លោកហ៊ុន សែន និងលោកសម រង្ស៊ី គ្មានគម្រោងជួបគ្នានៅបារាំង ខណៈកម្តៅនយោបាយនៅក្តៅ
លោកនាយករដ្ឋមន្រ្តីហ៊ុន សែន នឹងចាកចេញពីកម្ពុជានៅល្ងាចថ្ងៃសៅរ៍នេះ ដើម្បីទៅបំពេញទស្សនកិច្ច៣ថ្ងៃនៅបារាំងចាប់ពីថ្ងៃទី២៥ ដល់ថ្ងៃទី២៧ ខែតុលា ។ វត្តមានរបស់ប្រមុខរដ្ឋាភិបាលកម្ពុជានៅបារាំងក្នុងថ្ងៃស្អែកនេះ គឺស្របពេលដែលលោកសម រង្ស៊ី ប្រធានគណបក្សសង្រ្គោះជាតិកំពុងស្ថិតនៅទីនោះដែរ។ ក៏ប៉ុន្តែអ្នកនាំពាក្យគណបក្សទាំងពីរ បានបញ្ជាក់ថា ប្រមុខបក្សកាន់អំណាច និង ប្រឆាំង មិនមានគម្រោងជួបគ្នាឡើយ បើទោះបីស្ថានភាពនយោបាយឡើងកម្តៅវិញនៅពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:០៥
“មិនមានតម្រុយណាមួយនៃការណាត់ជួបគ្នារវាងប្រមុខគណបក្សប្រជាជនកម្ពុជា និង គណបក្សសង្រ្គោះជាតិនៅក្នុងប្រទេសបារាំងនោះឡើយ”។ នេះគឺជាការអះអាងដូចគ្នារបស់អ្នកនាំពាក្យគណបក្សជាប់ឆ្នោតទាំងពីរនៅថ្ងៃសៅរ៍ ទី២៤ តុលា។ បើទោះបីគ្មានគម្រោងជួបគ្នាដោយផ្ទាល់ ក៏ប៉ុន្តែលោកយ៉ែម ប៉ុញ្ញឫទ្ធិ អ្នកនាំពាក្យគណបក្សសង្រ្គោះជាតិ បានបញ្ជាក់ថា លោកសម រង្ស៊ី និង លោកហ៊ុន សែន អាចនឹងទាក់ទងគ្នាតាមរយៈសារអេឡិចត្រូនិក។
គួរជំរាបជូនថា លោកនាយករដ្ឋមន្ត្រីហ៊ុន សែន នឹងបំពេញទស្សនកិច្ចរយៈពេលបីថ្ងៃនៅក្នុងប្រទេសបារាំងតបតាមការអញ្ជើញរបស់លោកប្រធានាធិបតីហ្រ្វង់ស្វ័រ ហូឡង់(Francois Hollande) ចាប់ពីថ្ងៃទី២៥ ដល់ថ្ងៃទី២៧ ខែតុលា។ វត្តមានរបស់លោកហ៊ុន សែន នៅក្នុងប្រទេសបារាំងនេះ គឺស្របពេលដែលលោកសម រង្ស៊ី ប្រធានគណបក្សសង្រ្គោះជាតិកំពុងស្ថិតនៅទីនោះដែរ។ លោកសម រង្ស៊ី បានទៅកាន់ប្រទេសបារាំងតាំងពីថ្ងៃទី១២ ខែតុលា ឆ្នាំ២០១៥ ដើម្បីទៅជួបសកម្មជន និងអ្នកគាំទ្ររបស់ខ្លួន។
ជាការកត់សម្គាល់ នៅពេលថ្មីៗកន្លងទៅនេះ ស្ថានភាពនយោបាយនៅកម្ពុជា បានឡើងកម្តៅជាថ្មី។ គឺជាការឡើងកម្តៅ បន្ទាប់ពីប្រមុខរដ្ឋាភិបាលកម្ពុជាបានវាយប្រហារទៅលើការរិះគន់របស់លោកសម រង្ស៊ី ដែលបានបង្អាប់តម្លៃនៃសញ្ញាបត្រ និង ប្រព័ន្ធអប់រំនៅក្នុងស្រុកខ្មែរ។ គឺការឆ្លើយឆ្លងគ្នាអំពីរឿងប្រព័ន្ធអប់រំនេះហើយ បានឈានទៅដល់លោកហ៊ុន សែន អង្អុលមុខលោកយ៉ែម ប៉ុញ្ញឫទ្ធិ នៅក្នុងអំឡុងពេលប្រជុំរដ្ឋសភាទៀតផង។
ទោះជាយ៉ាងណា គណបក្សប្រជាជនកម្ពុជា និងគណបក្សសង្រ្គោះជាតិ បានគូសបញ្ជាក់ដូចគ្នាថា នេះមិនអាចកំទេចវប្បធម៌សន្ទនាដែលបង្កើតឡើងដោយប្រមុខបក្សទាំងពីរបានទេ។ លោកសុខ ឥសាន អ្នកនាំពាក្យគណបក្សប្រជាជនកម្ពុជានៅក្នុងវេទិកាតុមូលវិទ្យុបារាំងអន្តរជាតិកាលពីសុក្រ បានលើកឡើងថា ទោះបីមានការផ្លោងសារនយោបាយដាក់គ្នាទៅវិញទៅមកក៏ដោយ ក៏ប៉ុន្តែមិនធ្វើឲ្យវប្បធម៌សន្ទនាបាត់បង់ជីវិតឡើយ។ ចំណែកលោកយឹម សុវណ្ណ អ្នកនាំពាក្យគណបក្សសង្រ្គោះជាតិវិញ មានជំនឿថា វប្បធម៌សន្ទនានឹងមានជីវិតជាអមតៈ ។ អ្នកនាំពាក្យទាំងពីរ បានលើកឡើងដូច្នេះ ក៏ព្រោះតែមើលឃើញថា វប្បធម៌សន្ទនាបានធ្វើឲ្យគណបក្សទាំងពីរសម្រេចបានកិច្ចការជាតិធំៗជាមួយគ្នានាពេលកន្លងមកដូចជា ការរួមគ្នាធ្វើវិសោធនកម្មច្បាប់បោះឆ្នោតក្រុមប្រឹក្សាឃុំសង្កាត់ និង ការធ្វើវិសោធនកម្មបទបញ្ជាផ្ទៃក្នុងនៃរដ្ឋសភាក្នុងពេលថ្មីៗកន្លងទៅនេះជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ