បក្សកាន់អំណាច និងបក្សប្រឆាំង មានសុទិដ្ឋិនិយមដូចគ្នានៅឆ្នាំ២០១៥
ខណៈដែលឆ្នាំ២០១៥នឹងចូលមកដល់ថ្ងៃស្អែកនេះ រដ្ឋាភិបាលដែលគ្រប់គ្រងដោយគណបក្សប្រជាជនកម្ពុជា និងគណបក្សសង្គ្រោះជាតិលើកឡើងថា ឆ្នាំ២០១៥ឆ្នាំថ្មី នឹងនាំមកនូវសញ្ញាណវិជ្ជមានចំពោះសង្គមជាតិកម្ពុជា។ វិជ្ជមានទាំងផ្នែកសេដ្ឋកិច្ច នយោបាយ បញ្ហាដីធ្លី និងបញ្ហាយុត្តិធម៌ជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
រដ្ឋាភិបាលនៃគណបក្សប្រជាជនកម្ពុជា និងគណបក្សសង្គ្រោះជាតិ បានសម្តែងសុទិដ្ឋិនិយមចំពោះឆ្នាំ២០១៥ ដែលជាឆ្នាំនាំមកនូវការអភិវឌ្ឍសង្គម និងវប្បធម៌នសន្ទនារវាងរវាងបក្សប្រឆាំង និងរដ្ឋាភិបាល និងយុត្តិធម៌សង្គម។ តាមរយៈលិខិតអបអរឆ្នាំ២០១៥ លោកនាយករដ្ឋមន្ត្រីហ៊ុន សែន បានសម្តែងជំនឿទុកចិត្តថា ឆ្នាំ២០១៥នេះ នឹងនាំមកនូវវិបុលភាព វឌ្ឍនភាព និងកាលានុវត្តភាពថ្មីៗដល់ប្រទេសជាតិ តាមរយៈការយកចិត្តទុកដាក់លើមូលដ្ឋានគ្រឹះសេដ្ឋកិច្ច ដែលរួមានជាអាទិ៍ វិស័យកសិកម្ម ឧស្សាហកម្មកាត់ដេរ ទេសចរណ៍ និងវិស័យសំណង់។
លោកនាយករដ្ឋមន្ត្រីដែលជាអនុប្រធានគណបក្សប្រជាជនដែរនោះ បានបន្តថា ដើម្បីបង្កើន និងបន្តពង្រឹងការរីកចម្រើន រដ្ឋាភិបាលផ្តោតជាអទិភាព លើការអភិវឌ្ឍធនធានមនុស្ស បណ្តុះបណ្តាលបច្ចេកទេសវិជ្ជាជីវៈដល់យុវជន និងពង្រឹងអភិបាលកិច្ចល្អតាមរយៈយុទ្ធសាស្ត្រចតុកោណរបស់រដ្ឋាភិបាលជាដើម។ យ៉ាណាក៏ដោយលោកនាយករដ្ឋមន្ត្រី ក៏បានលើកឡើងពីសក្តានុពល និងសមិទ្ធផលដែលរដ្ឋាភិបាលនៃគណបក្សប្រជាជនកម្ពុជាបានសម្រេច ដូចជាការរក្សាកំណើនសេដ្ឋកិច្ច៧ភាគរយក្នុងមួយឆ្នាំ ការកាត់បន្ថយភាពក្រីក្រ១ភាគរយក្នុងមួយឆ្នាំដែលបច្ចុប្បន្នភាពក្រីក្រនៅកម្ពុជា មានតែ១៨ភាគរយតែប៉ុណ្ណោះ។
ដោយឡែកគណបក្សសង្គ្រោះជាតិវិញ រំពឹងថា ឆ្នាំ២០១៥ឆ្នាំថ្មីនេះ វប្បធម៌សន្ទនារវាងអ្នកនយោបាយបក្សប្រឆាំង និងបក្សកាន់អំណាចនឹងចាប់ផ្តើមចេញជាផ្លែផ្កា តាមរយៈការទទួលស្គាល់អំណាច និងឥទ្ធិពលនៃក្រុមសមាជិកសភាភាគតិចដែលជាដៃគូរសន្ទនាជាមួយនឹងប្រមុខរដ្ឋាភិបាល។នេះបើតាមការបញ្ជាក់ពីប្រធានកិច្ចការសាធារណៈលោកស្រី មួរ សុខហួរដែលបានប្រាប់វិទ្យុបារាំងនៅថ្ងៃពុធនេះ។
បើទោះបីជាមិនទាន់មានសេចក្តីថ្លែងការណ៍ជូនជនរួមជាតិនៅឡើយ ប៉ុន្តែប្រធានកិច្ចការសាធារណៈរូបនេះ បានបន្តថា បញ្ហាចម្រូងចម្រាស់ក្នុងសង្គម ដូចជាបញ្ហាដីធ្លី បញ្ហាអយុត្តិធម៌ក្នុងសង្គម នឹងត្រូវបានដោះស្រាយយ៉ាងមានប្រសិទ្ធភាពតាមរយៈកិច្ចការងាររបស់គណៈកម្មការសភា ដែលមានគណបក្សប្រឆាំងកាន់កាប់។ ហើយឆ្នាំ២០១៥ខាងមុខនេះ កម្ពុជានឹងមានច្បាប់ និងស្ថាប័នបោះឆ្នោតជាតិថ្មីមួយដែលសុក្រឹត និងយុត្តិធម៌ តាមរយៈកំណែទម្រង់ដែលគណបក្សសង្គ្រោះជាតិ បានខិតខំ។ មួយវិញទៀត លោកស្រីមួរ សុខហួរ ក៏មានសុទិដ្ឋិនិយមដែរថា ឆ្នាំ២០១៥ខាងមុខនេះ បញ្ហានៃការចាប់ដាក់ពន្ធនាគារនៃសកម្មជនគណបក្សប្រឆាំង និងសកម្មជនដីធ្លី ក៏អាចត្រូវបានដោះស្រាយផងដែរ។
ខុសពីរដ្ឋាភិបាលដែលរំលឹកពីវឌ្ឍនភាពសង្គមក្នុងឆ្នាំចាស់ ២០១៤ បក្សប្រឆាំង បានលើកឡើងថា ឆ្នាំ២០១៤ គឹជាឆ្នាំសោកសៅ ព្រោះតែមានការបាញ់សម្លាប់បាតុករក្នុងអំឡុងពេលបាតុកម្មនៅផ្លូវវ៉េងស្រេង ការចាប់ដាក់ពន្ធនាគារតំណាងរាស្ត្រនៃគណបក្សប្រឆាំងជាដើម។
យ៉ាងណាក៏ដោយ សម្រាប់ឆ្នាំ២០១៥ឆ្នាំថ្មីនេះ បើទោះបីជារដ្ឋាភិបាលដែលដឹកនាំដោយគណបក្សប្រជាជន និងគណបក្សសង្គ្រោះជាតិ បានបង្ហាញពីសុទិដ្ឋិនិយមពីរទិដ្ឋភាពក៏ដោយ ប៉ុន្តែវាត្រូវបានគេមើលឃើញថាជាដំណើរការឆ្ពោះទៅកាន់វឌ្ឍនភាពសង្គម និងសុខដុមរមនាក្នុងសង្គមតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ