សាលាក្រុងថា នឹងដោះស្រាយបញ្ហាបុរីកីឡាឲ្យចប់នៅក្នុងឆ្នាំថ្មីនេះ
សាលារាជធានីភ្នំពេញ បានអះអាងថា នឹងស្វែងរកដំណោះស្រាយ ដើម្បីបញ្ចប់បញ្ហាជម្លោះដីធ្លីដ៏រ៉ាំរ៉ៃនៅតំបន់បុរីកីឡាឲ្យចប់សព្វគ្រប់នៅក្នុងអំឡុងឆ្នាំថ្មី២០១៥ នេះ។ ការអះអាងនេះ បានធ្វើឡើងស្របពេលដែលអ្នកភូមិបុរីកីឡាប្រមាណជាង៣០ នាក់នៅព្រឹកថ្ងៃសុក្រនេះ បានមកតវ៉ាដាក់ញត្តិនៅសាលារាជធានីភ្នំពេញ និងរដ្ឋសភាជាតិ ដើម្បីឲ្យស្ថាប័នទាំងនេះរកដំណោះស្រាយជូនពួកគេ។ យ៉ាងណាក៏ដោយ អ្នកភូមិបុរីកីឡា មិនមានជំនឿចំពោះលើកឡើងរបស់សាលារាជធានីភ្នំពេញនេះនោះទេ។
ចុះផ្សាយនៅថ្ងៃ៖
ស្តាប់ - ០២:៣៥
លោកឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងប្រាប់បារាំងអន្តរជាតិថា សាលារាជធានីភ្នំពេញ មានបំណងចង់បញ្ចប់បញ្ហាជម្លោះដីធ្លីនៅក្នុងតំបន់បុរីកីឡាឲ្យចប់ក្នុងពេលឆាប់ៗ ពោលគឺចង់បញ្ចប់បញ្ហាទាំងនោះនៅក្នុងអំឡុងឆ្នាំ២០១៥នេះតែម្តង។ ការលើកឡើងរបស់អ្នកនាំពាក្យសាលារាជធានីភ្នំពេញនេះ គឺធ្វើឡើងស្របពេលដែលបញ្ហាជម្លោះដីធ្លីដ៏រ៉ាំរ៉ៃនៅក្នុងតំបន់បុរីកីឡាមិនទាន់ត្រូវបានដោះស្រាយបញ្ចប់ និងចំពេលដែលអ្នកភូមិបុរីកីឡាប្រមាណជាង ៣០នាក់ធ្វើការតវ៉ាដាក់ញត្តិនៅសាលារាជធានីភ្នំពេញ និងរដ្ឋសភាជាតិនៅព្រឹកថ្ងៃសុក្រ ទី០២ មករា ឆ្នាំ២០១៥។ ជាការតវ៉ារំលឹកដល់ខួបបីឆ្នាំនៃការបណ្តេញចេញ និង ឈូសឆាយកម្ទេចលំនៅឋានប្រជាពលរដ្ឋនៅក្នុងតំបន់បុរីកីឡាដោយអាជ្ញាធរ និងក្រុមហ៊ុន ផាន អ៊ីមិច។
គួររំលឹកថា បញ្ហាជម្លោះដីធ្លីនៅក្នុងតំបន់បុរីកីឡានេះ បានកើតឡើងកាលពីអំឡុងដើមឆ្នាំ២០១២កន្លងទៅ ដោយអាជ្ញាធរ និងក្រុមហ៊ុន ផាន អ៊ីមិចបានឈូសបំផ្លាញលំនៅឋានប្រជាពលរដ្ឋ និងបានជម្លៀសប្រជាពលរដ្ឋទាំងបង្ខំចេញពីតំបន់បុរីកីឡា។ ជាបន្តបន្ទាប់ អ្នកភូមិបុរីកីឡា បានចេញធ្វើការតវ៉ានៅមុខសាលារាជធានីភ្នំពេញ និងស្ថាប័នពាក់ព័ន្ធផ្សេងទៀត ដើម្បីស្វែងរកដំណោះស្រាយជូនពួកគេ។ ហើយកាលពីខែសីហាឆ្នាំ២០១៤ សាលារាជធានីភ្នំពេញបានបើកវេទិកាសាធារណៈមួយដោយអនុញ្ញាតឲ្យអ្នកភូមិបុរីកីឡា ដែលមិនទាន់បានដោះស្រាយបញ្ហាដីធ្លី ឡើងបញ្ចេញមតិនិងផ្តល់ឯកសារពាក់ព័ន្ធនានា។ សាលាក្រុងបានបង្កើតគណៈកម្មការមួយ ដោយមានការចូលរួមពីអង្គការសង្គមស៊ីវិលដើម្បីដោះស្រាយបញ្ហាទាំងនោះ ។ក្រោយមក អង្គការសង្គមស៊ីវិលបានដកខ្លួនចេញវិញ ដែលធ្វើឲ្យគណៈកម្មការនោះមិនអាចដំណើរការទៅមុខបាន។
ក៏ប៉ុន្តែ នៅពេលនេះអង្គការសង្គមស៊ីវិលទាំងនោះ បានមកចូលរួមជាមួយគណៈកម្មការដោះស្រាយទំនាស់ដីធ្លីនៅបុរីកីឡានោះវិញ ហើយសាលារាជធានីភ្នំពេញនឹងពន្លឿនការដោះស្រាយបញ្ហាឲ្យចប់ក្នុងពេលឆាប់ៗខាងមុខនេះ។ នេះ បើតាមការលោកឡុង ឌីម៉ង់ដដែល។
យ៉ាងណាក៏ដោយ អ្នកភូមិបុរីកីឡា មិនមានជំនឿលើការអះអាងរបស់សាលារាជធានីភ្នំពេញនេះនោះទេ។ អ្នកស្រីឆាយ គឹមហ៊ន តំណាងអ្នកភូមិបុរីកីឡា បានលើកឡើងថា សាលារាជធានីភ្នំពេញ ធ្លាប់បានសន្យាពន្លឿនការដោះស្រាយរបៀបនេះជាច្រើនដងមកហើយ ប៉ុន្តែមិនដែលធ្វើបានដូចការសន្យានោះឡើយ។ អ្នកស្រី បន្តថា បើចង់ឲ្យអ្នកភូមិបុរីកីឡាមានជំនឿចិត្តនោះ ទាល់តែសាលារាជធានីភ្នំពេញ ធ្វើឲ្យមានលទ្ធផលជាក់ស្តែង។
ទោះជាបែបនេះក្តី សម្រាប់លោកសៀ ភារម្យ នាយកអង្គការក្រុមការងារពិសេសសិទ្ធិលំនៅឋាន ហាក់មានជំនឿលើសាលារាជធានីភ្នំពេញដោយលោកលើកឡើងថា ប្រសិនបើសាលារាជធានីភ្នំពេញមានឆន្ទៈពិតប្រាកដក្នុងការដោះស្រាយបញ្ហានោះ បញ្ហាជម្លោះដីធ្លីនៅក្នុងតំបន់បុរីកីឡានេះ អាចនឹងដោះស្រាយបញ្ចប់នៅពេលណាក៏បាន។
លោកឡុង ឌីម៉ង់ បានគូសបញ្ជាក់ថា សាលារាជធានីភ្នំពេញ ចង់បញ្ចប់បញ្ហាទាំងនោះឲ្យបានឆាប់ដែលអាចធ្វើទៅបាន ដើម្បីមានពេលវេលាទៅអភិវឌ្ឍតំបន់សហគមន៍ក្រីក្រផ្សេងទៀតនៅក្នុងរាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ