អាដហុក ៖ សេរីភាពបញ្ចេញមតិនៅកម្ពុជាអាក្រក់បំផុតក្នុងឆ្នាំ ២០១៤
នៅព្រឹកថ្ងៃ ព្រហស្បតិ៍ ទី ២៨ សីហានេះ សមាគមអាដហុកបានចេញរបាយការណ៍មួយស្តីពីសេរីភាពបញ្ចេញមតិឆ្នាំ ២០១៤ នៅក្នុងប្រទេសកម្ពុជា។ សមាគមនេះ បានវាយតម្លៃថា សេរីភាពបញ្ចេញមតិនៅក្នុងប្រទេសកម្ពុជាមានស្ថានភាពអាក្រក់ពុំធ្លាប់មាននៅក្នុងឆ្នាំ ២០១៤ នេះ។ ប៉ុន្តែមន្ត្រីរដ្ឋាភិបាលបានច្រានចោលរបាយការណ៍នេះ ដោយលើកឡើងថា សេរីភាពបញ្ចេញមតិនៅកម្ពុជា គឺមានភាពទូលំទូលាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
"ឆ្នាំ ២០១៤ គឺជាឆ្នាំដែលអាក្រក់បំផុតនៃការរឹតត្បិតទៅលើសិទ្ធិសេរីភាពក្នុងការបញ្ចេញមតិក្នុងអំឡុងប៉ុន្មានឆ្នាំកន្លងមកនេះ"។ នេះ គឺជាការលើកឡើងរបស់លោក នី ចរិយាប្រធានផ្នែកស៊ើបអង្កេតសិទ្ធិមនុស្ស របស់សមាគម អាដហុក ក្នុងពេលចេញផ្សាយរបាយការណ៍សេរីភាពបញ្ចេញមតិឆ្នាំ ២០១៤ នៅក្នុងប្រទេសកម្ពុជា។លោក នី ចរិយា បានលើកហេតុផលដោយផ្អែកលើរបាយការណ៍ថា ដោយសារក្នុងឆ្នាំ ២០១៤ នេះ អាជ្ញាធរបានបិទទីលានប្រជាធិបតេយ្យមិនឲ្យមានការជួបជុំ និងរាល់ការធ្វើបាតុកម្មដោយសន្តិវិធីត្រូវបានបង្ក្រាបដោយហិង្សារហូតមានបាតុករស្លាប់ និង របួសជាដើម។
បន្ថែមលើនេះ របាយការណ៍របស់អាដហុក បានបញ្ជាក់ថា រដ្ឋាភិបាលបានរឹតបន្តឹងលើសារព័ត៌មានឯករាជ្យ និង ការធ្វើសេចក្តីព្រាងច្បាប់ស្តីពីបទល្មើសតាមអ៊ីនធើណីត។ កត្តាទាំងនេះ សុទ្ធតែរួមចំណែកក្នុងការបំបិទសិទ្ធិសេរីភាពក្នុងការបញ្ចេញមតិនៅក្នុងប្រទេសកម្ពុជា។
លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រីបានច្រានចោលនូវរបាយការណ៍របស់សមាគមអាដហុកនេះ។ លោកបានបញ្ជាក់ប្រាប់វិទ្យុបារាំងអន្តរជាតិថា រាល់ការបញ្ចេញមតិទាំងឡាយដែលស្ថិតក្រោមច្បាប់ និង មិនប៉ះពាល់ដល់សិទ្ធិអ្នកដទៃនោះ គឺមិនមានអ្នកណាហាមឃាត់នោះទេ។
លោក បានលើកឡើងថា កន្លងមកដោយសារសកម្មភាពមួយចំនួនបានបំពានច្បាប់ ទើបរដ្ឋាភិបាលមានវិធានការតាមផ្លូវច្បាប់ ដើម្បីទប់ស្កាត់។ លោក ទិត សុធា បានគូសបញ្ជាក់ថា ការប្រើប្រាស់សិទ្ធិបញ្ចេញមតិនៅកម្ពុជា គឺមានការបើកទូលាយ និង ផុលផុសណាស់នៅពេលបច្ចុប្បន្ន។
យ៉ាងណាក៏ដោយ លោក នី ចរិយា បានសង្កត់ធ្ងន់ថា សេរីភាពបញ្ចេញមតិនៅកម្ពុជាគឺ ស្ថិតក្នុងកណ្តាប់ដៃរបស់អ្នកនយោបាយ។ ប្រសិនបើអ្នកនយោបាយត្រូវរូវគ្នានោះ សេរីភាពបញ្ចេញមតិ ក៏ត្រូវបានបើកទូលាយផងដែរ។
បន្ថែមលើនេះ របាយការណ៍របស់សមាគមអាដហុកក៏បានផ្តល់អនុសាសន៍មួយចំនួន ដល់រដ្ឋាភិបាលដែលរួមមានដូចជា គោរពច្បាប់ជាតិ និង អន្តរជាតិដើម្បីការពារសេរីភាពបញ្ចេញមតិ ហើយធានាថា ច្បាប់ទាំងនោះត្រូវបានអនុវត្តយ៉ាងសមស្រប។ រដ្ឋាភិបាលមិនត្រូវជ្រៀកជ្រែកក្នុងសារព័ត៌មាន និងត្រូវផ្តល់អាជ្ញាប័ណ្ណដល់វិទ្យុ និង ទូរទស្សន៍ឯករាជ្យផ្សេងៗ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ