គណបក្សនយោបាយមួយចំនួនប្រកាសចុះជួយជនរងគ្រោះដោយជំនន់ទឹកភ្លៀង
គណបក្សនយោបាយតូចៗមួយចំនួនបានប្រកាសផ្ដល់ជំនួយមនុស្សធម៌ដល់ជនគ្រោះដោយសារជំនន់ទឹកភ្លៀងនៅតាមខេត្តមួយចំនួន ដោយមិនផ្សារភ្ជាប់នឹងការឃោសនាពីគោលនយោបាយរបស់គណបក្សឡើយ។ តាមរយៈសកម្មភាពនេះមន្ត្រី គ.ជ.ប បានអះអាងថា គណបក្សនយោបាយត្រូវតែបែងចែកឲ្យបានច្បាស់ចំពោះការផ្ដល់អំណោយនោះថា ធ្វើឡើងនៅក្នុងសកម្មភាពមនុស្សធម៌ មិនមែនជាការទិញសន្លឹកឆ្នោត។
ចុះផ្សាយនៅថ្ងៃ៖
ប្រធានគណបក្សខ្មែរក្រោក លោក សុខ សុវណ្ណវឌ្ឍនាសាពង្ស បានអះអាងថាក្រោយបញ្ចប់ការឃោសនានៅក្នុងខេត្តកំពង់ស្ពឺ ជាទីដែលរងគ្រោះខ្លាំងដោយសារទឹកជំនន់ គណបក្សលោកនឹងធ្វើការចែកអំណោយជាស្បៀងទៅកាន់ពលរដ្ឋរងគ្រោះក្នុងនាមជាខ្មែរដូចគ្នា។ បើតាមលោក សុខ សុវណ្ណវឌ្ឍនាសាពង្ស រូបលោកនឹងដោះមួកនិងអាវបក្សចេញ ដើម្បីផ្ដល់អំណោយទៅពលរដ្ឋ។ សកម្មភាពនេះត្រូវបានលោកប្រធានបក្សខ្មែរក្រោកអះអាងថា ធ្វើឡើងមិនមែនដើម្បីប្ដូរយកសន្លឹកឆ្នោតពីប្រជាពលរដ្ឋនោះទេ។ នេះបើតាមប្រធានគណបក្សខ្មែរក្រោក។
ដោយឡែក សកម្មភាពផ្ដល់អំណោយរបស់គណបក្សយុវជនកម្ពុជាវិញ ត្រូវបានទប់ស្កាត់ដោយអាជ្ញាធរខេត្តកំពង់ស្ពឺ ក្រោមហេតុផលថាផ្ទុយពីច្បាប់បោះឆ្នោត។ ប្រឈមបញ្ហានេះ គណបក្សយុវជនក៏សម្រេចចិត្តលើកពេលផ្ដល់អំណោយមនុស្សធម៌នេះ នៅក្រោយការបោះឆ្នោតវិញ។ ប៉ុន្តែគណបក្សយុវជនកម្ពុជាបានបដិសេធថា ការផ្ដល់អំណោយរបស់គណបក្សលោកមិនមែនជាការទិញទឹកចិត្តឡើយ ដោយគ្រាន់ជាសកម្មភាពមនុស្សធម៌ជួយជនរងគ្រោះព្រោះទឹកជំនន់តែប៉ុណ្ណោះ។ នេះបើតាមការបញ្ជាក់របស់លោក ឆុម ចាន់ថន អគ្គលេខាធិការគណបក្សយុវជនកម្ពុជា។
ប៉ុន្តែយ៉ាងណាក៏ដោយប្រធានគណបក្សអភិវឌ្ឍន៍សេដ្ឋកិច្ច លោក ហួន រាជចំរើន ចាត់ទុកថាការជួយសង្គ្រោះពលរដ្ឋរងគ្រោះដោយសារទឹកជំនន់គឺជាកាតព្វកិច្ចរបស់រដ្ឋាភិបាលទេ។ ការផ្ដល់អំណោយជួយសង្គ្រោះជនរងគ្រោះដោយទឹកជំនន់ ត្រូវបានលោក ហួន រាជចំរើន ចាត់ទុកថា សកម្មភាពនេះធ្វើឡើងក្នុងគោលបំណងចង់បានការគាំទ្រពីពលរដ្ឋប៉ុណ្ណោះ។ ផ្អែកតាមសភាពការណ៍គ្រោះទឹកជំនន់ គណបក្សខ្មែរអភិវឌ្ឍន៍សេដ្ឋកិច្ច សម្រេចផ្អាកការឃោសនានៅតំបន់លិចទឹក តែបន្តចែកខិតបណ្ណបក្សនៅខេត្តកណ្ដាល។
ជុំវិញសកម្មភាពនៃការផ្ដល់អំណោយបូករួមនឹងដំណើរការឃោសនានេះ គ.ជ.ប ស្នើឲ្យបណ្ដាគណបក្សនយោបាយបែងចែកដាច់រវាងការទិញទឹកចិត្ត និងសកម្មភាពមនុស្សធម៌។ លោក សោម សូរីដា អគ្គលេខាធិការរងគ.ជ.ប បានគូសបញ្ជាក់ថា ប្រសិនអំណោយធ្វើឡើងដោយការផ្សារភ្ជាប់នឹងការអំពាវនាវឲ្យពលរដ្ឋបោះឆ្នោតជូន នោះវានឹងក្លាយរឿងខុសច្បាប់។ ប៉ុន្តែបើគ្រាន់តែជំនួយមនុស្សធម៌ លោក សោម សូរីដា អំពាវនាវឲ្យអាជ្ញាធរជួយសម្របសម្រួលតាមលទ្ធភាពជាក់ស្ដែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ