សារពត៌មានអូស្ត្រាលី៖ ជនភៀសខ្លួនអូស្ត្រាលីក្រុមទី១នឹងមកកាន់កម្ពុជានៅសប្តាហ៍ក្រោយ
អូស្ត្រាលីកំពុងតែរៀបចំជើងយន្តហោះរួចរាល់ហើយ ដើម្បីបញ្ចូនជនភៀសខ្លួនក្រុមទី១នៅកោះនេរុ មកកាន់កម្ពុជា ។ នេះបើតាមការចុះផ្សាយររបស់សារពត៌មានអូស្ត្រាលី ដែលបានឲ្យដឹងថា ជើងហោះហើរទី១មកកាន់កម្ពុជានឹងចាប់ផ្តើម នៅថ្ងៃទីចន្ទ ទី២០ ខែមេសាខាងមុខនេះ ។
ចុះផ្សាយនៅថ្ងៃ៖
ស្តាប់ - ០២:០១
កាសែតThe Guardian របស់អូស្ត្រាលី ដែលបានរាយការណ៍ផ្អែកលើ លិខិតពត៌មានដែលបុគ្គលិកអន្តោប្រវេសន៍អូស្ត្រាលី បានចែកជូនឲ្យជនភៀសខ្លួននៅលើកោះនេរុ ឲ្យដឹងកាលពីថ្ងៃពុធទី១៥ មេសាថា ជនភៀសខ្លួនទាំងអស់ដែលស្ម័គ្រចិត្តមកកាន់កម្ពុជានឹងទទួលបានការជួយស្វែងរកការងារធ្វើ ការស្នាក់នៅ សុខាភិបាល និង អាចដាក់ពាក្យសុំសញ្ជាតិខ្មែរ ក្នុងរយៈពេល៧ឆ្នាំ។
បើតាម ភ្នាក់ងារពត៌មានអូស្ត្រាលីABCចេញផ្សាយនៅថ្ងៃទី១៦ ខែមេសានេះឲ្យដឹងថាយ៉ាងហោចណាស់ក៏មានជនភៀសខ្លួននៅអូស្ត្រាលី ចំនួន១០នាក់ នឹងឡើងយន្តហោះមកកាន់កម្ពុជានៅថ្ងៃចន្ទសប្តាហ៍ក្រោយនេះ ហើយកន្លែងចំនួន២នៅភ្នំពេញត្រូវបានជ្រើសរើសដើម្បីដាក់ជនភៀសខ្លួនទាំងនោះ ។ នៅក្នុងលិខិតដែលចែកជូនឲ្យជនភៀសខ្លួន បញ្ជាក់ថា សេវាស្នាក់នៅ អាចជាបន្ទប់ស្នាក់នៅ ផ្ទះសំណាក់ ឬក៏ជាផ្ទះវីឡា។
យ៉ាងណាក៏ដោយ វិទ្យុបារាំងអន្តរជាតិនាព្រឹកថ្ងៃទី១៦ មេសានេះ មិនអាចទាក់ទងការអះអាងអំពីការបញ្ជូនជនភៀសខ្លួននេះ ពីខាងភាគីកម្ពុជាឡើយខណៈដែល ថ្ងៃព្រហស្បតិ៍ទី១៦ មេសា នេះជាថ្ងៃចុងបញ្ចប់នៃពិធីបុណ្យឈប់សម្រាកចូលឆ្នាំថ្មីរបស់កម្ពុជា។
សូមបញ្ជាក់ថា កាលពីចុងខែមីនា ឆ្នាំ២០១៥ កម្ពុជានិង អូស្ត្រាលី បានចុះហត្ថលេខាលើអនុស្សរណៈនៃការយោគយល់ស្តីពីកិច្ចសហប្រតិបត្តិការអន្តោប្រវេសន៍ ។
កាលពីចុងខែកញ្ញា ឆ្នាំ ២០១៤ កិច្ចព្រមព្រៀង ការផ្តល់សិទ្ធិជ្រកកោនដល់ជនភៀសខ្លួនប្រមាណ ១ពាន់នាក់ ពីប្រទេសអូស្ត្រាលី ត្រូវបានចុះហត្ថលេខាដោយលោកស ខេង រដ្ឋមន្ត្រីក្រសួងមហាផ្ទៃកម្ពុជា និងលោក Scott Morrison រដ្ឋមន្ត្រីក្រសួងអន្តោប្រវេសន៍អូស្ត្រាលី ។
ប្រតិកម្មជាច្រើនបានផ្ទុះចេញពីក្រុមអង្គការសង្គម ស៊ីវិល ប្រជាពលរដ្ឋ តវ៉ាជំទាស់នឹងកិច្ចព្រមព្រៀងនេះ ហើយដាក់ញត្តិទៅកាន់ស្ថាប័នរដ្ឋនានាឲ្យមានការពិចារណាឡើងវិញ។ក្រុមអ្នកតវ៉ាលើកឡើងថា ប្រទេសកម្ពុជានៅមានភាពយ៉ាប់យ៉ឺននៅឡើយ មិនទាន់សមស្របអាចទទួលជនភៀសខ្លួនពីអូស្ត្រាលីបានទេ។ ក៏ប៉ុន្តែទាំងលោកនាយករដ្ឋមន្ត្រីហ៊ុន សែន ទាំងមន្ត្រីរដ្ឋាភិបាលឯទៀត ធ្លាប់បានបង្ហាញជំហរថា កម្ពុជាទទួលជនភៀសខ្លួនដោយយោងទៅលើគោលការណ៍ស្ម័គ្រចិត្តតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ