លោក ហ៊ុន សែន ជំរុញឲ្យអ្នកពាក់ព័ន្ធរូតរះបិទបញ្ចប់បណ្ដឹងពាក់ព័ន្ធសហជីពត្រឹមចុងឆ្នាំ
ដំណាច់ឆ្នាំ២០១៨ គឺជាគោលដៅមួយដែល លោកនាយករដ្ឋមន្ត្រី ហ៊ុន សែន ជំរុញឲ្យស្ថាប័នពាក់ព័ន្ធដោយរួមមាន៖ ក្រសួងការងារ ក្រសួងយុត្តិធម៌ តុលាការ និងមេសហជីពខ្លួនឯងធ្វើការរួមគ្នាដើម្បីឈានទៅបិទបញ្ចប់សំណុំរឿងពាក់ព័ន្ធនឹងសហជីពឲ្យបានឆាប់។ នេះជាលើកទី២ហើយ ដែលប្រមុខរដ្ឋាភិបាលជំរុញឲ្យពន្លឿនដោះស្រាយបណ្ដឹងពាល់ព័ន្ធសហជីព។ មេដឹកនាំសហជីពនានា ដែលកំពុងជាប់បណ្ដឹងតុលាការឲ្យដឹងថា ពួកគេបានបំពេញបែបបទរួចហើយ ក្នុងការរំដោះខ្លួនចេញពីការចោទប្រកាន់នានា។
ចុះផ្សាយនៅថ្ងៃ៖
ពីលើវេទិការជួបសំណេះសំណាលជាមួយកម្មករ កម្មការិនី ក្នុងខេត្តកណ្ដាលនៅថ្ងៃពុធនេះ លោកនាយករដ្ឋមន្ត្រី ហ៊ុន សែន បានអំពាវនាវដល់សហជីព ដែលជាប់បណ្ដឹងទាំងឡាយ បញ្ជូនពាក្យបណ្ដឹងទៅរដ្ឋមន្ត្រីក្រសួងការងារ។ រដ្ឋមន្ត្រីក្រសួងការងារនឹងធ្វើការងារនេះបន្តជាមួយរដ្ឋមន្ត្រីក្រសួងយុត្តិធម៌ ដើម្បីដោះស្រាយបណ្ដឹងទាក់ទងសហជីពឲ្យបានឆាប់រហ័ស។ ក្រោយបំពេញការងាររួមគ្នារវាងរដ្ឋមន្ត្រីក្រសួងទាំងពីរកន្លងមក ពេលនេះតុលាការកំពុងពន្លឿនការស៊ើបអង្កេត។ បើតាមលោក ហ៊ុន សែន ក្រោយការស៊ើបអង្កេត មេសហជីពអាចរួចផុតពីការជំនុំជម្រះ ឬក៏តម្កល់រឿងទុកមិនចាត់ការតែម្ដងផង។
លោក អាត ធន់ ប្រធានសហភាពការងារកម្ពុជា ដែលត្រូវបានប្រមុខរដ្ឋាភិបាលជម្រុញឲ្យដាក់ឯកសារពាក់ព័ន្ធមកកាន់រដ្ឋមន្ត្រីក្រសួងការងារនោះថ្លែងថា លោកបានប្រឈមនឹងពាក្យបណ្ដឹងជាមួយក្រុមហ៊ុនប្រមាណជា៥០ ភាគច្រើនត្រូវបានចោទប្រកាន់ នឹងបទល្មើសព្រហ្មទណ្ឌ ដែលទាមទារសំណងពី១០ទៅ២០ម៉ឺនដុល្លារ។ ក្រៅពីនេះត្រូវបានប្ដឹងចោទប្រកាន់ទៅលើបីបទល្មើសរួមមាន បទល្មើសញុះញង់ ការធ្វើឲ្យខូចខាតទ្រព្យសម្បត្តិអ្នកដទៃ និងរារាំងអាជ្ញាធរសាធារណៈ ដែលបានកើតឡើងចន្លោះឆ្នាំ២០១៣ដល់២០១៥។
គួរជម្រាបថា ក្រៅពីលោក អាត់ ធន់ នៅមានប្រធានសហជីពមួយចំនួនទៀតដែលកំពុងប្រឈមនឹងបណ្ដឹងតុលាការដោយរួមមាន៖លោក ប៉ាវ ស៊ីណា អ្នកស្រី យ៉ាង សុភ័ណ្ឌ និងលោក រ៉ុង ឈុន ជាដើម។
ទាក់ទងទៅនឹងសំណុំរឿងសហជីពនេះដែរ ការិយាល័យនៃសហព័ន្ធសហជីពកម្មករសំណង់ និងព្រៃឈើអន្តរជាតិ រួមជាមួយការិយាល័យតំបន់អាស៊ីប៉ាស៊ីហ្វិកនៃសហព័ន្ធសហជីពចំនួន៤ ផ្សេងទៀតកាលពីពេលថ្មីៗនេះ បានចេញសេចក្តីថ្លែងការណ៍មួយ អំពាវនាវឱ្យរដ្ឋាភិបាលកម្ពុជា ទម្លាក់បទចោទប្រកាន់ជាបន្ទាន់ ប្រឆាំងនឹងមេដឹកនាំសហជីពកម្មករឯករាជ្យចំនួន ៦ រូប នៅក្នុងវិស័យកាត់ដេរ។
អ្នកនាំពាក្យប្រចាំតំបន់អាស៊ីប៉ាស៊ីហ្វិកលោក Apolinar Tolentino បាននិយាយថា «មិនមានភស្តុតាងណាបង្ហាញថា មេដឹកនាំទាំងនេះ បានអំពាវនាវ ឱ្យកម្មករ បង្កឱ្យមានសកម្មភាពបំផ្លិចបំផ្លាញទ្រព្យសម្បត្តិសាធារណៈបែបនេះឬអត់នោះទេ»។ នេះបង្ហាញឱ្យឃើញយ៉ាងច្បាស់ពី ការចោទប្រកាន់ធ្វើឡើងក្រោមហេតុផលនយោបាយ ខណៈប្រព័ន្ធយុត្តិធម៌ នៅមានចម្លោះប្រហោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ