព្រមព្រៀងនយោបាយកុំឲ្យក្លាយជាវិបត្តិសាជាថ្មីផងដែរ។ តើគណបក្សកាន់អំណាចអាចសម្រេចកំណែទម្រង់របស់ខ្លួនបានកម្រិតណា? តើបក្សសង្គ្រោះជាតិអាចរក្សាសន្ទុះរបស់ខ្លួនទៅមុខទៀតបានដែរឬទេ? តើចលនានយោបាយថ្មីដែលកំពុងចាប់កំណើតនៅពេលនេះមានវាសនាយ៉ាងដូចម្តេច? ទាំងនេះជាសំណួរដែលគេអាចរកចម្លើយឃើញបណ្តើរៗក្នុងអំឡុងឆ្នាំ ២០១៥ នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ