គណបក្សហ្វ៊ុនស៊ិនប៉ិចធ្វើសមាជផ្លាស់ប្តូរលក្ខន្តិកៈ រៀបចំរចនាសម្ព័ន្ធ និងក្បាលម៉ាស៊ីនដឹកនាំថ្មី
គណបក្សហ្វ៊ុនស៊ិនប៉ិច បានធ្វើសមាជវិសាមញ្ញរបស់ខ្លួន នៅព្រឹកថ្ងៃទី១២មីនានេះ ដើម្បីរៀបចំរចនាសម្ព័ន្ធ និងក្បាលម៉ាស៊ីនដឹកនាំថ្មី។ សមាជនេះ ក៏បានសម្រេចកែប្រែលក្ខន្តិកៈ និងបទបញ្ជាផ្ទៃក្នុងថ្មី រួមទាំងការផ្លាស់ប្តូរ ស្លាកសញ្ញាគណបក្ស និងបាវចនាថ្មីផងដែរ។ សមាជគណបក្សកាលពីព្រឹកមិញ បានប្រព្រឹត្តទៅដោយរលូន តែមិនមានវត្តមានរបស់ព្រះអានុជ នរោត្តម អារុណរស្មី នោះទេ។
ចុះផ្សាយនៅថ្ងៃ៖
ស្តាប់ - ០៣:០៤
សមាជវិសាមញ្ញរបស់គណបក្សហ្វ៊ុនស៊ិនប៉ិច បានប្រព្រឹត្តទៅនៅឯមជ្ឈមណ្ឌលកោះពេជ្រ នាព្រឹកថ្ងៃព្រហស្បត្តិ៍ទី១២មីនានេះ ដោយបានសម្រេចអនុម័តលក្ខន្តិកៈថ្មី រួមមាន១៨ជំពូក និង៦០ប្រការ។ សមាជរបស់គណបក្សហ្វ៊ុនស៊ិនប៉ិច គឺធ្វើឡើង ដើម្បីរៀបចំរចនាសម្ព័ន្ធ និងក្បាលម៉ាស៊ីនដឹកនាំថ្មី ដោយបានសម្រេចកែប្រែលក្ខន្តិកៈ និងបទបញ្ជាផ្ទៃក្នុង រួមទាំងការផ្លាស់ប្តូរ ស្លាកសញ្ញាគណបក្ស និងបាវចនាថ្មីថែមទៀត។
លក្ខន្តិកៈថ្មីនេះ ត្រូវបានអានដោយលោក យូ ហុកគ្រី សមាជិកគណៈកម្មការចំពោះកិច្ច ១ជំពូកម្តងៗ មុនពេលថ្វាយសម្តេចក្រុមព្រះ នរោត្តម រណឬទ្ធិ ព្រះប្រធានគណបក្ស ប្រកាសអោយសមាជិកអង្គសមាជប្រមាណជា៥០០នាក់ អនុម័តដោយការទះដៃ។
សម្តេចក្រុមព្រះ នរោត្តម រណឬទ្ធិ៖“ខ្ញុំសុំអង្គសមាជវិសមញ្ញទាំងមូលនៃគណបក្សនៅថ្ងៃនេះ អាណិតមេត្តាអនុម័តនូវជំពូកទី៦នៃក្ខន្តិកៈថ្មីនៃគណបក្សរបស់យើង សូមមេត្តាអនុម័ត។
អង្គសមាជ ក៏បានសម្រេចជ្រើសតាំងអនុប្រធានគណបក្សចំនួន៤រូប រួមមានលោក ប៉ោ ប៊ុនស្រ៊ឺ, លោក យូ ហុកគ្រី, លោក នុត សុខុម, និងលោក ញ៉េប ប៊ុនជិន បន្ថែមលើអនុប្រធាន២រូបដែលកំពុងមានស្រាប់ គឺព្រះអានុជ នរោត្តម អារុណរស្មី ជាអនុប្រធានទី១ និងលោកញឹក ប៊ុនឆៃ ជាអនុប្រធានទី២។ លោក កែវ ពុទ្ធរស្មី ក៏មានឈ្មោះជាអនុប្រធានគណបក្សដែរ ប៉ុន្តែលោកបានសុំដកបេក្ខភាព។
ដោយឡែកសំរាប់រូបសញ្ញាថ្មីរបស់គណបក្សហ្វ៊ុនស៊ិនប៉ិចវិញគឺមានរាងជារង្វង់មូល ផ្ទៃពណ៌ខៀវ តំណាងទឹកដែលជាប្រភពនៃជីវិត។ -រូបសញ្ញា(ឱម)រឺអក្សរបាលីតំណាងអោយតេជះបារមី ត្រូវបានដាក់នៅចំកណ្ដាលលើសាស្ត្រា ដែលទ្រដោយជើងពាន និងព័ទ្ធជុំវិញដោយពន្លឺឆព្វណ្ណកាំរស្មីព័ទ្ធជុំវិញចំនួន២៥ ដែលតំណាងឱ្យខេត្ដទាំង ២៥នៅក្នុងប្រទេសកម្ពុជា។
- ភ្ញីទេសស្ថិតនៅពីក្រោមជើងពាន តំណាងអោយតំណាងអោយបរិស្ថាន និងភោគផលធម្មជាតិ
-នៅពីក្រោមភ្ញីទេស គឺសរសេរអក្សគណបក្សហ្វ៊ុនស៊ិនប៉ិច ដែលមានបាវចនា រាស្ដ្រធិបតេយ្យ សាសនា នីតិរដ្ឋរាជបល្ល័ង្ក ខុសពីស្លាកសញ្ញានិងបាវចនាគណបក្សចាស់ គឺមានរូបសញ្ញាវិមានឯករាជ្យ និង បាវចនា ជាតិ សាសនា ព្រះមហាក្សត្រ។
សូមបញ្ជាក់ថា សមាជគណបក្សហ្វ៊ុនស៊ិនប៉ិច នៅថ្ងៃទី១២មិនានេះ មិនមានព្រះវត្តមានរបស់ព្រះអណុច នរោត្តម អរុណរស្មី អនុប្រធានទី១ចូលរួមនោះទេ ខណៈដែលសមាជិកសំខាន់ៗមួយចំនួនទៀត ក៍មិនត្រូវអញ្ជើញអោយចូលរួមនោះដែរ ស្របពេលដែលសមាជិកថ្មីមកពីគណបក្សសង្គមរាស្ត្ររាជាធិបតេយ្យរបស់សម្តេចក្រុមព្រះដែលបានធ្វើរំលាយកាលពីថ្ងៃទី១៨មករា ពោលគឺ មុនមួយថ្ងៃ ដែលសមាជផ្ទេតំណែងថ្វាយសម្តេចក្រុមព្រះជាព្រះប្រធានគណបក្សហ្វ៊ុនស៊ិនប៉ិច កាលពីថ្ងៃទី១៩មករាឆ្នាំ២០១៥ ចូលរួមក្នុងការអនុម័តនូវលក្ខន្តិកៈនេះដែរ។
អ្វីជាការកត់សម្គាល់ អង្គសមាជរបស់គណបក្សហ្វ៊ុនស៊ិនប៉ិចជាលើកទី២នេះ គឺធ្វើឡើង ដើម្បីបញ្ចប់ជម្លោះផ្ទៃក្នុងរវាងក្រុមរបស់លោក ញឹក ប៊ុនឆៃ ដែលជាអតីតអគ្គលេខាធិការគណបក្សនិងសម្តេចក្រុមព្រះនរោត្តម រណឬទ្ធិ។ លោក ញឹក ប៊ុនឆៃ បច្ចុប្បន្នជាអនុប្រធានទី២គណបក្សហ្វ៊ុនស៊ិនប៉ិច ក៏បានចូលរួមនៅក្នុងអង្គសមាជនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ