អាជ្ញាធរជាតិអប្សរា នឹងចុះរុះរើសំណង់ខុសច្បាប់ក្នុងតំបន់អង្គរ
ការរីករាលដាលនូវសំណង់ខុសច្បាប់ក្នុងតំបន់រមនីយដ្ឋានអង្គរ ធ្វើឲ្យអាជ្ញាធរជាតិអប្សរាព្រួយបារម្ភ។ នៅក្នុងសេចក្ដីប្រកាសតាមទំព័រហ្វេសប៊ុក អាជ្ញាធរអប្សរាបានអំពាវនាវឲ្យម្ចាស់សំណង់ខុសច្បាប់ទាំងនោះរុះរើចេញដោយស្ម័គ្រចិត្តជាបន្ទាប់។ បើពុំដូច្នោះទេ អាជ្ញាធរជាតិអប្សរានឹងចុះរុះរើជំនួស។
ចុះផ្សាយនៅថ្ងៃ៖
ស្តាប់ - ០១:៤៩
សកម្មភាពរំលោភសាងសង់ ចាក់ដីបំពេញខុសច្បាប់ក្នុងតំបន់១ និងតំបន់២ នៃរមនីយដ្ឋានអង្គរ កើនឡើងយ៉ាងខ្លាំងចាប់ពីថ្ងៃទី២០ឧសភា រហូតដល់ថ្ងៃទី២មិថុនា។ របាយការណ៍ក្រុមការងារអាជ្ញាធរជាតិអប្សរា បង្ហាញថា គ្រាន់តែក្នុងរយៈពេល២សប្ដាហ៍នេះ មានសកម្មភាពសាងសង់ ចាក់បំពេញដីខុសច្បាប់សរុបចំនួនជាង៥០០ករណី ក្នុងនោះក៏មានផងដែរ ការរំលោភសាងសង់កៀកនឹងកំផែងប្រាសាទបន្ទាយក្ដី។
អាជ្ញាធរជាតិអប្សរាបានអះអាងថា សំណង់ខុសច្បាប់ទាំងនេះ បានបង្កឲ្យមានផលប៉ះពាល់ធ្ងន់ធ្ងរដល់ការងារថែរក្សា ការពារ និងអភិរក្សរមនីយដ្ឋានអង្គរ។ អង្គរ ដែលជាសម្បត្តិបេតិកភណ្ឌពិភពលោក និងដែលសហគមន៍អន្ដរជាតិក៏ដូចជាអង្គការយូណេស្កូ តែងតែចាត់ទុកជាគំរូលើវិស័យថែរក្សាការពារបេតិកភណ្ឌ។ អាជ្ញាធរជាតិអប្សរា បន្ថែមថា សកម្មភាពខុសច្បាប់ទាំងនេះ អាចនឹងរំខានដល់ការព្យាយាមដាក់បញ្ចូលប្រាសាទបុរាណខ្មែរមួយចំនួនទៀត ជារមនីយដ្ឋានបេតិកភណ្ឌពិភពលោកផងដែរ។
ក្នុងន័យនេះ អាជ្ញាធរជាតិអប្សរា បានអំពាវនាវដល់ម្ចាស់សំណង់និងម្ចាស់ដីចាក់បំពេញខុសច្បាប់ទាំងអស់ក្នុងតំបន់១និងតំបន់២នៃរមនីយដ្ឋានអង្គរ ឲ្យរុះរើសំណង់ទាំងអស់នោះវិញដោយស្ម័គ្រចិត្ត។ ប្រសិនបើម្ចាស់សំណង់មិនផ្ដល់កិច្ចសហការទេ អាជ្ញាធរអប្សរាថា នឹងចុះទៅរុះរើដោយខ្លួនឯង ដោយសហការជាមួយអាជ្ញាធរដែនដី និងកម្លាំងសមត្ថកិច្ចចម្រុះនៃរដ្ឋបាលខេត្តសៀមរាប។
គួរជម្រាបដែរថា តំបន់១និងតំបន់២នៃរមនីយដ្ឋានអង្គរ ត្រូវបានកំណត់ក្នុងព្រះរាជក្រឹត្យលេខ០០១នស ជាតំបន់ដែលត្រូវការពារក្នុងកម្រិតខ្ពស់បំផុត។ ត្រូវការពារក្នុងកម្រិតខ្ពស់ព្រោះ តំបន់ទាំងពីរនេះ ក្រាលគ្របដណ្ដប់ដោយប្រាសាទបុរាណនិងសំណល់បុរាណវិទ្យាជាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ