លោកស ខេង ធ្វើទស្សនកិច្ចនៅអូស្ត្រាលីជាលើកដំបូងបន្ទាប់ពីកិច្ចព្រមព្រៀងជនភៀសខ្លួន
បន្ទាប់ពីដំណើរទស្សនកិច្ចជាបន្តបន្ទាប់នៅក្នុងប្រទេសកម្ពុជាពីសំណាក់រដ្ឋមន្ត្រីក្រសួងអន្តោប្រវេសន៍និងការពារព្រុំដែនអូស្ត្រាលី រដ្ឋមន្ត្រីក្រសួងមហាផ្ទៃកម្ពុជាលោក ស ខេង នឹងត្រូវធ្វើដំណើរទៅកាន់ប្រទេសអូស្ត្រាលីនៅល្ងាចនេះក្នុងដំណើរទស្សនកិច្ចរយៈពេល៤ថ្ងៃ។ តាមសេចក្តីប្រកាសព័ត៌មានរបស់ក្រសួងមហាផ្ទៃកាលពីម្សិលមិញ លោក ស ខេង និង សមភាគី អូស្ត្រាលី នឹងចុះហត្ថលេខាលើអនុស្សរណៈយោគយល់គ្នាមួយចំនួនស្តីពីកិច្ចសហប្រតិបត្តិការផ្នែកសន្តិសុខ ជាពិសេសទាក់ទងទៅនឹងបញ្ហាអន្តោប្រវេសន៍។
ចុះផ្សាយនៅថ្ងៃ៖
ស្តាប់ - ០១:៥៧
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃនឹងចេញដំណើរទៅកាន់ប្រទេស អូស្ត្រាលីនៅល្ងាចនេះហើយ ដើម្បីបំពេញទស្សនកិច្ចជាផ្លូវការមួយចាប់ពីថ្ងៃទី២៤ដល់ថ្ងៃទី២៧មីនាឆ្នាំ២០១។
មន្ត្រីអ្នកនាំពាក្យក្រសួងមហាផ្ទៃលោកឧត្តមសេនីយ ខៀវ សុភ័ក្រ បានប្រាប់វិទ្យុបារាំង RFII នៅថ្ងៃអង្គារនេះថា ជាដំណើរទស្សនកិច្ចធម្មតាមួយឆ្លើយតបទៅនឹងការអញ្ជើញរបស់ភាគី អូស្ត្រាលី ហើយក៏មិនមានជជែកអ្វីបន្ថែមទៀតដែរ ទាក់ទងទៅនឹងដំណើរការបញ្ជូននិងទទួលជនភៀសខ្លួនពីអូស្ត្រាលីមកកម្ពុជា។
ក៏ប៉ុន្តែនៅក្នុងសេចក្តីប្រកាសព័ត៌មានមួយនៅថ្ងៃទី២៣មីនាម្សិលមិញ របស់ក្រសួងមហាផ្ទៃ ឲ្យដឹងថា លោក ស ខេង និងលោក Peter Dutton រដ្ឋមន្ត្រីក្រសួងអន្តោប្រវេសន៍និងការពារព្រំដែនអូស្ត្រាលីនឹងចុះហត្ថលេខាលើអនុស្សរណៈនៃការយោគយល់គ្នារវាងរដ្ឋាភិបាលកម្ពុជានិងរដ្ឋាភិបាលអូស្ត្រាលីស្តីពីកិច្ចសហប្រតិបត្តិការអន្តោប្រវេសន៍ នៅមន្ទីររដ្ឋសភានៅទីក្រុងកង់ប៊ែរ៉ា។
សេចក្តីប្រកាសព័ត៌មានបានបញ្ជាក់បន្ថែមថាការចុះអនុស្សរណៈនេះសបញ្ជាក់កាន់តែច្បាស់ថែមទៀតពីការប្តេជ្ញាចិត្តរបស់កម្ពុជា-អូស្ត្រាលី ក្នុងការរួមគ្នាប្រយុទ្ធប្រឆាំងរាល់ការគំរាមកំហែងផ្នែកសន្តិសុខ ជាពិសេសឧក្រិដ្ឋកម្មឆ្លងដែន និងអន្តោប្រវេសន៍ខុសច្បាប់។
សូមរំលឹកថា កាលពីថ្ងៃទី២៩ ខែកញ្ញា ឆ្នាំ២០១៤ កន្លងទៅនេះ រដ្ឋមន្ត្រីក្រសួងមហាផ្ទៃកម្ពុជា និង រដ្ឋមន្ត្រីក្រសួងអន្តោប្រវេសន៍អូស្ត្រាលី បានចុះហត្ថលេខាលើអនុស្សារណៈនៃការយោគយល់គ្នា ដើម្បីបញ្ជូនជនភៀសខ្លួនពីប្រទេសអូស្ត្រាលីមករស់នៅកម្ពុជា។
កិច្ចព្រមព្រៀងនោះ បាននាំឲ្យមានប្រតិកម្មរិះគន់ជាច្រើនពីគណបក្សប្រឆាំងនៅកម្ពុជានិងនៅអូស្ត្រាលី ព្រមទាំងសង្គមស៊ីវិលផងដែរ។
ក៏ប៉ុន្តែជាញឹកញយ រដ្ឋាភិបាលកម្ពុជាបានបញ្ជាក់ច្បាស់ៗថា កម្ពុជាតែងឈរលើគោលការណ៍មនុស្សធម៌និងស្ម័គ្រចិត្តក្នុងការទទួលយកជនភៀសខ្លួនពីប្រទេសអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ