ឥរិយាបថអ្នកនយោបាយអាមេរិកចំពោះលទ្ធផលការបោះឆ្នោត ជាគំរូសម្រាប់អ្នកនយោបាយខ្មែរ
ចុះផ្សាយនៅថ្ងៃ៖
ស្តាប់ - ០៤:៤០
ការបោះឆ្នោតប្រធានាធិបតីអាមេរិកកាលពីថ្ងៃទី៨វិច្ឆិកា បានក្លាយទៅជាព្រឹត្តិការណ៍ក្ដៅនៅកម្ពុជា ដែលប្រជាពលរដ្ឋនិងអ្នកនយោបាយទាំងអស់តាមដានយ៉ាងយកចិត្តទុកដាក់។ ក្រៅពីតាមដានការបោះឆ្នោត អ្នកវិភាគនយោបាយមួយចំនួនលើកឡើងថា ឥរិយាបទនៃអ្នកនយោបាយអាមេរិកចំពោះលទ្ធផលនៃការបោះឆ្នោត គឺជាមេរៀនដែលអ្នកនយោបាយកម្ពុជាគួររៀនសូត្រនិងយកគំរូតាម។
ការបោះឆ្នោតនៅសហរដ្ឋអាមេរិក ថ្វីត្បិតតែនៅឆ្ងាយឆ្លងទ្វីបពីកម្ពុជា ប៉ុន្តែការបោះឆ្នោតនេះបានទទួលការចាប់អារម្មណ៍និងយកចិត្តតាមដានយ៉ាងខ្លាំងពីសំណាក់ប្រជាពលរដ្ឋនិងអ្នកនយោបាយនៅកម្ពុជា។ ហើយដូចរៀងរាល់អាណត្តិដែរ អ្នកវិភាគព្រឹត្តិការណ៍នយោបាយនៅកម្ពុជាតែងតែជំរុញឲ្យកម្ពុជា ទាញយកមេរៀនល្អៗពីការបោះឆ្នោតនៅអាមេរិកមកអនុវត្តតាម ខណៈដែលកម្ពុជានឹងរៀបចំការបោះឆ្នោតជ្រើសរើសតំណាងរាស្ត្រអាណត្តិថ្មីនៅឆ្នាំ២០១៨ខាងមុខនេះហើយ។ តើវាជាការពិតឬដែលថា ការបោះឆ្នោតនៅអាមេរិកមានមេរៀនល្អៗដែលកម្ពុជាអាចរៀនសូត្រយកគំរូតាមបាន?
ថ្វីត្បិតតែអាមេរិកជាប្រទេសដែលប្រកាន់យករបបប្រជាធិបតេយ្យជាង២០០ឆ្នាំហើយក៏ពិតមែន ប៉ុន្តែការប្រកួតប្រជែងនយោបាយរវាងអ្នកនយោបាយនៅអាមេរិក ហាក់ស្ថិតនៅឆ្ងាយពីភាពចំណាស់របស់ខ្លួនណាស់ ដោយចំពោះនៅក្នុងអាណត្តិនេះតែម្ដង។ ទាំងលោកស្រី ហ៊ីឡារី គ្លីនតុន និងលោក ដូណាល់ ត្រាំ ដែលជាបេក្ខភាពប្រធានាធិបតី បានយករឿងផ្ទាល់ខ្លួនទៅវាយប្រហារគ្នានៅលើវេទិកាជជែកជាសាធារណៈ ដោយក្នុងនោះ លោកស្រីគ្លីនតុន បានគាស់កកាយរឿងអាស្រូវផ្លូវភេទរបស់លោកត្រាំ ម្ដងហើយម្ដងទៀត។ ចំណែកលោកត្រាំឯណោះវិញ តែងតែចោទលោកស្រីហ៊ីឡារី គ្លីនតុន ថាជាមនុស្សមិនស្មោះត្រង់។ រឿងអាស្រូវអ៊ីមែលរបស់លោកស្រីគ្លីនតុនដែលផ្ទុះឡើងបន្តបន្ទាប់ ក៏ជាប្រធានបទនៃការវាយប្រហាររបស់លោកត្រាំផងដែរ។
ក្រៅពីការលើកយករឿងផ្ទាល់ខ្លួនទៅវាយប្រហារគ្នារបស់អ្នកនយោបាយ សារព័ត៌មានអាមេរិកក៏បានបង្ហាញពីភាពលម្អៀងមិនធ្លាប់មាន នៅក្នុងការបោះឆ្នោតនេះដែរ។ លោកត្រាំ បានកត់សម្គាល់យ៉ាងដូច្នេះ ហើយវាទំនងជាមិនខុសអ្វីពីតថភាពពិតជាក់ស្ដែងឡើយ។ សារព័ត៌មានភាគច្រើនលើសលុបបានដើរតួជាអ្នកផ្ដល់កម្លាំងចិត្តដល់លោកស្រីគ្លីនតុន សរសេរលើកសរសើរលោកស្រីគ្រប់សព្វបែបយ៉ាង។ ចំណែកលោកត្រាំវិញ ត្រូវសារព័ត៌មានទាំងអស់នោះ សរសេរបង្អាប់ បង្កាច់បង្ខូច។ ប្រព័ន្ធផ្សព្វផ្សាយខ្លះ ហ៊ានដល់ទៅអំពាវនាវឲ្យទស្សនិកជនរបស់ខ្លួន កុំបោះឆ្នោតឲ្យលោកត្រាំថែមទៀតផង។
មកដល់ត្រឹមណេះ គេប្រហែលជាត្រូវសួរត្រឡប់ទៅវិញ ថាតើទាំងនេះឬជាមេរៀនដែលកម្ពុជាគួររៀនពីការបោះឆ្នោតនៅអាមេរិក?
ជាការពិត ការបោះឆ្នោតនៅសហរដ្ឋអាមេរិកដែលទើបតែកន្លងផុតនេះ មិនល្អឥតខ្ចោះឡើយ។ ប៉ុន្តែ លទ្ធិប្រជាធិបតេយ្យនៅអាមេរិកដែលមានអាយុជាង២០០ឆ្នាំទៅហើយនោះ នៅតែមានមេរៀនល្អសម្រាប់អ្នកនយោបាយខ្មែរយកគំរូតាម ជាពិសេសទាក់ទិននឹងឥរិយាបទរបស់អ្នកនយោបាយអាមេរិកចំពោះលទ្ធផលបោះឆ្នោត។ នោះគឺតម្លាភាព និងភាពជាកីឡាកររបស់អ្នកនយោបាយ។
ចាប់តាំងពីការប្រកាសលទ្ធផល គ្មានឡើយការចោទប្រកាន់គ្នាពីរឿងលួចបន្លំសន្លឹកឆ្នោត និងគ្មានឡើយការតវ៉ាប្រឆាំងជំទាស់នឹងលទ្ធផលនៃការបោះឆ្នោត។ ក្រោយចាញ់ការបោះឆ្នោត លោកស្រី ហ៊ីឡារី គ្លីនតុន បានទូរសព្ទទៅអបអរសាទរជ័យជំនះរបស់លោកដូណាល់ ត្រាំ ចំណែកលោកដូណាល់ ត្រាំ ក៏បានថ្លែងអំណរគុណ និងដឹងគុណចំពោះការងារដែលលោកស្រី គ្លីនតុន បានធ្វើសម្រាប់អាមេរិកនាពេលកន្លងមក។ នេះគឺជាមេរៀនដ៏ល្អ ដែលអ្នកនយោបាយខ្មែរគួរយកគំរូតាម។
ពិតហើយថា ស្ថានភាពនៅសហរដ្ឋអាមេរិកខុសពីស្ថានភាពនៅកម្ពុជា។ ការបោះឆ្នោតនៅអាមេរិក ត្រូវបានរៀបចំឡើងខុសពីកម្ពុជា។ ហើយបេក្ខជនប្រធានាធិបតីអាមេរិក ក៏មិនធ្លាប់បានប្រឡូកនៅក្នុងឆាកនយោបាយកម្ពុជាដែរ។ ប៉ុន្តែនេះមិនមែនមានន័យថា កម្ពុជាមិនអាចរៀនសូត្រនិងទាញយកចំណុចល្អពីប្រទេសអាមេរិកមកអនុវត្តបានទាល់តែសោះដែរ។ អ្នកនយោបាយខ្មែរ គួរតែទាញយកមេរៀនល្អៗមួយចំនួនពីអ្នកនយោបាយរបស់អាមេរិក មកអនុវត្តតាម។ ការអនុវត្តតាមទាំងស្រុង ជាការពិត គឺមិនអាចទៅរួចឡើយ។ ប៉ុន្តែអ្នកនយោបាយអាចយកមកដុសខាត់ កែសម្រួល ឲ្យសមស្របទៅតាមបរិបទ និងស្ថានភាពរបស់កម្ពុជា។
ពីមួយថ្ងៃទៅមួយថ្ងៃ គេទទួលស្គាល់ថា អ្នកនយោបាយនៅកម្ពុជាចាប់ផ្ដើមចាស់ទុំជាងមុន។ បើទោះជាមានភាពរកាំរកូសមិនឈប់ឈរ ប៉ុន្តែយ៉ាងហោចណាស់នៅក្នុងអាណត្តិទី៥នេះ អ្នកនយោបាយខ្មែរធ្លាប់បានចូលតុចរចាជជែកគ្នាស្វែងរកដំណោះស្រាយនយោបាយ ដោយឈរលើគោលការណ៍វប្បធម៌សន្ទនា។ ជាវប្បធម៌សន្ទនាដែលគ្រប់គ្នា ទាំងប្រជាពលរដ្ឋនិងសហគមន៍អន្ដរជាតិ អបអរសាទរនិងលើកទឹកចិត្ត។ ប៉ុន្តែយ៉ាងណាក៏ដោយ ភាពត្រូវរ៉ូវគ្នាមួយរយៈពេលខ្លី ហើយស្រាប់តែត្រឡប់មកហែកហួរគ្នាវិញដដែល គឺមិនមែនជារឿងល្អឡើយ។
ដូច្នេះ អ្នកនយោបាយខ្មែរ គួរតែកែប្រែឥរិយាបទទាំងនេះចោល ជំនួសមកវិញនូវភាពចាស់ទុំផ្នែកនយោបាយ ទឹកចិត្តជាកីឡាករ ដែលហ៊ានស៊ីហ៊ានសង។ ភាពមិនចុះសម្រុងគ្នាគ្រប់បញ្ហា និងគ្រប់កាលៈទេសៈ ដែលមិនអាចដោះស្រាយនៅលើតុរួមគ្នាបាន គឺជាសញ្ញាដ៏គ្រោះថ្នាក់ណាស់សម្រាប់ស្ថិរភាពនយោបាយនិងការអភិវឌ្ឍប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ