ប្រព័ន្ធធារាសាស្ត្រនៅខេត្តបាត់ដំបង និងខេត្តកំពង់ធំ នឹងត្រូវកែលម្អបន្ថែម
គឺ«ក្នុងគោលបំណងបង្កើនផលិតកម្មកសិកម្ម តាមរយៈការស្ដារឡើងវិញ ការធ្វើទំនើបកម្ម និងការធ្វើឱ្យប្រព័ន្ធធារាសាស្ត្រក្នុងខេត្តកំពង់ធំ និងបាត់ដំបង កាន់តែធន់ជាមួយនឹងអាកាសធាតុ»ដែលធនាគារអភិវឌ្ឍន៍អាស៊ីបានសម្រេចឱ្យរដ្ឋាភិបាលកម្ពុជាខ្ចីប្រាក់៦០លានដុល្លារ។ ADB ប្រកាសដូច្នេះកាលពីម្សិលមិញ ដោយបញ្ជាក់ថា «ការផ្តល់ហិរញ្ញប្បទាននេះនឹងផ្តល់ការគាំទ្រដល់កិច្ចខិតខំប្រឹងប្រែងរបស់រដ្ឋាភិបាល»។
ចុះផ្សាយនៅថ្ងៃ៖
ស្តាប់ - ០១:៣៣
ត្រឹមឆ្នាំ២០២១ ផ្ទៃដីដាំដុះសរុប ទាំងរដូវប្រាំង និងរដូវវស្សា នៅក្នុងខេត្តបាត់ដំបង និងខេត្តកំពង់ធំ នឹងកើនឡើងទ្វេរដង ពោលគឺពី១៣ ៥០០ហិកតានៅពេលបច្ចុប្បន្ន ទៅ២៩៥០០ហិកតា។ នេះជាលទ្ធផលរំពឹងទុកនៃគម្រោងរយៈពេល៥ឆ្នាំ តម្លៃ៦០លានដុល្លារ ដែលកម្ពុជាទើបទទួលបានហិរញ្ញប្បទានពីធនាគារអភិវឌ្ឍន៍អាស៊ី។ បើតាមគម្រោងនោះ ប្រព័ន្ធធារាសាស្ត្រចំនួន៣នៅក្នុងខេត្តទាំងពីរនឹងអាចផ្តល់ទឹកធ្វើកសិកម្មប្រកបដោយប្រសិទ្ធភាពទាំងស្រុង។
អ្នកឯកទេសខាងធនធានទឹកនៅធនាគាអភិវឌ្ឍន៍អាស៊ីម្នាក់ឈ្មោះ រ៉ាហ្សា ម៉ាមូត ហ្វារុក (Raza Mahmood Farrukh) បានថ្លែងថា «ការផ្តល់ហិរញ្ញប្បទាននេះនឹងផ្តល់ការគាំទ្រដល់កិច្ចខិតខំប្រឹងប្រែងរបស់រដ្ឋាភិបាល ដើម្បីពង្រីកទំហំដី ដែលទទួលបានការស្រោចស្រព និងការគ្រប់គ្រងធនធានទឹក ឱ្យកាន់តែមានប្រសិទ្ធភាព»។
ប្រាក់កម្ចីសម្បទានដែលបានពី ADB នៅពេលនេះ រួមជាមួយថវិកាបដិភាគរបស់រដ្ឋាភិបាលកម្ពុជាចំនួន៦,១លានដុល្លារផងនោះ «នឹងជួយបង្កើនផលិតភាពកសិកម្ម ក៏ដូចជាបង្កើនប្រាក់ចំណូលដល់កសិករនៅតាមមូលដ្ឋាន ដោយសារតែពួកគេអាចមានលទ្ធភាពបង្កបង្កើនផលស្រូវ បន្លែ និងដំណាំហូបផ្លែផ្សេងៗបានម្តងទៀត នៅរដូវប្រាំង»។ នេះបើយោងតាមធនាគារអភិវឌ្ឍន៍អាស៊ីដែលដឹងថា «ផលិតភាពកសិកម្មទាបគឺជាបញ្ហាធ្ងន់ធ្ងរមួយសម្រាប់កសិករខ្មែរ ដែលពឹងពាក់លើប្រព័ន្ធធារាសាស្ត្រ ដែលមិនសូវទទួលបានការថែទាំ សម្រាប់បង្កបង្កើនផលស្រូវរបស់ខ្លួន»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ