កម្ពុជាចង់នាំខ្លាធំ ៧ក្បាលពីឥណ្ឌា
បន្ទាប់ពីបានចូលរួមក្នុងសន្និសីទលើកទី៣ ស្តីពីការអភិរក្សសត្វខ្លាធំរបស់រដ្ឋមន្ត្រី ១៣ប្រទេស ក្នុងតំបន់អាស៊ី កាលពីពាក់កណ្តាលខែមេសា តំណាងក្រសួងកសិកម្មកម្ពុជា និងឥណ្ឌា បានពិភាក្សាគ្នាក្រៅផ្លូវការថា គេមានផែនការនាំយកសត្វខ្លាធំចំនួន ៧ក្បាលពីប្រទេសឥណ្ឌាមកកាន់កម្ពុជា ក្នុងដំណាក់កាលដំបូង។ ផែនការនេះ គឺដើម្បីស្តារចំនួនសត្វខ្លាធំក្នុងប្រទេសកម្ពុជាឡើងវិញ។ អង្គការការពារសត្វព្រៃ បានស្វាគមន៍ និងត្រៀមខ្លួនគាំទ្រចំពោះគម្រោងនេះ ប៉ុន្តែស្នើឲ្យមានការពង្រឹងច្បាប់ការពារសត្វព្រៃ និងព្រៃឈើឲ្យបានតឹងរ៉ឹងជាមុនសិន។
ចុះផ្សាយនៅថ្ងៃ៖
ស្តាប់ - ០២:០៩
តំណាងក្រសួងកសិកម្មកម្ពុជា ដែលបានទៅចូលរួមក្នុងសន្និសីទលើកទី៣ ស្តីពីការអភិរក្សសត្វខ្លាធំរបស់រដ្ឋមន្ត្រី ១៣ប្រទេសនៃតំបន់អាស៊ី នាទីក្រុងញូវដេលី ប្រទេសឥណ្ឌា បានប្រាប់វិទ្យុបារាំងថា គេបានពិភាក្សាក្រៅផ្លូវការជាមួយនឹងតំណាងក្រសួងកសិកម្មឥណ្ឌា ពីផែនការនាំយកសត្វខ្លាធំ ៧ក្បាល ពីឥណ្ឌាមកដាក់ក្នុងព្រៃកម្ពុជា។ យ៉ាងណាក៏ដោយ លោកកែវ អ៊ុំម៉ាលីស បានប្រាប់ថា ផែនការនេះ នៅមិនទាន់ត្រូវបានបញ្ជូនទៅកាន់រដ្ឋាភិបាល ដើម្បីពិនិត្យ និងសម្រេចនៅឡើយទេ។
បើតាមតំណាងក្រសួងកសិកម្មរូបនេះ ការយកសត្វខ្លាពីប្រទេសដទៃមកចិញ្ចឹមនេះ គឺអាចស្តារចំនួនសត្វខ្លាធំនៅកម្ពុជា។ ហើយមិនមែនតែប្រទេសឥណ្ឌាទេ ផ្នែករដ្ឋបាលព្រៃឈើកម្ពុជា បានបញ្ជាក់ថា គេក៏អាចយកយកសត្វខ្លាពីប្រទេសម៉ាឡេស៊ី ឬថៃ មកចិញ្ចឹមអភិរក្សផងដែរ។ តាមក្រសួងកសិកម្ម បច្ចុប្បន្នសត្វខ្លាធំ ក្នុងប្រទេសកម្ពុជា មានចំនួនប្រមាណពី ២០ទៅ ៥០ក្បាល ក្នុងតំបន់អភិរក្ស ដែលស្ថិតនៅប៉ែកខាងជើង ខាងកើត និងនិរតីនៃប្រទេសកម្ពុជា។
នាយកអង្គការការពារសត្វព្រៃ WWF ប្រចាំកម្ពុជា លោកឈិត សំអាត បានស្វាគមន៍ចំពោះផែនការនេះ ហើយលោកអះអាងថា WWF ត្រៀមខ្លួនដើម្បីគាំទ្រប្រសិនបើរដ្ឋាភិបាលកម្ពុជាត្រូវការ។ យ៉ាងណាក៏ដោយ លោកឈិត សំអាត ស្នើឲ្យរដ្ឋាភិបាលពង្រឹងការអនុវត្តច្បាប់ការពារសត្វព្រៃ និងព្រៃឈើឲ្យបានតឹងរ៉ឹងសិន មុននឹងយកសត្វខ្លាទាំងនោះមក ប្រយោជន៍ដើម្បីឲ្យវត្តមានខ្លាធំទាំងនោះ មាន ប្រសិទ្ធភាព និងយូរអង្វែង។ តាមការកត់សម្គាល់របស់លោក កន្លងមកសត្វខ្លាមួយចំនួន បានបាត់ចេញពីកាម៉ារ៉ាស្វ័យប្រវត្តិ មានន័យថា ក្នុងតំបន់នោះ ស្ទើរតែគ្មានវត្តមានខ្លាធំទៀតទេ។ WWF មើលឃើញថា សត្វព្រៃទាំងនោះ នៅតែប្រឈមនឹងបញ្ហាជម្រក ដោយសារការកាប់ទន្ទ្រានព្រៃឈើ និងការធ្វើទុកបុម្នេញរបស់មនុស្សជាដើម។
សូមបញ្ជាក់ថា នៅក្នុងសន្និសីទលើកទី៣ ស្តីពីការអភិរក្សសត្វខ្លាក្នុងតំបន់អាស៊ីរបស់រដ្ឋមន្ត្រី ១៣ប្រទេសដែលមានវត្តមានខ្លាធំ និងដែលធ្វើឡើងកាលពីពាក់កណ្តាលខែមេសាកន្លងទៅ បានកំណត់បង្កើនចំនួនសត្វខ្លាធំឲ្យកើនទ្វេរដង ក្នុងឆ្នាំ ២០២២។ តាមការប៉ាន់ស្មានរបស់ WWF និងវេទិកាសត្វខ្លាសកល បានបង្ហាញថា បច្ចុប្បន្នចំនួនសត្វខ្លាក្នុងសកលលោកមាន ៣៨៩០ក្បាល ខណៈកាលពីឆ្នាំ ២០១០ មាន ៣២០០ក្បាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ