លោក ហេង សំរិន៖ សភានឹងទទួលយកការផ្តល់យោបល់ពីគ្រប់ភាគី
ដូចការគ្រោងទុករដ្ឋសភាជាតិនៅព្រឹកថ្ងៃទី៨ កក្កដានេះ បានបើកសិក្ខាសាលាថ្នាក់ជាតិស្តីពីការពិគ្រោះយោបល់លើសេចក្តីព្រាងច្បាប់សមាគមនិងអង្គកាមិនមែនរដ្ឋាភិបាល។ សិក្ខាសាលានេះ ចូលរួមដោយតំណាងរាស្ត្រគណបក្សប្រជាជនកម្ពុជា និងសង្គមស៊ីវិលមួយចំនួន រួមទាំងអង្គទូតប្រចាំនៅកម្ពុជា ប៉ុន្តែលោកកឹម សុខា អនុប្រធានសភា និងជាអនុប្រធានគណបក្សសង្គ្រោះជាតិមិនចូលរួមទេ។
ចុះផ្សាយនៅថ្ងៃ៖
ស្តាប់ - ០២:៤១
«រដ្ឋសភានឹងទទួលយករាល់មតិយោបល់ពីអ្នកចូលរួមទាំងអស់លើច្បាប់ស្តីពីអង្គការសង្គមស៊ីវិល ដើម្បីឱ្យមានការវិវឌ្ឍល្អប្រសើរ»។ នេះគឺជាការថ្លែងពីលោក ហេង សំរិន ប្រធានរដ្ឋសភាមុនការពិភាក្សាក្នុងសិក្ខាសាលា។ ប្រធានសភារូបនេះ បន្ថែមថា ច្បាប់ស្តីពីអង្គការនិងសង្គមស៊ីវិល គឺជាយន្តការស្របច្បាប់របស់អង្គការក្រៅស្រុកនិងក្នុងស្រុកដែលដំណើរការនៅកម្ពុជា ព្រោះថា អង្គការក្រៅរដ្ឋាភិបាល គឺជាដៃគូរមិនអាចខ្វះបានក្នុងសង្គមកម្ពុជា។ កម្ពុជាដែលដែលជាប្រទេសនៅមានការខ្វះខាត។ បន្ថែមពីលើនេះ ប្រធានសភា បានសង្កត់ធ្ងន់ថាច្បាប់ NGO គឺស្របទៅតាមច្បាប់រដ្ឋធម្មនុញ្ញកម្ពុជា ហើយច្បាប់ដែលចម្រូងចម្រាស់នេះ គឺនឹងលើកស្ទួយប្រជាធិបតេយ្យនៅកម្ពុជា។
ក្នុងសិក្ខាសាលាដែលមានមនុស្សប្រមាណជាង៦០០នាក់នេះ លោកឈាង វុន ប្រធានគណៈកម្មការទី៥ របស់រដ្ឋសភា លោក ប៉ុល លឹម រដ្ឋលេខាធិការក្រសួងមហាផ្ទៃ ទទួលផែន និតិកម្ម និងលោក កើត រិទ្ធ រដ្ឋលេខាធិការក្រសួងយុត្តិធម៌ ជាអ្នកដឹកនាំការពិភាក្សា។ ការពិភាក្សាមានសភាពស្វិតស្វាញ មានមកគ្រប់មជ្ឈដ្ឋាន ទាំងគាំទ្រនិងប្រឆាំង រួមទាំងការស្នើឱ្យកែតម្រូវ ពីអ្នកចូលរួម។ លោក ប៉ុល លឹម បានបញ្ជាក់ថា ការអនុវត្តហួសដែនសមត្ថកិច្ចរបស់អង្គការមួយចំនួន ក៏ជាមូលហេតុដែលជំរុញឱ្យមានការបង្កើតច្បាប់នេះផងដែរ។ ច្បាប់ស្តីពីសមាគម និងអង្គការក្រៅរដ្ឋាភិបាលនេះ គឺមាន៩ជំពូក និង៣៩មាត្រា។
សង្គមស៊ីវិល និងគណបក្សសង្គ្រោះជាតិ បានបង្ហាញជំហរួមគ្នាប្រឆាំងនឹងសេចក្តីព្រាងច្បាប់ថ្មីនេះ។ ប្រឆាំងក៏ព្រោះតែច្បាប់នេះ គឺបានបំពានរដ្ឋធម្មនុញ្ញកម្ពុជា និងសេចក្តីថ្លែងការណ៍ជាសកលស្តីពីសិទ្ធមនុស្សរបស់អង្គការសហប្រជាជាតិ រួមទាំងអនុសញ្ញាអន្តរជាតិផ្សេងៗទៀតដែលកម្ពុជាបានប្រទេសហត្ថលេខី។ គណបក្សសង្គ្រោះជាតិដែលមិនបានចូលរួមក្នុងសិក្ខាសាលានេះ បានអះអាងថា សមាជិកទាំង៥៥រូប គឺនឹងមិនបោះឆ្នោតលើកដៃអនុម័តសេចក្តីព្រាងច្បាប់ថ្មីនេះទេ។ លោក ឈាង វុន បានបញ្ជាក់ថា គណបក្សទាំងពីរបានផ្លាស់ប្តូរយោបល់គ្នា និងពិភាក្សាចំនួន៤ដង។ បើតាមលោក ឈាង វុន ច្បាប់នេះគឺមិនអាចបំពេញចិត្តមនុស្ស ១០០%នោះទេ ប៉ុន្តែច្បាប់ត្រូវតែមាន។
លោក សឿង សារឿន នាយកប្រតិបត្តិអង្គកានៃវេទិការអង្គការក្រៅរដ្ឋាភិបាលស្តីពីកម្ពជាបានលើកឡើងក្នុងសិក្ខាសាលាថា សង្គមស៊ីវិលមិនអាចទទួលយកបាននោះទេ ព្រោះថាមាន២៥មាត្រា ក្នុងចំណោម ៣៩មាត្រា ដែលមានពាក្យពេចន៍មិនច្បាស់លាស់ និងប្រាស់ចាកពីរដ្ឋធម្មនុញ្ញកម្ពុជា។ នាយកប្រតិបត្តិរូបនេះ បានអះអាងថាលោកគ្មានជំនឿងថារដ្ឋសភានឹងយកយោបល់ពីសង្គមស៊ីវិលនោះទេ។ សម្រាប់អង្គការរបស់លោក ការធ្វើពហិការមិនចូលធ្វើការ ការត្រៀមមេធាវីសម្រាប់ប្តឹងទាស់ជាមួយរដ្ឋាភិបាលក្នុងរណីចាំបាច់ ក៏មានរួចហើយដែរបើច្បាប់ថ្មីនេះគ្មានការកែប្រែនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ