ចិននៅខេត្តព្រះសីហនុ៖ សមត្ថកិច្ចថាមានយន្តការគ្រប់គ្រង ខណៈបទល្មើសកើតឡើងជាបន្តបន្ទាប់
ខណៈបទល្មើស ដែលបង្កឡើងដោយជនជាតិចិននៅក្នុងខេត្តព្រះសីហនុកើតមានជាបន្តបន្ទាប់ សមត្ថកិច្ចខេត្តនេះអះអាងថា ខ្លួនមានសមត្ថភាពគ្រប់គ្រងសភាពការណ៍បាន តាមរយៈច្បាប់ ដែលមានជាធរមាន។ ជាការអះអាងបន្ទាប់ពីភាពអនាធិបតេយ្យ និងបទល្មើសភាគច្រើន ដែលបង្កឡើងដោយជនជាតិចិន ត្រូវបានអ្នកប្រើប្រាស់បណ្តាញសង្គមធ្វើការរិះគន់។
ចុះផ្សាយនៅថ្ងៃ៖ កែប្រែថ្ងៃទី៖
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានថ្លែងប្រាប់វិទ្យុបារាំងអន្តរជាតិនាថ្ងៃទី២៦ ខែសីហាថា ករណីបទល្មើស ដែលបង្កឡើងដោយជនជាតិចិននោះ មិនបានបង្កជាការលំបាកដល់សមត្ថកិច្ចក្នុងការគ្រប់គ្រងនោះទេ។
លោកបញ្ជាក់ថា ប្រទេសកម្ពុជាមានច្បាប់ ហើយសមត្ថកិច្ចបានរៀបចំផែនការត្រឹមត្រូវ និងអាចគ្រប់គ្រងសភាពការណ៍ទាំងនោះបាន។ លោក ជួន ណារិន្ទ លើកឡើងថា បទល្មើស បង្កឡើងដោយជនជាតិចិន ដែលកំពុងរស់នៅក្នុងខេត្តព្រះសីហនុមិនមានការកើនឡើងច្រើននោះទេ ក្នុងរយៈពេលជិត៨ខែ ឆ្នាំ២០១៨នេះ។
ករណីថ្មីចុងក្រោយពាក់ព័ន្ធនឹងជនជាតិ លោក ជួន ណារិន្ទ អះអាងថា កម្លាំងជំនាញការិយាល័យនគរបាលប្រឆាំងគ្រឿងញៀនខេត្តព្រះសីហនុ កាលពីយប់ទៀបភ្លឺថ្ងៃទី២៦ ខែសីហា បានឃាត់ខ្លួនជនជាតិចិន៦២នាក់ ពាក់ព័ន្ធនឹងករណីប្រើប្រាស់ និងជួញដូរគ្រឿងញៀនក្នុងក្លឹបកំសាន្ត ឈ្មោះស៊ីតុងហ្វា ស្ថិតក្នុងក្រុម២៧ ភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ។ ក្រោយឃាត់ខ្លួនសមត្ថកិច្ចជំនាញខេត្ត បានកសាងសំណុំរឿងបញ្ជូនទៅសាលាដំបូងខេត្តព្រះសីហនុ។
ដោយឡែក កាលពីថ្ងៃទី២៤ ខែសីហា សមត្ថកិច្ចខេត្តព្រះសីហនុ ក៏បានឃាត់ខ្លួនជនជាតិចិនដីគោក និងតៃវ៉ាន់ចំនួន១៨នាក់ ដែលធ្វើសកម្មភាពពាក់ព័ន្ធនឹងការជំរិតទារប្រាក់តាមប្រព័ន្ធអ៊ីនធឺណេត (VOIP) នៅក្រុងព្រះសីហនុ ខេត្ដព្រះសីហនុ។
បើតាមរបាយការណ៍ ផ្ញើទៅកាន់លោក ស ខេង រដ្ឋមន្រ្តីក្រសួងមហាផ្ទៃ អភិបាលខេត្តព្រះសីហនុលើកឡើងថា កំណើនជនបរទេសដែលភាគច្រើនជាជនជាតិចិនក្នុងខេត្តមានសក្តានុពលមួយនេះកំពុងធ្វើឱ្យមានផលប៉ះពាល់ផ្សេងៗ តាមរយៈការធ្វើសកម្មភាពខុសច្បាប់។
យ៉ាងណាក៏ដោយ ស្ថានទូតចិនប្រចាំកម្ពុជា ធ្លាប់បានបញ្ជាក់ពីជំហររបស់ខ្លួនរួចហើយថា ស្ថានទូតប្រឆាំងដាច់ខាត ចំពោះជនជាតិចិនមួយចំនួនតូចនៅកម្ពុជា ដែលបានប្រពឹត្តអំពើល្មើសច្បាប់ ធ្វើឱ្យប៉ះពាល់មុខមាត់ប្រជាជនចិនទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ