បោះឆ្នោតអាមេរិក៖ហេតុអ្វីលោកស្រីគ្លីនតុនបរាជ័យ?
ក្តីស្រមៃក្លាយជាស្ត្រីប្រធានាធិបតីសហរដ្ឋអាមេរិក របស់លោកស្រីហ៊ីលឡារី គ្លីនតុន មិនបានក្លាយជាការពិតទេ។ ទោះជាការស្ទាបស្ទង់មតិបង្ហាញថា លោកស្រី គ្លីនតុន នាំមុខលោកដូណាល់ ត្រាំក្តី ក៏ប្រជាជនអាមេរិកបានសម្រេចចិត្តអោយលោកត្រាំ ឡើងគ្រប់គ្រងសហរដ្ឋអាមេរិកដែរ។ តើមូលហេតុអ្វីខ្លះដែលអាចអោយលោកស្រីគ្លីនតុនជួបបរាជ័យធ្ងន់ធ្ងរដូច្នេះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ហេតុអ្វីបានជាលោកស្រីគ្លីនតុន មិនអាចក្លាយជាប្រធានាធិបតីសហរដ្ឋអាមេរិក ទី៤៥?
ទី១- លោកស្រីមិនដែលបានបង្ហាញអោយច្បាស់លាស់ ថាលោកស្រីមិនមែនជាមនុស្សភូតកុហក។ ជាក់ស្តែង កាលពីខែកុម្ភៈដើមឆ្នាំ មានអ្នកសារព័ត៌មានម្នាក់សួរលោកស្រីថា តើលោកស្រីពិតជាបាននិយាយការពិតដែររឺទេ លោកស្រីឆ្លើយថា៖ ខ្ញុំតែងតែព្យាយាម។ ឃ្លាប្រយោគមួយនេះធ្វើអោយគេសង្ស័យថា លោកស្រីប្រហែលជាធ្លាប់ភូតកុហក។
វេបសាយវីគីល្លីក បានចុះផ្សាយរឿងអាស្រូវអ៊ីមែលលោកស្រីគ្លីនតុន លើកឡើងថា ក្នុងកិច្ចការរដ្ឋាភិបាល- លោកស្រីមិនបានប្រើប្រាស់អ៊ីមែលដែលរដ្ឋាភិបាលដាក់អោយប្រើទេ។ តែលោកស្រីបែរជាប្រើអ៊ីមែលផ្ទាល់ខ្លួន ក្នុងកិច្ចការផ្សេងៗរបស់ជាតិ។ ដូច្នេះ វាអាចអោយធ្លាយព័ត៌មានសំងាត់ជាតិដល់ជនខិលខូចបាន។
មូលហេតុសំខាន់ទី២- ការស្ទាបស្ទង់មតិចុងក្រោយ មុនពេលបោះឆ្នោត ដែលបង្ហាញថា លោកស្រីនៅតែនាំមុខលោកត្រាំនោះ អាចនឹងធ្វើអោយលោកស្រីគ្លីនតុនកាន់តែភ្លេចខ្លួន លួចត្រេកអរនឹងជោគជ័យទុកជាមុន។ លោកស្រីគ្លីនតុនបានរហូតមើលងាយបណ្តាអ្នកគាំទ្រលោកត្រាំ ដោយចំអកថា សកមុ្មជនគាំទ្រលោកត្រាំពាក់កណ្តាល ជាមនុស្សគួរអោយអាណិត។
បើទោះជាលោកស្រីផ្តោតក្តីសង្ឃឹមខ្លាំងលើអ្នកបោះឆ្នោតជាយុវជន ជាបញ្ញវន្តជនជាតិស្បែកស រឺលើសហគមន៍ភាគតិច តែទីបំផុត អ្នកបោះឆ្នោតទាំងនេះនៅតែអាចលែងផ្តល់ទំនុកចិត្តចំពោះលោកស្រីតទៅទៀត។
មូលហេតុសំខាន់ទី៣- គឺការធ្វេសប្រហែស មិនយកចិត្តទុកដាក់ដល់ប្រជាជនតាមបណ្តារដ្ឋដែលតែងតែគាំទ្របក្សប្រជាធិបតេយ្យ ដូចជារដ្ឋវីស្កុនសិន មីឈីហ្កេន អូហាយយ៉ូ រឺក៏ពេនស៊ីលឡាវ៉ានីជាដើម។ រដ្ឋទាំងនេះ បានបោះឆ្នោតអោយលោកអូបាម៉ា ជានិច្ច ក្នុង២អាណត្តិកន្លងមក។ ប៉ុន្តែ លោកស្រីបានប្រហែស។ ជាក់ស្តែង ហ៊ីលឡារី គ្លីនតុនមិនដែលធ្វើសន្ទរកថានៅរដ្ឋវីសស្កុនស៊ីន ម្តងណាទេ តាំងពីពេលលោកស្រីត្រូវបានតែងតាំងជាបេក្ខជនប្រធានាធិបតីបក្សប្រជាធិបតេយ្យ ក្នុងខែកក្កដាមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ