ឈានចូលដល់ឆ្នាំទី៤ «បុណ្យភូមិ» ចង់ឃើញយុវជនយល់ដឹងកាន់តែច្រើនពីវប្បធម៌ខ្មែរ
កម្មវិធី «បុណ្យភូមិ» បានចាប់ផ្ដើមហើយ តាំងពីថ្ងៃទី៧មេសាម្សិលមិញ រហូតដល់ថ្ងៃអាទិត្យស្អែក នៅវត្តទួលក្រសាំង ស្ថិតក្នុងភូមិសាស្ត្រស្រុកស្អាង ខេត្តកណ្ដាល។ ឈានចូលដល់ឆ្នាំទី៤នៅឆ្នាំនេះ ស្ថាបនិកកម្មវិធី «បុណ្យភូមិ» រំពឹងថា យុវជនដែលទៅចូលរួម នឹងអាចយល់ដឹងកាន់តែច្រើននិងកាន់តែច្បាស់ ពីប្រពៃណីវប្បធម៌ខ្មែរដ៏ចំណាស់និងសម្បូរបែប។
ចុះផ្សាយនៅថ្ងៃ៖
ស្តាប់ - ០២:០៨
«បុណ្យភូមិ» ត្រូវបានរៀបចំធ្វើឡើងដោយក្រុមយុវជន ភ្លើងគប់ ក្នុងបំណងអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ និងផ្សព្វផ្សាយឲ្យប្រជាពលរដ្ឋជាពិសេសយុវជន បានយល់ដឹងអំពីប្រពៃណីវប្បធម៌ខ្មែរ។ ជារៀងរាល់ឆ្នាំនៅក្នុងកម្មវិធីបុណ្យភូមិ យុវជនរាប់ពាន់នាក់បានទៅប្រមូលផ្ដុំគ្នានៅតាមវត្តអារាមជាយរាជធានីភ្នំពេញ ដើម្បីរាំកម្សាន្ត លេងល្បែងប្រជាប្រិយ ទស្សនាពិព័រណ៍ និងមើលការសម្ដែងទម្រង់សិល្បៈបុរាណនាពេលយប់។
ក្នុងឆ្នាំនេះ កម្មវិធីកម្សាន្តនៅក្នុងព្រឹត្តិការណ៍បុណ្យភូមិ ត្រូវបានរៀបចំឡើងសម្បូរបែបជាងមុន ដោយមានការរាំកម្សាន្ត លេងល្បែងប្រជាប្រិយ និងសម្ដែងរបាំប្រជាប្រិយដូចជា៖ របាំគោះត្រឡោក និងរបាំនេសាទជាដើមនៅពេលថ្ងៃ។ លុះដល់ពេលយប់ នឹងមានការសម្ដែងទម្រង់សិល្បៈបុរាណ ដូចជា ល្ខោនយីកេ ល្ខោនស្បែកធំ និងល្ខោនខោលជាដើម។ ក្រៅពីនេះ ក៏មានផងដែរ ការតាំងពិព័រណ៍ លក់ទំនិញនិងចំណីអាហារ ដែលមានស្តង់ជាង១០០ចូលរួម។
ថ្លែងប្រាប់វិទ្យុបារាំងអន្ដរជាតិ កញ្ញា រិទ្ធី លំអរពេជ្រ ស្ថាបនិកក្រុមភ្លើងគប់ រំពឹងថា កម្មវិធីបុណ្យភូមិឆ្នាំនេះ ទំនងជាអាចទទួលបានអ្នកចូលរួមពី១ម៉ឺន៥ពាន់ ទៅ២ម៉ឺននាក់ ខណៈឆ្នាំមុន បុណ្យភូមិទទួលភ្ញៀវបានប្រមាណ១ម៉ឺននាក់។
កញ្ញា រិទ្ធី លំអរពេជ្រ សង្ឃឹមថា ឆ្នាំនេះ ក្រៅតែពីបានកម្សាន្តសប្បាយហើយ យុវជនដែលទៅចូលរួមក្នុងកម្មវិធីបុណ្យភូមិ នឹងអាចយល់ដឹងកាន់តែច្រើននិងកាន់តែច្បាស់ ពីប្រពៃណីវប្បធម៌ខ្មែរដ៏ចំណាស់និងសម្បូរបែប។ ស្ថាបនិកកម្មវិធីបុណ្យភូមិរូបនេះ ចង់ឃើញយុវជនខ្មែរ ចេះចោទជាសំណួរពីឫសគល់របស់ខ្លួនឯង ថាតើសិល្បៈ វប្បធម៌ ប្រពៃណី ដែលខ្មែរមានសព្វថ្ងៃនេះ មានប្រភពមកពីណា ហើយកំពុងធ្វើដំណើរទៅទិសណា? បើតាមកញ្ញា រិទ្ធី លំអរពេជ្រ គឺការចោទសំណួរអំពីអតីតកាលនេះហើយ ដែលជាការបើកផ្លូវឲ្យយុវជនខ្មែរស្គាល់ពីខ្លួនឯងកាន់តែច្បាស់ មុននឹងឈានទៅរួមចំណែកកសាងអនាគតដ៏ប្រសើរមួយសម្រាប់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ