តុលាការកំពូលសម្រេចច្រានចោលបណ្តឹងសុំនៅក្រៅឃុំ លោកស៊ុំ ពុទ្ធី
តុលាការកំពូល កាលពីព្រឹកថ្ងៃទី៦ខែកុម្ភៈនេះ បានសម្រេចបដិសេធបណ្តឹងសុំនៅក្រៅឃុំរបស់លោកស៊ុំ ពុទ្ធី សមាជិកក្រុមប្រឹក្សាខណ្ឌច្បារអំពៅ មកពីគណបក្សសង្គ្រោះជាតិ បន្ទាប់ពីបើកសវនាការជំនុំជម្រះអស់រយៈពេលប៉ុន្មានម៉ោងរួចមក។ ការបដិសេធ ដោយយោងទៅលើហេតុផលថា សំណុំរឿងនេះ កំពុងស្ថិតនៅក្នុងដំណាក់កាលជំនុំជម្រះ។ ប៉ុន្តែក្រុមមេធាវី អះអាងថា នឹងបន្តប្តឹងសុំនៅក្រៅឃុំបន្តទៀត ដោយសម្អាងលើហេតុផលសុខភាព។
ចុះផ្សាយនៅថ្ងៃ៖
ស្តាប់ - ០២:១៥
សេចក្តីសម្រេចនេះ បានធ្វើឡើងនៅព្រឹកថ្ងៃទី៦កុម្ភៈ នៅចំពោះមុខជនជាប់ចោទលោកស៊ុំ ពុទ្ធី សមាជិកក្រុមប្រឹក្សាខណ្ឌច្បារអំពៅមកពីគណបក្សសង្គ្រោះជាតិ និងមេធាវីរបស់លោកចំនួន៣រូប។ សេចក្តីសម្រេចបានធ្វើឡើង បន្ទាប់ពីចៅក្រម៥រូបរបស់តុលាការកំពូលដឹកនាំដោយលោកចៅក្រម ឃឹម ប៉ុណ ប្រធានតុលាការកំពូល បានបើកសវនាការជំនុំជម្រះអស់រយៈពេលប៉ុន្មានម៉ោងរួចមក។ នៅក្នុងបន្ទប់សវនាការ លោកចៅក្រម ឃឹម ប៉ុណ ប្រធានក្រុមប្រឹក្សាជំនុំជម្រះតុលាការកំពូល អមដោយចៅក្រមចំនួន៤រូបផ្សេងទៀត បានប្រកាសតម្កល់សាលក្រមរបស់តុលាការសាលាឧទ្ធរណ៍ ដោយយោងទៅលើហេតុផលថា សំណុំរឿងនេះ កំពុងស្ថិតនៅក្នុងដំណាក់កាលជំនុំជម្រះ ហើយថា ជាសំណុំរឿង ដែលបានបិទបញ្ចប់ការស៊ើបអង្កេតទៅហើយ។
ដូច្នេះ វត្តមានរបស់ជនជាប់ចោទនៅក្នុងអង្គសវនាការ គឺជារឿងចាំបាច់។ ប៉ុន្តែនៅក្នុងសវនាការកាលពីព្រឹកថ្ងៃសុក្រទី៦កុម្ភៈនេះ លោកស៊ុំ ពុទ្ធី បានលើកឡើងថា លោកមានបញ្ហាសុខភាពចុះខ្សោយយ៉ាងខ្លាំង។ នេះបើតាមការបញ្ជាក់ពីលោកសំ សុគង់ មេធាវីការពារក្តី។
លោកសំ សុគង់ មេធាវីម្នាក់ក្នុងចំណោមមេធាវីទាំងបីនាក់របស់លោកស៊ុំ ពុទ្ធី បានលើឡើងថា នៅថ្ងៃទី១០កុម្ភៈខាងមុខនេះ តុលាការសាលាដំបូងរាជធានីភ្នំពេញ នឹងបើកសវនាការជាថ្មី លើបណ្តឹងសុំនៅក្រៅឃុំ ដោយយោងលើបញ្ហាសុខភាពរបស់កូនក្តីលោក បើទោះបីជាតុលាការកំពូលបានច្រានចោលបណ្តឹងសុំនៅក្រៅឃុំនៅថ្ងៃនេះក្តី។ លោកស៊ុំ ពុទ្ធី អាយុ៥៩ឆ្នាំ កំពុងប្រឈមនឹងជំងឺបីប្រភេទ គឺជំងឺទឹកនោមផ្អែម ជំងឺលើសឈាម និងជំងឺខ្លាញ់រុំបេះដូង។
សូមបញ្ជាក់ថា លោកស៊ុំ ពុទ្ធី ជាសមាជិកក្រុមប្រឹក្សាខណ្ឌច្បារអំពៅមកពីគណបក្សសង្គ្រោះជាតិ បានរងការចោទប្រកាន់ថា បានពាក់ព័ន្ឋនឹងអំពើហិង្សានៅក្បែទីលានប្រជាធិបតេយ្យ កាលពីថ្ងៃទី១៥ កក្កដា ២០១៤។ នៅក្នុងសំណុំរឿងនេះ មានជនជាប់ចោទជាសកម្មជនគណបក្សប្រឆាំងចំនួន១១រូប និងតំណាងរាស្ត្រចំនួន៧រូប។ ប៉ុន្តែបច្ចុប្បន្ន មានតែសកម្មជនគណបក្សប្រឆាំង៥រូបប៉ុណ្ណោះ ដែលកំពុងជាប់ឃុំ ក្នុងនោះក៏មានលោក មាជ សុវណ្ណារ៉ា ប្រធាននាយកដ្ឋានព័ត៌មានរបស់គណបក្សសង្គ្រោះជាតិផងដែរ។
សំណុំរឿងអំពើហិង្សានៅក្បែរទីលានប្រជាធិបតេយ្យ នឹងត្រូវតុលាការសាលាដំបូងរាជធានីភ្នំពេញលើកយកមកបើកសវនាការកាត់ទោសជាលើកទី៣ នៅថ្ងៃទី២៣ខែកុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ