ក្រសួងសាធារណៈការនិងដឹកជញ្ជូន ទទួលខុសត្រូវចេញអាជ្ញាបណ្ណប្រកបអាជីវកម្មលើវិស័យហេដ្ឋារចនាសម្ព័ន្ធ
រដ្ឋាភិបាលកម្ពុជា បានអនុម័តសេចក្ដីព្រាងអនុក្រឹត្យស្ដីពីលក្ខខណ្ឌ និងនីតិវិធីនៃការស្នើសុំអាជ្ញាបណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់។ បើតាមសេចក្ដីព្រាងអនុក្រឹត្យនេះ ក្រសួងសាធារណៈការនិងដឹកជញ្ជូន គឺជាស្ថាប័នតែមួយគត់ ដែលទទួលខុសត្រូវក្នុងការចេញអាជ្ញាបណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់។ នេះបើតាមសេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំពេញអង្គគណៈរដ្ឋមន្ដ្រី កាលពីថ្ងៃសុក្រកន្លងទៅ។
ចុះផ្សាយនៅថ្ងៃ៖
ស្តាប់ - ០១:៤៣
សេចក្ដីព្រាងអនុក្រឹត្យស្ដីពីលក្ខខណ្ឌ និងនីតិវិធីនៃការស្នើសុំអាជ្ញាបណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់ ត្រូវបានកិច្ចប្រជុំពេញអង្គគណៈរដ្ឋមន្ដ្រីអនុម័តគាំទ្រជាផ្លូវការ ដោយគ្រាន់តែកែសម្រួលចំណុចចំនួនពីរ តាមអនុសាសន៍របស់លោកនាយករដ្ឋមន្ដ្រីហ៊ុន សែន។
ចំណុចទាំងពីរនោះរួមមាន៖ ទី១ អង្គភាពរដ្ឋឬក្រុមហ៊ុនឯកជន ដែលធ្វើសកម្មភាពក្នុងវិស័យហេដ្ឋារចនាសម្ព័ន្ធផ្លូវថ្នល់ តម្រូវឲ្យមានអាជ្ញាបណ្ណត្រឹមត្រូវ មុននឹងប្រកបអាជីវកម្ម។ និងទី២ សមត្ថកិច្ចទទួលខុសត្រូវក្នុងការចេញអាជ្ញាបណ្ណ គឺមានតែក្រសួងសាធារណៈការនិងដឹកជញ្ជូនតែប៉ុណ្ណោះ។
គួរជម្រាបជូនថា សេចក្ដីព្រាងអនុក្រឹត្យស្ដី ពីលក្ខខណ្ឌ និងនីតិវិធីនៃការស្នើសុំអាជ្ញាបណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ និងការបើកមន្ទីរពិសោធន៍វិស័យផ្លូវថ្នល់នេះ ត្រូវបានរៀបចំឡើងដោយក្រសួងសាធារណៈការនិងដឹកជញ្ជូន។
បើតាមសេចក្ដីប្រកាសព័ត៌មានរបស់ទីស្ដីការគណៈរដ្ឋមន្ដ្រី គោលបំណងនិងគោលដៅនៃសេចក្ដីព្រាងអនុក្រឹត្យនេះ គឺដើម្បីលើកកម្ពស់គុណភាពការសាងសង់ ការជួសជុល ការថែទាំ និងការអភិវឌ្ឍវិស័យហេដ្ឋារចនាសម្ព័ន្ធផ្លូវថ្នល់ឲ្យមានចីរភាព ព្រមទាំងធានាបានអភិវឌ្ឍប្រកបដោយនិរន្ដរភាព។ បន្ថែមពីលើនេះ សេចក្ដីព្រាងអនុក្រឹត្យដដែល ក៏នឹងដាក់ចេញនូវគោលការណ៍លក្ខខណ្ឌនិងនីតិវិធីនៃការស្នើសុំអាជ្ញាបណ្ណប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ ការថែទាំផ្លូវថ្នល់ និងការបើកមន្ទីរពិសោធន៍ផ្លូវថ្នល់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ