អ្នកវិភាគសង្គម៖ សមាជិក គ.ជ.ប ចូលរួមសកម្មភាពសង្គមគ្មានបញ្ហាអ្វីនោះទេ
លោកកែម ឡី អ្នកស្រាវជ្រាវការអភិវឌ្ឍន៍សង្គមបានប្រាប់វិទ្យុបារាំងថា ការចូលរួមកិច្ចការសង្គមគឺប្រជាពលរដ្ឋទាំងអស់មានសិទ្ធិស្មើគ្នា ហើយទិវាពលកម្មអន្តរជាតិកាលពីពេលថ្មីៗនេះ គឺជាកិច្ចការសង្គម ដែលវាមិនមែនជាកិច្ចការឃោសនាគណបក្សនយោបាយណាមួយឡើយ។ ដូច្នេះការចូលរួមក្នុងទិវាពលកម្មអន្តរជាតិរបស់លោក រ៉ុង ឈុន វាមិនមានបញ្ហាអ្វីទាស់ខុសអ្វីនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
អ្នកវិភាគនយោបាយ និងព្រឹត្តិការណ៍សង្គមកម្ពុជា លោកកែម ឡី បានយល់ឃើញចំពោះ សកម្មភាពចូលរួមក្នុងទិវាពលកម្មអន្តរជាតិរបស់លោករ៉ុង ឈុន កាលពីថ្ងៃទី១ ឧសភា ថាប្រសិនបើ ទិវាអន្តរជាតិវាជាកិច្ចការសង្គម នោះមិនត្រូវរិតត្បិតទេ។ ប៉ុន្តែ ប្រសិនបើច្បាប់ចែងថា សមាជិក គណៈកម្មាធិការជាតិរៀបចំការបោះឆ្នោតមិនអាចចូលរួមក្នុងសកម្មភាពគណបក្សនយោបាយ និងក្នុងកិច្ចការសង្គមទេ នោះសមាជិកទាំងអស់មិនត្រូវចូលរួមឡើយ។ លោកបន្តថាយើងគ្រប់គ្នាត្រូវតែគោរពច្បាប់ ប៉ុន្តែច្បាប់ត្រូវតែមានភាពស្មើគ្នាឲ្យត្រូវតាមស្តងដារ។
សកម្មភាពរបស់លោក រ៉ុង ឈុន ត្រូវបានលោក សួស យ៉ារ៉ា អ្នកនាំពាក្យគណបក្សប្រជាជនកម្ពុជា ចាត់ទុកថា បង្ហាញពីទំនាស់ផលប្រយោជន៍ និងប៉ះពាល់ដល់តម្លៃ គ.ជ.ប។ ចំណែកលោករុង ឈុន បានបញ្ជាក់ថា លោកគ្រាន់តែទៅឃ្លាំមើល និងឈរពីចម្ងាយតែប៉ុណ្ណោះ ហើយលោកបញ្ជាក់ប្រាប់វិទ្យុបារាំងទៀតថា ពេលនោះគឺជាពេលក្រៅម៉ោងរដ្ឋបាល។
គួរជម្រាបថា កាលពីថ្ងៃទី ១ឧសភាម្សិលមិញ លោក រ៉ុង ឈុន ដែលជាសមាជិកមួយរូបរបស់គ.ជ.ប បានទៅមុខរដ្ឋសភាជាតិ ស្របពេលដែលមានក្បួនដង្ហែរបស់សហជីពនិងបក្សសង្គ្រោះជាតិ នៅថ្ងៃពលកម្មអន្តរជាតិ។
ចំណែកលោក ស៊ិក ប៊ុនហុក ជាប្រធានគណៈកម្មាធិការជាតិរៀបចំការបោះឆ្នោតបានបញ្ជាក់ប្រាប់វិទ្យុបារាំងថា សកម្មភាពរបស់លោក រុង ឈុន ដែលជាសមាជិកគ.ជ.ប គឺជាសកម្មភាពដែលមិនធ្លាប់មានទេសម្រាប់សមាជិកគ.ជ.ប។ លោកចាត់ទុកថានេះ គឺជាសកម្មភាពខុសប្រក្រតី។ ហើយ នៅថ្ងៃច័ន្ទ ទី៤ លោកនឹងដាក់បញ្ហានេះ ជាកម្មវត្ថុមួយក្នុងការប្រជុំ ហើយចំពោះលទ្ធផលយ៉ាងណានោះ គឺ គ.ជ.ប នឹងសម្រេចនៅថ្ងៃច័ន្ទ ទី។ លោកបន្ថែមថា ប្រសិនបើរកឃើញកំហុស គ.ជ.ប គឺគ្រាន់តែប្រមានតែប៉ុណ្ណោះ ហើយគ្មានការបណ្តេញសមាជិករបស់លោកចេញនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ