បន្ទប់ស្ថានការណ៍បោះឆ្នោត ថា គ.ជ.ប. គួរតែពិចារណារាប់សន្លឹកឆ្នោតនៅឃុំដទៃផ្សេងទៀត!
ព្រឹកនេះ ស្របពេលដែលគ.ជ.ប. កំពុងរាប់សន្លឹកឆ្នោតឡើងវិញ នៅឃុំដូង ខេត្តស្វាយវៀង, បន្ទប់ស្ថានការណ៍បោះឆ្នោត ក៏បានស្នើសុំឲ្យគ.ជ.ប. ពិចារណាផ្ទៀងផ្ទាត់រាប់សន្លឹកឆ្នោត នៅឃុំដទៃផ្សេងទៀត ដែលមានបណ្តឹង។ ចំពោះបន្ទប់ស្ថានការណ៍បោះឆ្នោត, ការរាប់សន្លឹកឆ្នោតឡើងវិញ នេះ គឺដោយសារតែឃុំដែលមានបណ្តឹងនោះ មានកម្រិតសំឡេងល្អៀង កៀកគ្នាពេក ហើយនេះ ក៏ដើម្បីឲ្យភាគីបក្សនយោបាយអស់ចិត្តទាំងអស់គ្នាដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
បន្ទប់ស្ថានការណ៍បោះឆ្នោត ដែលបានដាក់អ្នកសង្កេតការណ៍នៅគ្រប់មណ្ឌលបោះឆ្នោតទាំងអស់ទូទាំងប្រទេស បានរកឃើញថា លទ្ធផលរាប់សន្លឹកឆ្នោតតាមឃុំសង្កាត់ មានកម្រិតល្អៀងតិចតួចបំផុត គឺត្រឹមតែ ៤.៣% តែប៉ុណ្ណោះ នៅក្នុងចំណោមសំណាកស្ថិតិរបស់ខ្លួន។ ក៏ប៉ុន្តែ បន្ទប់ស្ថានការណ៍បោះឆ្នោត បានស្នើឲ្យគ.ជ.ប. គួរតែរាប់សន្លឹកឆ្នោតឡើងវិញ ចំពោះឃុំសង្កាត់ណាដែលមានការប្តឹង ព្រោះថា កម្រិតសន្លឹកឆ្នោតដែលល្អៀង គឺខុសគ្នាតិចតួចពេក។ ដូច្នេះ បើរាប់ឡើងវិញ គឺអាចធ្វើឲ្យបក្សណាមួយ ឈ្នះត្រឡប់ជាចាញ់ ឬចាញ់បែរជាឈ្នះ ក៏អាចថាបាន។ ម្យ៉ាងវិញទៀត ក៏ព្រោះថា ចំនួនសន្លឹកឆ្នោតដែលចាត់ទុកថា មិនបានការ មានចំនួនច្រើនផង គឺរហូតដល់១.៨%ឯណោះ។
យ៉ាងណាក៏ដោយ ក្រុមអ្នកជំនាញរបស់ស្ថានការណ៍បោះឆ្នោតដែលផ្តុំដោយអង្គការសង្គមស៊ីវិល ជាង៤០ បញ្ជាក់ថា បើទោះបីជារាប់ឡើងទៅ វាអាចនឹងមានការប្រែប្រួលលទ្ធផលខ្លះមែន ប៉ុន្តែក៏មិនច្រើនដែរ ព្រោះបណ្តឹងដែលប្តឹងឲ្យរាប់ឡើងវិញ ក៏មិនច្រើននោះទេ គឺតែជាង២០ពាក្យប្តឹងប៉ុណ្ណោះ។
ថ្នាក់ដឹកនាំបន្ទប់ស្ថានការណ៍បោះឆ្នោត លោក គល់ បញ្ញា បានសង្កត់ធ្ងន់ថា ការផ្ទៀងផ្ទាល់កំណត់ហេតុលទ្ធផលរាប់សន្លឹកឆ្នោត នៅលើកនេះ គឺអាចជឿទុកចិត្តបានរហូតដល់ជាង៩៥%ឯណោះ ដោយផ្អែកលើវិធីសាស្ត្រគំរូសំណាក។ តាមការបញ្ជាក់របស់នាយកប្រតិបត្តិអង្គការខុមហ្វ្រែល, ភាពមិនប្រក្រតី និងកំហុសឆ្គងមានតិចតួច ពិសេសបញ្ហាចំពោះទម្រង់១១០២ តែវាគ្មានធ្វើឲ្យប៉ះពាល់លទ្ធផលឆ្នោតធ្ងន់ធ្ងរនោះទេ។
ទន្ទឹមនេះ សហភាពសហព័ន្ធយុវជនកម្ពុជា ដែលស្និទ្ធនឹងរដ្ឋាភិបាល យល់ឃើញដែរថា បញ្ហាមិនប្រក្រតីដែលបានកើតឡើងក្នុងពេលដំណើរការបោះឆ្នោត និងនៅក្នុងពេលរាប់សន្លឹកឆ្នោត ក៏មិនប៉ះពាល់ដល់លទ្ធផលបោះឆ្នោតនោះឡើយ។ សហភាពសហព័ន្ធយុវជនកម្ពុជា ដែលដាក់អ្នកសង្កេតការណ៍ច្រើនជាង គេរហូតដល់ជាង៣ម៉ឺននាក់ បានចេញរបាយការណ៍នៅថ្ងៃទី១២មិថុនា និងបានវាយតម្លៃថា ពេលរាប់សន្លឹកឆ្នោត មានការចូលរួមពីគ្រប់ភាគី។ ចំណុចនេះហើយដែលឆ្លុះបញ្ចាំងដោយមិនប្រកែកបានពីតម្លាភាព និងភាពបើកចំហរនៃដំណើរការរាប់សន្លឹកឆ្នោត។
ចំពោះ លោក គល់ បញ្ញា ដែលតាមដានបោះឆ្នោតជាង២៥ឆ្នាំនៅកម្ពុជា គូសបង្ហាញដោយមានទំនុកចិត្តថា នេះជាលើកទី១ ក្នុងប្រវត្តិសាស្ត្រខ្មែរ ដែលគ្មានភាគីណាចេញមុខ មកបដិសេធលទ្ធផលបោះឆ្នោត។ នេះក៏ជាសញ្ញាណវិជ្ជមានសម្រាប់លទ្ធិប្រជាធិបតេយ្យ។ ក៏ប៉ុន្តែ នៅមានបញ្ហាជាច្រើនទៀត ដែលត្រូវកែលម្អ តួយ៉ាងសមត្ថភាពមន្ត្រីគ.ជ.ប. នៅមូលដ្ឋាន ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ