ក្រសួងវប្បធម៌រកឃើញម្ចាស់ពានរង្វាន់រឿងខ្លីថ្នាក់ជាតិជាលើកទីមួយ
កម្មវិធីប្រកួតប្រជែងភាពយន្តខ្នាតខ្លីកម្ពុជាជាលើកដំបូងបង្អស់នៅសាលមហោស្រពចតុម្មុខចាប់ពីថ្ងៃទី៤មករារហូតដល់ថ្ងៃទី៧មករា បានបិទបញ្ចប់ហើយកាលពីយប់មិញ។ នៅទីបំផុត ក្រសួងវប្បធម៌ដែលជាអ្នករៀបចំកម្មវិធីនេះបានចម្រាញ់រកឃើញនូវម្ចាស់ជ័យលាភីបីរូបតាមរយៈសាច់រឿងខ្លីដ៏មានអត្ថន័យបីផ្សេងគ្នា។
ចុះផ្សាយនៅថ្ងៃ៖
ស្តាប់ - ០១:៥៥
រឿងខ្លីចំនួនបីដែលបានជាប់នៅក្នុងកម្មវិធីប្រកួតប្រជែងភាពយន្តខ្នាតខ្លីកម្ពុជានៅឆ្នាំនេះ គឺលេខ១បានទៅលើរឿង "ទឹកក្រហម" ដែលដឹកនាំដោយលោក លី ប៉ូឡែន មានរយៈពេលជាង១៤នាទី។ ចំណែកចំណាត់ថ្នាក់លេខ២វិញ បានទៅលើរឿង"២០ដុល្លារ"របស់លោកសាង ច័ន្ទវិសាល មានរយៈពេលជាង១២នាទី និងចំណាត់ថ្នាក់លេខបីគឺរឿង"សីលធម៌"របស់លោកយឹម សុសត្យា ដែលមានរយៈពេលត្រឹមតែជាង៥នាទីប៉ុណ្ណោះ។ សម្រាប់ម្ចាស់ជ័យលាភីលេខ១ទទួលបានពានមាសមួយនិងទឹកប្រាក់ចំនួន៣០០០ដុល្លារ។ លេខ២ ទទួលបានពានប្រាក់មួយ និងទឹកប្រាក់ចំនួន២០០០ដុល្លារ ហើយចំណែកលេខ៣ ទទួលបានពានសំរិទ្ធមួយនិង ទឹកប្រាក់ចំនួន១០០០ដុល្លារ។
លោកស៊ិន ចន្ទសាយ៉ា ប្រធាននាយកដ្ឋានភាពយន្តនិងទស្សនីយភាពរបស់ក្រសួងវប្បធម៌បានបញ្ជាក់ឲ្យដឹងថា ការប្រកួតប្រជែងរឿងខ្នាតខ្លីនេះ គឺគណៈកម្មការបានចម្រាញ់ជាពីរដំណាក់កាលលើរឿងទាំង១៨ដែលដាក់ចូលរួម។ ដោយដំបូងចម្រាញ់យក៥រឿង និងចុងក្រោយចម្រាញ់យកតែ៣រឿងជាជ័យលាភីតែម្តង។ បើតាមលោកស៊ិន ចន្ទសាយ៉ា ការជ្រើសរើសរឿងខ្លីទាំងនេះ គឺផ្អែកទៅតាមការវិនិច្ឆ័យ៦ចំណុចគឺ សាច់រឿង ការដឹកនាំ បច្ចេកទេសថត ការកាត់ត បច្ចេកទេសសំឡេង និង ការសំដែងរបស់តួអង្គនៅក្នុងរឿង។
សូមបញ្ជាក់ថា ការប្រកួតប្រជែងរឿងខ្នាតខ្លីនេះ គឺជាលើកទីមួយហើយដែលរៀបចំដោយនាយកដ្ឋានភាពយន្តនិងទស្សនីយភាពរបស់ក្រសួងវប្បធម៌ក្នុងគោលបំណងដើម្បីឲ្យមានដំណើរវិវត្តក្នុងវិស័យភាពយន្តខ្មែរ ឲ្យឈានឆ្ពោះទៅរកការផលិតខ្សែភាពយន្តខ្នាតវែង ទាំងរឿងកុនខ្នាតវែង និងរឿងដុំជាភាគៗសម្រាប់បញ្ចាំងតាមទូរទស្សន៍។ បើតាមស៊ិន ចន្ទសាយ៉ាដដែល នៅពេលនេះ ក្រសួងវប្បធម៌កំពុងពិចារណាក្នុងការរៀបចំការប្រកួតប្រជែងរឿងខ្លីនេះជាលើកទីពីរនៅចុងឆ្នាំ២០១៧នេះ ពោល គឺកំពុងគិតថា គួររៀបចំបញ្ចូលជាមួយកម្មវិធីប្រកួតប្រជែងរឿងខ្នាតវែងលើកទី៥នៅដើមខែធ្នូឆ្នាំនេះ ឫក៏យ៉ាណា?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ