គោ ក្របី ជាង២០០ក្បាលបានងាប់ក្នុងខេត្តមួយចំនួនដោយសារអាកាសធាតុក្ដៅ
ក្រសួងកសិកម្មរុក្ខាប្រមាញ់និងនេសាទ បានឲ្យដឹងថា មានសត្វគោ ក្របី ជាង២០០ក្បាលបានងាប់នៅក្នុងខេត្តមួយចំនួន ដោយសារអាកាសធាតុក្ដៅ។ ក្រៅពីសត្វពាហនៈនេះ គឺមានសត្វស្វាខ្មៅ៣០ក្បាលបានស្លាប់នៅខេត្តបាត់ដំបង។ ប៉ុន្តែយ៉ាងណាក៏ដោយចូលមកដល់រដូវវស្សាដែលនាំមកនូវភ្លៀងកក់ខែនេះ អ្នកនាំពាក្យក្រសួងកសិកម្មបានគូសបញ្ជាក់ថា គោ ក្របី ឬ សត្វស្វា លែងងាប់ទៀតហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
បន្ទាប់ពីគោ ក្របី ជាង២០០ក្បាលងាប់ក្នុងរដូវក្ដៅ ក្រសួងកសិកម្មរុក្ខា ប្រមាញ់ និង នេសាទ បានធ្វើរបាយការណ៍ប្រាប់ទៅលោកនាយករដ្ឋមន្ត្រី ហ៊ុន សែន ពីបញ្ហានេះ។ ក្នុងនោះខេត្តកំពង់ស្ពឺងាប់ គោ ក្របី ជាង៥០ក្បាល កំពង់ធំជាង៤០ក្បាល កណ្ដាលជាង១០ក្បាល បាត់ដំបង១៨ក្បាល ស្ទឹងត្រែងជិត៦០ក្បាល។
ចំពោះខេត្តស្ទឹងត្រែង លោក ឡោ រស្មី អ្នកនាំពាក្យក្រសួងកសិកម្មបានថ្លែងការពារថា សត្វគោក្របីងាប់មិនដល់៣០០ក្បាលទេ បើគិតក្នុងខែមេសាដែលស្ថិតនៅក្នុងរដូវក្ដៅនេះ។ ប៉ុន្តែចំនួន៣០០ក្បាលនេះអាចស្លាប់ដោយរាប់ចាប់តាំងពីខែមករាមក។
វិធានការសម្រាប់ក្រសួងកសិកម្មដើម្បីចូលរួមដោះស្រាយបញ្ហានេះ លោក ឡោ រស្មី បានផ្ដាំផ្ញើទៅប្រជាពលរដ្ឋត្រូវប្រញាប់រាយការណ៍ទៅមន្ទីរកសិកម្ម នៅតាមបណ្ដាលខេត្តនិងភ្នាក់ងារពេទ្យសត្វភូមិដើម្បីសង្គ្រោះសត្វ នៅរស់ឲ្យទាន់ពេលវេលា បើមានការសង្ស័យ។ លោក ក៏បានជំរុញឲ្យប្រជាពលរដ្ឋស្វែងរកប្រភពចំណីបន្ថែមដូចជា ដើមចេក ពោត ស្លឹកដូង ដើម្បីបញ្ចៀសការរើសចំណីស៊ីដោយគ្មានសុវត្ថិភាព ។ បន្ថែមពីលើនេះលោកក៏បានណែនាំឲ្យពលរដ្ឋចងគោ ក្របី នៅក្រោមម្លប់ដែលស្ថិតនៅក្នុងកម្រិតមួយសមស្រប។
ក្រៅពីសត្វ គោ ក្របី បានងាប់ក្នុងអំឡុងពេលរដូវក្ដៅនេះ នៅមានសត្វស្វាខ្មៅប្រមាណជាង៣០ក្បាល បានងាប់កាលពីថ្ងៃទី ២៨ ខែមេសា នៅតំបន់បឹងស្នោ និងបឹងត្រោះ នៅចំនុចម្តុំវាលដូនអំ ឃុំព្រែកលួង ស្រុកឯកភ្នំ ចំងាយជាង៤០គីឡូម៉ែត្រពីទីរួមខេត្តបាត់ដំបង។
មូលហេតុដែលធ្វើអោយសត្វស្វាខ្មៅទាំងនេះដេកងាប់ គឺដោយសារតែពួកវាបានរត់ភៀសខ្លួនពីតំបន់ដែលមានភ្លើងឆេះព្រៃ មករកជម្រក និងទឹកផឹក តែដោយសារឆ្នាំនេះមានភាពរាំងស្ងួតខ្លាំងពេក ធ្វើអោយបឹងបួតូចៗត្រូវរាំងស្ងួតអស់ ទើបធ្វើអោយសត្វសា្វទាំងនោះដេកងាប់ដោយសារអត់ទឹក និងក្តៅខ្លាំងពុំមានជម្រកជ្រក។
ដោយឡែកក្រៅពីគោ ក្របី និងស្វា ដែលបានស្លាប់ក្នុងរដូវក្ដៅនេះនៅមានត្រី៦៨តោនទៀតបានងាប់នៅបឹងទន្លេឆ្មា ក្នុងខេត្តកំពង់ធំ។ ក្រសួងបរិស្ថាន និងអាជ្ញាធរទន្លេសាប បង្ហាញ មូលហេតុនៃការងាប់របស់ត្រីរាប់សិបតោន នេះ គឺបណ្តាលមកពីកង្វះអ៊ុកស៊ីសែន និង ភ្លើងឆេះព្រៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ