សាលាក្រុងភ្នំពេញ សិក្សាពីលទ្ធភាពសាងសង់ស្ពានអាកាសក្បាលថ្នល់បន្ថែម
គម្រោងសាងសង់ស្ពានអាកាសនិងផ្លូវក្រោមដីក្បាលថ្នល់ បន្ថែមលើគម្រោងដែលមានស្រាប់ ត្រូវបានសាលារាជធានីភ្នំពេញផ្សព្វផ្សាយលើបណ្ដាញសង្គមរបស់ខ្លួនកាល ពីចុងសប្ដាហ៍កន្លងទៅ។ គម្រោងសាងសង់ស្ពានអាកាសក្បាលថ្នល់បន្ថែមនេះ ត្រូវបានមន្ដ្រីសាលារាជធានីភ្នំពេញអះអាងថា នឹងអាចជួយសម្រួលទិសដៅចរាចរណ៍នៅតំបន់ក្បាលថ្នល់ ឲ្យកាន់តែរលូនជាងមុន។ ប៉ុន្តែយ៉ាងណាក៏ដោយ គម្រោងនេះនៅមិនទាន់សម្រេចសាងសង់នៅឡើយទេ ព្រោះកំពុងតែស្ថិតនៅក្នុងដំណាក់កាលសិក្សានៅឡើយ។
ចុះផ្សាយនៅថ្ងៃ៖
ស្តាប់ - ០១:៤១
សាលាក្រុងភ្នំពេញ កំពុងតែសិក្សាពីលទ្ធភាពសាងសង់ស្ពានអាកាសក្បាលថ្នល់បន្ថែម។ គម្រោងបន្ថែមនេះ រួមមានស្ពានបត់ឆ្វេងកោងឯកទិសចំនួនពីរ បែកចេញពីតួស្ពានអាកាសក្បាលថ្នល់សព្វថ្ងៃ និងផ្លូវក្រោមដីចំនួនពីរទៀត។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានគូសបញ្ជាក់ប្រាប់វិទ្យុបារាំងអន្ដរជាតិនៅថ្ងៃទី០៦កក្កដានេះថា គម្រោងបន្ថែមថ្មីលើស្ពានអាកាសក្បាលថ្នល់ នឹងត្រូវធ្វើឡើងដើម្បីសម្រួលការធ្វើចរាចរណ៍បត់ឆ្វេងនៅក្បាលថ្នល់។ សព្វថ្ងៃនេះ បើតាមស្ថានភាពជាក់ស្ដែង ការធ្វើដំណើរពីមហាវិថីព្រះនរោត្តមបត់ឆ្វេងទៅកាន់ស្ពានច្បារអំពៅមានភាពពិបាក ការធ្វើដំណើរពីចាក់អង្រែបត់ឆ្វេងទៅកាន់មហាវិថីព្រះមុនីវង្សក៏ពិបាក ហើយការធ្វើដំណើរពីមហាវិថីព្រះមុនីវង្សបត់ឆ្វេងទៅកាន់មហាវិថីព្រះនរោត្តមវិញក៏ពិបាក។ យល់ពីស្ថានភាពពិបាកអស់ទាំងនេះហើយ ទើបសាលារាជធានីភ្នំពេញ បានសម្រេចសិក្សាពីប្រព័ន្ធបត់ឆ្វេងនេះឡើងវិញ ដោយសហការជាមួយក្រសួងសាធារណៈការនិងដឹកជញ្ជូន។
គម្រោងសាងសង់ស្ពានអាកាសនិងផ្លូវក្រោមដីក្បាលថ្នល់ បន្ថែមលើគម្រោងដែលមានស្រាប់ ត្រូវបានសាលារាជធានីភ្នំពេញផ្សព្វផ្សាយលើបណ្ដាញសង្គមរបស់ខ្លួនកាលពីចុងសប្ដាហ៍កន្លងទៅ។ ប៉ុន្តែ សាលារាជធានីភ្នំពេញមិនទាន់កំណត់ថា នឹងត្រូវសាងសង់គម្រោងនេះនៅពេលណាច្បាស់លាស់នៅឡើយទេ ដោយចាំបាច់ត្រូវសិក្សាឲ្យបានល្អិតល្អន់ជាមុនសិន។
យ៉ាងណាក៏ដោយ អ្នកនាំពាក្យសាលារាជធានីភ្នំពេញ បានបង្ហាញសុទិដ្ឋិនិយមចំពោះគម្រោងបន្ថែមថ្មីនេះ។ លោកថា ប្រសិនបើត្រូវបានសាងសង់ដោយជោគជ័យ គម្រោងសាងសង់បន្ថែមស្ពានអាកាសនិងផ្លូវក្រោមដីក្បាលថ្នល់ នឹងអាចជួយសម្រួលទិសដៅចរាចរណ៍នៅតំបន់នេះ ឲ្យកាន់តែល្អប្រសើរជាងសព្វថ្ងៃទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ