សត្វចិញ្ចឹមលក្ខណៈពាណិជ្ជកម្ម ត្រូវមានអត្តសញ្ញាណសម្គាល់
សត្វគ្រប់ប្រភេទ ដែលចិញ្ចឹមជាលក្ខណៈពាណិជ្ជកម្ម ត្រូវតែមានអត្តសញ្ញាណសម្គាល់។ នេះបើតាមច្បាប់ថ្មីស្តីសុខភាពសត្វ ដែលប្រកាសផ្សព្វផ្សាយនៅព្រឹកថ្ងៃទី០១ ខែសីហានេះ។ ការកំណត់អត្តសញ្ញាណសត្វនឹងជួយការពារការនាំចូលសត្វខុសច្បាប់ពីប្រទេសជិតខាង។
ចុះផ្សាយនៅថ្ងៃ៖
ស្តាប់ - ០២:០៦
មាត្រាទី៣០ នៃច្បាប់ស្តីពីសុខភាពសត្វតម្រូវឲ្យអង្គភាពជំនាញ ដែលធ្វើការងារខាងផលិតកម្ម និងបសុព្យាបាលត្រូវរៀបចំកសាងសមត្ថភាព និងយន្តការនានា ដើម្បីគាំទ្រដល់ការអនុវត្តប្រព័ន្ធអត្តសញ្ញាណកម្មសត្វ និងប្រព័ន្ធតាមដានប្រភពសត្វ។ ការកំណត់អត្តសញ្ញាណសត្វនេះ គឺធ្វើឡើង ដើម្បីគ្រប់គ្រងការនាំចេញ នាំចូលសត្វពីប្រទេសជិតខាង។ នេះបើតាមលោក ឡោ រស្មី អ្នកនាំពាក្យក្រសួងកសិកម្មនៅព្រឹកថ្ងៃទី០១ ខែសីហា។
ការកំណត់អត្តសញ្ញាណសត្វនេះ ក៏ធ្វើឡើងក្នុងគោលបំណងបញ្ជាក់ម្ចាស់កម្មសិទ្ធិសត្វ គ្រប់គ្រងការចិញ្ចឹម ការបង្កាត់ពូជសត្វ ដើម្បីទប់ស្កាត់ជំងឺឆ្លង និងការពារសុខភាពមនុស្ស និងសត្វ។ នេះបើតាមមាត្រា២៩។
លោកបន្ថែមថាការកំណត់អត្តសញ្ញាណនេះ ក៏នឹងធ្វើឡើងចំពោះសត្វ ដែលចិញ្ចឹមជាលក្ខណៈគ្រួសារផងដែរ។ ចំណែកនីតិវិធីនៃការធ្វើអត្តសញ្ញាណកម្មសត្វ ត្រូវកំណត់ ដោយប្រកាសរបស់រដ្ឋមន្ត្រីក្រសួងកសិកម្ម។ យ៉ាងណាមិញ លោកឡោ រស្មី មិនបានបញ្ជាក់ថាពេលណាការធ្វើអត្តសញ្ញាណកម្មសត្វនឹងត្រូវដំណើរការនោះទេ ប៉ុន្តែលោកថាកន្លងមកក្រសួងកសិកម្មធ្លាប់បានគិតគូលើបញ្ហានេះម្តងរួចមកហើយ។
លោក ស្រ៊ុន ពៅ ប្រធានសមាគមអ្នកចិញ្ចឹមជ្រូកកម្ពុជា យល់ថាការកំណត់អត្តសញ្ញាណសត្វ គឺជារឿងល្អ ប៉ុន្តែការអនុវត្តជាក់ស្តែងមិនមាននោះទេ។ លោកបន្ថែមថា បើការកំណត់អត្តសញ្ញាណសត្វនេះធ្វើទៅលឿន នោះកាន់តែល្អ ដោយសារតែប្រទេសកម្ពុជាឈានជើងចូលក្នុងសមាហរណកម្មអាស៊ាន។
កន្លងមកប្រទេសកម្ពុជាធ្លាប់បាននាំចូលសត្វពីប្រទេសដទៃ ដូចជាសត្វជ្រូក និងសត្វគោជាដើម ដើម្បីបំពេញតម្រូវការក្នុងស្រុក ប៉ុន្តែការនាំចូលទាំងនោះ បានបង្កឲ្យផលប៉ះពាល់មួយចំនួនទៅលើអ្នកចិញ្ចឹមសត្វក្នុងស្រុក ដូចជាការបង្កឲ្យមានជំងឺឆ្លងជាដើម។
គួររំលឹកជូនថា ច្បាប់ដែលមាន២២ជំពូក និងប្រើពេល៨ឆ្នាំក្នុងការបង្កើត ត្រូវបានរដ្ឋសភាអនុម័ត កាលពីថ្ងៃទី១៦ ខែធ្នូឆ្នាំ២០១៥។ ច្បាប់នេះមានគោលបំណងធានាការគ្រប់គ្រង និងការអភិវឌ្ឍសុខភាពសត្វ និងផលិតកម្មសត្វ ការពារសុខភាពមនុស្ស សុខភាពសត្វ សុខុមាលភាពសត្វ និងការពារបរិស្ថាន បង្ការទប់ស្កាត់ និងលុបបំបាត់ការឆ្លងរាលដាលជំងឺសត្វ ការពារធនធានសត្វ និងពូជសត្វរបស់ជាតិ ធានានិរន្តភាពនៃការផ្គត់ផ្គង់ផលិតផលសត្វប្រកបដោយគុណភាព និងសុវត្ថិភាពសម្រាប់ទីផ្សារក្នុងស្រុក និងការនាំចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ